ಹೊಳಲ್ಕೆರೆ ಬಳಿ ಸಿಕ್ಕಿದ್ದು 8 ಕೋಟಿಯಲ್ಲ | ಯಾರಿಗೆ ಸೇರಿದ್ದು ಇಷ್ಟು ದೊಡ್ಡ‌ಮೊತ್ತ | ಎಸ್ಪಿ ಧರ್ಮೇಂದ್ರಕುಮಾರ್ ಮೀನಾ ಸುದ್ದಿಗೋಷ್ಠಿ

ಚಿತ್ರದುರ್ಗ ನ್ಯೂಸ್.ಕಾಂ: ಹೊಳಲ್ಕೆರೆ ಪೊಲೀಸರು ನಡೆಸಿದ ಕಾರ್ಯಾಚರಣೆ ವೇಳೆ ಸಿಕ್ಕಿದ ಭಾರೀ ಮೊತ್ತದ ಹಣವನ್ನು ಬುಧವಾರ ತಡರಾತ್ರಿವರೆಗೆ ಪೊಲೀಸರು ಎಣಿಕೆ ಮಾಡಿದ್ದು, 7,99,96000 ರೂ. ಪತ್ತೆಯಾಗಿದೆ.

ಈ ಬಗ್ಗೆ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಧರ್ಮೇಂದ್ರಕುಮಾರ್ ಮೀನಾ ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದ್ದು, ಖಚಿತ ಮಾಹಿತಿ ಮೇರೆಗೆ ಜಿಲ್ಲೆಯಾದ್ಯಂತ ಎಲ್ಲ ಪೊಲೀಸ್ ಠಾಣೆಗಳಿಗೆ ಅಲರ್ಟ್ ಮಾಡಲಾಗಿದೆ.

ಇದನ್ನೂ ಓದಿ: ದಾಖಲೆ‌ ಇಲ್ಲದ 8 ಕೋಟಿ ರೂ. ಜಪ್ತಿ | ಹೊಳಲ್ಕೆರೆ ಪೊಲೀಸರ ಕಾರ್ಯಾಚರಣೆ

ಹೊಳಲ್ಕೆರೆ ತಾಲೂಕಿನ ಮಲ್ಲಾಡಿಹಳ್ಳಿ ಬಳಿ ಬಿಳಿ ಬಣ್ಣದ ಇನ್ನೋವಾ ಕಾರು ತಡೆದಾಗ ಅದರಲ್ಲಿ ಸುಮಾರು 8 ಕೋಟಿ ಹಣವನ್ನು ತಂಬಾಕು ಬ್ಯಾಗುಗಳಲ್ಲಿ ತುಂಬಿಡಲಾಗಿತ್ತು.

ಕಾರಿನಲ್ಲಿದ್ದ ಹಣ ಜಪ್ತಿ ಮಾಡಿ, ಚಾಲಕ ಹೊಳಲ್ಕೆರೆ ತಾಲ್ಲೂಕು ತೇಕಲವಟ್ಟಿ ಗೊಲರಹಟ್ಟಿಯ‌ ಸಚಿನ್ ಹಾಗೂ ಹರೀಶ್ ಎಂಬುವವರನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಲಾಗಿದೆ.

ಸದ್ಯ ಕಾರು ಓಡಿಸುತ್ತಿದ್ದ ಸಚಿನ್ ನೀಡಿರುವ ಮಾಹಿತಿಯಂತೆ, ಶಿವಮೊಗ್ಗದ ಮಲ್ನಾಡ್ ಟ್ರೇಡರ್ಸ್ ನ ಸುರೇಶ್ ಎಂಬುವವರಿಗೆ ಸೇರಿದೆ.

ಅಡಕೆ ಖರೀಧಿಗಾಗಿ ಈ ಹಣವನ್ನು ಕೊಟ್ಟಿದ್ದರು, ಆದರೆ, ಅಡಕೆ ಖರೀಧಿ ಮಾಡಲಾಗದ ಕಾರಣ ವಾಪಾಸು ತಲುಪಿಸಲು ಹೋಗುತ್ತಿದ್ದೆವು ಎಂದು ಮಾಹಿತಿ ನೀಡಿದ್ದಾರೆ ಎಂದು ಎಸ್ಪಿ ಮಾಹಿತಿ ನೀಡಿದ್ದಾರೆ.

ಈ ಬಗ್ಗೆ ಸೂಕ್ತ ದಾಖಲಾತಿಗಳನ್ನು‌ ನೀಡುವಂತೆ ಸುರೇಶ್ ಅವರಿಗೂ ನೋಟೀಸ್ ನೀಡಲಾಗಿದೆ. ಹತ್ತು ಲಕ್ಷಕ್ಕಿಂತ ಹೆಚ್ಚು ನಗದು ಹಣ ವಹಿವಾಟು ಮಾಡಿರುವ ಕಾರಣ ಆದಾಯ ತೆರಿಗೆ ಇಲಾಖೆ ಅಧಿಕಾರಿಗಳಿಗೂ ಮಾಹಿತಿ ನೀಡಲಾಗಿದೆ.

ಪೂರ್ಣ ಮಾಹಿತಿ ಪಡೆದು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗುತ್ತದೆ. ಹಣದ ಮೂಲ್ ಬಗ್ಗೆ ತನಿಖೆ ನಡೆಸಿ ಸಂಪೂರ್ಣ ಮಾಹಿತಿ ಪಡೆಯುವುದು ಬಾಕಿಯಿದೆ ಎಂದು ಹೇಳಿದ್ದಾರೆ.