ಜಿಲ್ಲಾಸ್ಪತ್ರೆಯಲ್ಲಿ ಮಂಗಾಟ | ರೋಗಿಗಳ ಪರದಾಟ

ಚಿತ್ರದುರ್ಗ ನ್ಯೂಸ್.ಕಾಂ: ಕಿಟಕಿಗಳ ಮೂಲಕ ಮಂಗಗಳು ಆಸ್ಪತ್ರೆಯ ವಾರ್ಡ್‍ನೊಳಗೆ ಬಂದು ಹಣ್ಣು, ಜ್ಯೂಸ್‍ಗೆ ಹುಡುಕಾಡುವ ಮೂಲಕ ಜಿಲ್ಲಾ ಆಸ್ಪತ್ರೆಯಲ್ಲಿ ರೋಗಿಗಳಲ್ಲಿ ಆತಂಕ ಸೃಷ್ಟಿಸಿದೆ.

ಚಿತ್ರದುರ್ಗ ಜಿಲ್ಲಾ ಆಸ್ಪತ್ರೆಯ ವಾರ್ಡ್ ಒಂದಕ್ಕೆ ಕಿಟಿಕಿಯ ಮೂಲಕ ಬರುವ ಮಂಗ ಬೆಡ್‍ನಿಂದ ಬೆಡ್‍ಗೆ ರೋಗಿಗಳ ಪಕ್ಕದಲ್ಲೇ ಓಡಾಡುತ್ತಾ, ಆಹಾರವನ್ನು ಹುಡುಕಾಡುತ್ತದೆ. ಆನಂತರ ರೋಗಿಯೊಬ್ಬರ ಬಳಿಯಿದ್ದ ಜ್ಯೂಸ್ ತೆಗೆದುಕೊಂಡು ಮತ್ತೆ ಕಿಟಕಿಯಿಂದ ಹೊರಗೆ ಹೋಗುತ್ತಿರುವ ವೀಡಿಯೋ ವೈರಲ್ ಆಗಿದೆ.

ಮಂಗಳ ಹೀಗೆ ಓಡಾಡುವಾಗ ವಯಸ್ಸಾದವರು ಸುಮ್ಮನೆ ಕುಳತರೆ, ಮಕ್ಕಳು, ಮಹಿಳೆಯರು ಪರದಾಡುತ್ತಾರೆ. ಕೆಲ ರೋಗಿಗಳಿಗೆ ಇಂಜಕ್ಷನ್, ಡ್ರಿಪ್ ಹಾಕಲಾಗಿರುತ್ತದೆ. ಅಂಥವರ ಬಳಿ ಬಂದರೆ ಕಥೆಯೇನು ಎನ್ನುವ ಚರ್ಚೆಯನ್ನು ಸಾರ್ವಜನಿಕರು ಮಾಡುತ್ತಿದ್ದಾರೆ.

ಇದನ್ನೂ ಓದಿ: ಹೊಳಲ್ಕೆರೆ ಬಳಿ ಸಿಕ್ಕಿದ್ದು 8 ಕೋಟಿಯಲ್ಲ | ಯಾರಿಗೆ ಸೇರಿದ್ದು ಇಷ್ಟು ದೊಡ್ಡ ಮೊತ್ತ

ಮಂಗಗಳು ಆಸ್ಪತ್ರೆಯೊಳಗೆ ಬಂದಾಗ ಅಲ್ಲಿದ್ದ ವೈದ್ಯರೋ, ಶುಶ್ರೂಷಕರೋ ಅಥವಾ ಡಿ ಗ್ರೂಪ್ ಸಿಬ್ಬಂದಿಗಳು ಓಡಿಸಲು ಆಗುವುದಿಲ್ಲ. ಬದಲಾಗಿ ಮಂಗಗಳು ಆಸ್ಪತ್ರೆಯ ವಾರ್ಡ್‍ಗಳ ಒಳಗೆ ಬರದಂತೆ ಅಗತ್ಯ ವ್ಯವಸ್ಥೆ ಮಾಡಿಕೊಳ್ಳಬೇಕಾಗಿದೆ.

ಈಗ ವೈರಲ್ ಆಗಿರುವ ವೀಡಿಯೋದಲ್ಲಿ ಮಂಗ ಕಿಟಕಿಯಿಂದ ಬಂದಿದೆ. ತಕ್ಷಣ ಆಸ್ಪತ್ರೆಯ ಕಿಟಕಿಗಳಿಗೆ ಮೆಶ್ ಅಳವಡಿಸಿದರೆ ಈ ಉಪಟಳಕ್ಕೆ ಕಡಿವಾಣ ಹಾಕಬಹುದು.
ಮೆಶ್ ಹಾಕುವುದರಿಂದ ಆಸ್ಪತ್ರೆಯೊಳಗೆ ಸೊಳ್ಳೆಗಳ ಕಾಟವೂ ಕಡಿಮೆಯಾಗುತ್ತದೆ. ಕೆಲ ವಾರ್ಡ್‍ಗಳಲ್ಲಿ ಕಿಟಕಿಗಳು ಹಾಳಾಗಿದ್ದು, ಮುಚ್ಚಲು ಬಾರದ ಸ್ಥಿತಿಯಲ್ಲಿವೆ. ಇವುಗಳನ್ನು ಸರಿಪಡಿಸಿದರೆ ಚಳಿ, ಗಾಳಿಯೂ ಕಡಿಮೆಯಾಗುತ್ತದೆ ಎಂದು ರೋಗಿಗಳು ಹೇಳಿಕೊಂಡಿದ್ದಾರೆ.

ಈ ಹಿಂದೆ ಆಸ್ಪತ್ರೆ ವಾರ್ಡ್ ಒಂದಕ್ಕೆ ನಾಯಿಗಳು ಬಂದು ಬೆಡ್ ಮೇಲೆ ಮಲಗಿದ್ದ ಸುದ್ದಿಯಾಗಿತ್ತು. ಈಗ ಮಂಗ ಬಂದು ಸುದ್ದಿಯಾಗಿದೆ. ಮುಂದೆ ಇಂತಹ ಘಟನೆಗಳು ನಡೆಯದಂತೆ ಆಸ್ಪತ್ರೆಯ ಆಡಳಿತ ಮಂಡಳಿ ಎಚ್ಚೆತ್ತುಕೊಳ್ಳಬೇಕಿದೆ ಎಂದು ಸಾರ್ವಜನಿಕರು ಎಚ್ಚರಿಸಿದ್ದಾರೆ.