ಮಾರಿಕಾಂಭ ದೇವಿಯ ಪರವು ಆಚರಣೆ | ಶತಮಾನದ ಪರಂಪರೆ ಮುಂದುವರಿಕೆ

CHITRADURGA NEWS | 04 SEPTEMBER 2026

ಚಳ್ಳಕೆರೆ: ಸಾಮಾಜಿಕ ಸಾಮರಸ್ಯ, ಒಗ್ಗಟ್ಟು ಮತ್ತು ಪರಂಪರೆಗೆ ಸಾಕ್ಷಿಯಾಗಿ, ಚಿತ್ರದುರ್ಗ ಜಿಲ್ಲೆಯ ಚಳ್ಳಕೆರೆ ತಾಲೂಕಿನ ತೊರೆಕೋಲಮ್ಮನಹಳ್ಳಿಯಲ್ಲಿ 100ಕ್ಕೂ ಹೆಚ್ಚು ವರ್ಷಗಳ ಇತಿಹಾಸವಿರುವ ‘ಮಾರಿಕಾಂಬಾ ದೇವಿಯ ಪರುವು’ ಆಚರಣೆಯನ್ನು ಶ್ರದ್ಧಾಭಕ್ತಿಗಳಿಂದ ನೆರವೇರಿಸಲಾಯಿತು.

ಇದನ್ನೂ ಓದಿ: ಸಾಮಾಜಿಕ ಜಾಲತಾಣಗಳಿಗೆ ವಿದ್ಯಾರ್ಥಿಗಳು ದಾಸರಾಗಬಾರದು | AC ಡಾ.ಕಾಂತರಾಜ್

​ಆಧುನಿಕತೆಯ ಸವಾಲುಗಳ ನಡುವೆಯೂ ಹಿರಿಯರು ಬೆಳೆಸಿಕೊಂಡು ಬಂದ ಈ ಅಪರೂಪದ ಸಂಪ್ರದಾಯವನ್ನು ಯುವ ಪೀಳಿಗೆಯೂ ಅದೇ ಭಕ್ತಿ-ಶ್ರದ್ಧೆಯಿಂದ ಮುಂದುವರಿಸಿಕೊಂಡು ಹೋಗುತ್ತಿರುವುದು ವಿಶೇಷವಾಗಿ ಗಮನ ಸೆಳೆಯಿತು.  

​ದಿನದ ಅಂಗವಾಗಿ, ಗ್ರಾಮಸ್ಥರು ತಮ್ಮ ಮನೆಗಳಲ್ಲೇ ಸಾಂಪ್ರದಾಯಿಕ ಅಡುಗೆಗಳಾದ ಕಾಯಿ ತೊಗೆ, ಸೊಪ್ಪಿನ ಸಾರು ಹಾಗೂ ಕಡುಬು ಸೇರಿದಂತೆ ವಿವಿಧ ಖಾದ್ಯಗಳನ್ನು ಪ್ರೀತಿಯಿಂದ ಸಿದ್ಧಪಡಿಸಿಕೊಂಡಿದ್ದರು. ನಂತರ ಊರಿನಿಂದ ಸ್ವಲ್ಪ ದೂರದಲ್ಲಿರುವ ಮಾರಮ್ಮನ ದೇವಸ್ಥಾನಕ್ಕೆ ತೆರಳಿ ದೇವಿಗೆ ನೈವೇದ್ಯ ಅರ್ಪಿಸಿ, ಸಾಮೂಹಿಕವಾಗಿ ವಿಶೇಷ ಪೂಜೆ ನೆರವೇರಿಸಿದರು.  

​ಪೂಜಾ ಕಾರ್ಯಕ್ರಮದ ನಂತರ, ಜಾತಿ-ಭೇದ ಹಾಗೂ ವರ್ಗ ತಾರತಮ್ಯವನ್ನು ಬದಿಗೊತ್ತಿ ಹಿರಿಯರು, ಮಹಿಳೆಯರು, ಯುವಕರು ಮತ್ತು ಮಕ್ಕಳು ಸೇರಿದಂತೆ ಗ್ರಾಮದ ಸಮಸ್ತರೂ ಒಂದೇ ಪಂಕ್ತಿಯಲ್ಲಿ ಕುಳಿತು ಸಾಮೂಹಿಕವಾಗಿ ಪ್ರಸಾದ ಸ್ವೀಕರಿಸಿದರು (ಸಹಭೋಜನ). ಈ ದೃಶ್ಯವು ಗ್ರಾಮದಲ್ಲಿದ್ದ ಪರಸ್ಪರ ಪ್ರೀತಿ, ಸಹೋದರತ್ವ ಹಾಗೂ ಸಾಮಾಜಿಕ ಒಗ್ಗಟ್ಟನ್ನು ಎತ್ತಿಹಿಡಿಯಿತು.  

ಇದನ್ನೂ ಓದಿ: ನವೋದಯ ವಿದ್ಯಾಲಯ ಪ್ರವೇಶ ಪರೀಕ್ಷೆಗೆ ಅರ್ಜಿ ಆಹ್ವಾನ | ಸೆ.30 ಕೊನೆಯ ದಿನ

​ಊರಿನ ಒಳಿತು, ಉತ್ತಮ ಮಳೆ ಮತ್ತು ಸಮೃದ್ಧ ಬೆಳೆಗಾಗಿ ಗ್ರಾಮಸ್ಥರು ದೇವಿಯಲ್ಲಿ ವಿಶೇಷ ಪ್ರಾರ್ಥನೆ ಸಲ್ಲಿಸುತ್ತಿದ್ದಂತೆಯೇ ವರುಣದೇವನ ಕೃಪೆಯಾಗಿ ಮಳೆ ಸುರಿಯಿತು. ಈ ಹಠಾತ್ ಮಳೆಯನ್ನು ದೇವಿಯ ಪ್ರತ್ಯಕ್ಷ ಆಶೀರ್ವಾದವೆಂದೇ ಭಾವಿಸಿದ ಗ್ರಾಮಸ್ಥರು ಅತ್ಯಂತ ಸಂತಸ ಹಾಗೂ ಭಕ್ತಿಪರವಶತೆಯಿಂದ ಪರುವು ಆಚರಣೆಯನ್ನು ಪೂರ್ಣಗೊಳಿಸಿದರು.