ತುರುವನೂರಿನಲ್ಲಿ ನಾಳೆ ಎನ್.ತಿಪ್ಪಣ್ಣ ಅಂತ್ಯಕ್ರಿಯೆ | ರಾಯರೆಡ್ಡಿ, ಹೊರಟ್ಟಿ‌ ಹಲವು ಗಣ್ಯರ ಆಗಮನ

CHITRADURGA NEWS | 11 July 2025

ಚಿತ್ರದುರ್ಗ: ಹಿರಿಯ ನ್ಯಾಯವಾದಿ, ವಿಧಾನ ಪರಿಷತ್ ಸಭಾಪತಿಯಾಗಿ, ವೀರಶೈವ ಮಹಾಸಭಾ ರಾಜ್ಯ ಘಟಕದ ನಿಕಟಪೂರ್ವ ಅಧ್ಯಕ್ಷರಾಗಿದ್ದ ಎನ್.ತಿಪ್ಪಣ್ಣ ಅವರ ಅಂತ್ಯಕ್ರಿಯೆ ಚಿತ್ರದುರ್ಗ ಜಿಲ್ಲೆಯ ತುರುವನೂರು ಗ್ರಾಮದಲ್ಲಿ ನಡೆಯಲಿದೆ.

97 ವರ್ಷದ ತಿಪ್ಪಣ್ಣ ಶುಕ್ರವಾರ ಬೆಳಗಿನ ಜಾವ ಬಳ್ಳಾರಿಯಲ್ಲಿ ನಿಧನರಾಗಿದ್ದು, ಅಂತ್ಯಕ್ರಿಯೆಯನ್ನು ಸ್ವಗ್ರಾಮ ಚಿತ್ರದುರ್ಗ ಜಿಲ್ಲೆಯ ತುರುವನೂರಿನಲ್ಲಿ ನಡೆಸಲು ಸಿದ್ಧತೆ ನಡೆದಿದೆ.

ಜು.13 ಶನಿವಾರ ಬೆಳಗ್ಗೆ 11 ಗಂಟೆಗೆ ಇಲ್ಲಿನ ಅವರ ಜಮೀನಿನಲ್ಲಿ ಅಂತ್ಯಕ್ರಿಯೆ ವೀರಶೈವ ಸಂಪ್ರದಾಯದಂತೆ ನಡೆಯಲಿವೆ.

ಅಂತ್ಯಕ್ರಿಯೆಯಲ್ಲಿ ಭಾಗವಹಿಸಲು ವಿಧಾನ ಪರಿಷತ್ ಸಭಾಪತಿ ಬಸವರಾಜ ಹೊರಟ್ಟಿ, ಮುಖ್ಯಮಂತ್ರಿಗಳ ಆರ್ಥಿಕ ಸಲಹೆಗಾರ ಬಸವರಾಜ ರಾಯರೆಡ್ಡಿ ಸೇರಿದಂತೆ ಹಲವು ಮುಖಂಡರು, ಸಮಾಜದ ಗಣ್ಯರು ಆಗಮಿಸಲಿದ್ದಾರೆ.

ಎನ್‌.ತಿಪ್ಪಣ್ಣ ಅವರ ಅಗಲಿಕೆಗೆ ವೀರಶೈವ ಲಿಂಗಾಯತ ಮಹಾಸಭಾ‌ ಚಿತ್ರದುರ್ಗ ಜಿಲ್ಲಾ ಘಟಕ ಸಂತಾಪ ಸೂಚಿಸಿದೆ.

ತಮ್ಮ ಬಾಲ್ಯದ ಶಿಕ್ಷಣವನ್ನು ತುರುವನೂರು ನಂತರ‌ ಚಿತ್ರದುರ್ಗದಲ್ಲಿ ಪೂರೈಸಿದ್ದ ಎನ್.ತಿಪ್ಪಣ್ಣ ನಂತರ ಬೆಂಗಳೂರಿನಲ್ಲಿ ವಕೀಲಿ ವೃತ್ತಿ ಆರಂಭಿಸಿದ್ದರು.

ಕ್ರಿಮಿನಲ್ ಪ್ರಕರಣಗಳಲ್ಲಿ ಅವರಿಗೆ ಉತ್ತಮವಾದ ಹೆಸರಿತ್ತು.ಅವರ ಪತ್ನಿಯ ಅಂತ್ಯಕ್ರಿಯೆ ಕೂಡಾ ತುರುವನೂರಿನಲ್ಲೇ ಆಗಿತ್ತು ಎಂದು ಚಿತ್ರದುರ್ಗದ ವೀರಶೈವ ಸಮಾಜದ ಮುಖಂಡ ಎಸ್.ಷಣ್ಮುಖಪ್ಪ ತಿಳಿಸಿದ್ದಾರೆ.