ಬಸ್‌ ಬೆಂಕಿ ದುರಂತದಲ್ಲಿ ಮೃತಪಟ್ಟವರ ಗುರುತು ಪತ್ತೆ | ತಾಯಿ ಮಗು ಸೇರಿ 6 ಮಂದಿ ದಹನ

CHITRADURGA NEWS | 25 DECEMBER 2025

ಚಿತ್ರದುರ್ಗ: ಹಿರಿಯೂರು ತಾಲೂಕಿನ ಜವನಗೊಂಡನಹಳ್ಳಿ ಬಳಿ ನಡೆದ ಭೀಕರ ಬಸ್‌ ಅಗ್ನಿ ದುರಂತದಲ್ಲಿ ಬಸ್ಸಿನಲ್ಲಿದ್ದ ಮಗು ಸೇರಿದಂತೆ ಐದು ಮಂದಿ ಹಾಗೂ ಬಸ್ಸಿಗೆ ಕಂಟೇನರ್‌ ಡಿಕ್ಕಿ ಹೊಡೆದ ಕಂಟೇನರ್‌ ಲಾರಿ ಚಾಲಕ ಸಜೀವ ದಹನವಾಗಿದ್ದಾರೆ.

ನಸುಕಿನ 2 ಗಂಟೆಗೆ ಈ ಘಟನೆ ನಡೆದಾಗ 20ಕ್ಕಿಂತ ಹೆಚ್ಚು ಮಂದಿ ಈ ದರ್ಘಟನೆಯಲ್ಲಿ ಮೃತಪಟ್ಟಿದ್ದಾರೆ ಎಂದೇ ಸುದ್ದಿಯಾಗಿತ್ತು. ಆದರೆ, ಬೆಂಗಳೂರಿನಲ್ಲಿ ಬಸ್‌ ಹತ್ತಿದವರು, ಬೆಂಕಿ ಹೊತ್ತಿದಾಗ ಜಿಗಿದು ಪಾರಾಗಿ ವಿವಿಧ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯುತ್ತಿರುವವರ ಸಂಖ್ಯೆಗಳನ್ನು ಲೆಕ್ಕ ಹಾಕುತ್ತಾ ನಿಧಾನವಾಗಿ ವಾಸ್ತವ ಅರಿವಾಗುತ್ತಾ ಬಂದಿತು.

ಇದನ್ನೂ ಓದಿ: ಬಸ್‌ಗೆ ಬೆಂಕಿ | ಅಪಘಾತ ಸಂಭವಿಸಿದ್ದು ಹೇಗೆ ಗೊತ್ತಾ ?

ಬೆಳಗ್ಗೆ ಅಂದಾಜು 9 ರಿಂದ 11 ಮಂದಿ ಮೃತಪಟ್ಟಿರಬಹುದು ಎನ್ನುವ ಲೆಕ್ಕಾಚಾರ ಪೊಲೀಸ್‌ ವಲಯದಲ್ಲೂ ಇತ್ತು. ಆದರೆ, ನಾಪತ್ತೆಯಾಗಿದ್ದ ಇಬ್ಬರು ಪತ್ತೆಯಾದ ನಂತರ ಸಾವಿನ ನಿಖರ ಸಂಖ್ಯೆ ಗೊತ್ತಾಯಿತು.

ಮಧ್ಯಾಹ್ನ 3 ಗಂಟೆಗೆ ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ರಂಜಿತ್‌ ಕುಮಾರ್‌ ಬಂಡಾರು ಅಧಿಕೃತವಾಗಿ ಈ ದುರ್ಘಟನೆಯಲ್ಲಿ 6 ಜನ ಮೃತಪಟ್ಟಿದ್ದಾರೆ ಎಂದು ವಿವರಿಸಿದರು.

ಬಸ್‌ ದುರಂತದಲ್ಲಿ ಸಾವಿಗೀಡಾದವರ ವಿವರ:

ಮೃತರನ್ನು ಬೆಂಗಳೂರಿನ ಬಿಂದು ಹಾಗೂ ಅವರ ಐದು ವರ್ಷದ ಮಗಳು ಗ್ರೇಯಾ, ಭಟ್ಕಳದ ರಶ್ಮಿ ಮಹಾಲೆ, ಚನ್ನರಾಯಪಟ್ಟಣದ ನವ್ಯ ಹಾಗೂ ರಶ್ಮಿ ಎಂದು ಎಸ್ಪಿ ತಿಳಿಸಿದ್ದಾರೆ.

ಇದನ್ನೂ ಓದಿ: ಬಸ್‌ ಬೆಂಕಿ ದುರಂತ | HELP LINE ತೆರೆದ ಪೊಲೀಸ್‌ ಇಲಾಖೆ

ಬಸ್ಸಿನಲ್ಲಿ ಚಾಲಕ ರಫಿಕ್‌, ನಿರ್ವಾಹಕ ಸಾಧಿಕ್‌ ಸೇರಿದಂತೆ 33 ಮಂದಿ ಪ್ರಯಾಣಿಸುತ್ತಿದ್ದು, 28 ಮಂದಿ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.