ದಿಂಬಿನ ಬಳಿ ಮೊಬೈಲ್ ಫೋನ್ ಇಟ್ಟು ಮಲಗುವುದರಿಂದ ಮೆದುಳಿನ ಕ್ಯಾನ್ಸರ್ ಬರುತ್ತದೆಯೇ? 

ಇಂದು ಮೊಬೈಲ್ ಫೋನ್ ನಮ್ಮ ಜೀವನದ ಒಂದು ಪ್ರಮುಖ ಭಾಗವಾಗಿದೆ. ಹಗಲು ಅಥವಾ ರಾತ್ರಿ ಇರಲಿ, ನಾವು ಯಾವಾಗಲೂ ಕಾಲ್, ಮೆಸೇಜ್‍ ಕಳುಹಿಸುವಿಕೆ ಮತ್ತು ವಿಡಿಯೊ ಸ್ಕ್ರೋಲಿಂಗ್ ನೆಪದಲ್ಲಿ ನಮ್ಮ ಮೊಬೈಲ್ ಫೋನ್‌ಗಳನ್ನು ಹಿಡಿದುಕೊಂಡೇ ಇರುತ್ತೇವೆ.  

ರಾತ್ರಿಯಲ್ಲಿ ಫೋನ್ ಬಳಸಿದ ಅನೇಕ ಜನರು ತಮ್ಮ ಫೋನ್‌ಗಳನ್ನು ದಿಂಬಿನ ಕೆಳಗೆ ಅಥವಾ ದಿಂಬಿನ ಬಳಿ ಇಟ್ಟುಕೊಂಡು ನಿದ್ರಿಸುತ್ತಾರೆ. ಆದರೆ ದಿಂಬಿನ ಬಳಿ ಮೊಬೈಲ್ ಫೋನ್ ಇಟ್ಟುಕೊಂಡು ಮಲಗುವುದು ಆರೋಗ್ಯಕ್ಕೆ ಹಾನಿಕಾರಕ. ಹಾಗಾದ್ರೆ ದಿಂಬಿನ ಬಳಿ ಮೊಬೈಲ್ ಫೋನ್ ಇಟ್ಟುಕೊಂಡು ಮಲಗುವ ಜನರಲ್ಲಿ ಮೆದುಳಿನ ಕ್ಯಾನ್ಸರ್ ಅಪಾಯವನ್ನು ಹೆಚ್ಚಿಸುತ್ತದೆಯೇ? ಎಂಬ ಪ್ರಶ್ನೆ ಹಲವರಲ್ಲಿ ಮೂಡಿದೆ. ಇದಕ್ಕೆ ಉತ್ತರ ಇಲ್ಲಿದೆ ನೋಡಿ.

ದಿಂಬಿನ ಬಳಿ ಮೊಬೈಲ್ ಇಟ್ಟು ಮಲಗಿದರೆ ಮೆದುಳಿನ ಕ್ಯಾನ್ಸರ್ ಬರಬಹುದೇ?

ವೈದ್ಯರು ಹೇಳುವಂತೆ ಮೊಬೈಲ್ ಫೋನ್‌ಗಳು ರೇಡಿಯೋ ಫ್ರೀಕ್ವೆನ್ಸಿ (RF) ವಿಕಿರಣವನ್ನು ಹೊರಸೂಸುತ್ತವೆ. ಇದು ಒಂದು ರೀತಿಯ ಅಯಾನೀಕರಿಸದ ವಿಕಿರಣ. ಸರಳವಾಗಿ ಹೇಳುವುದಾದರೆ, ಮೊಬೈಲ್ ಫೋನ್‌ನಿಂದ ಹೊರಸೂಸುವ ವಿಕಿರಣವು ಮಾನವನ DNA ಗೆ ಹಾನಿ ಮಾಡುವುದಿಲ್ಲ. ಆದ್ದರಿಂದ ಅದು ಕ್ಯಾನ್ಸರ್‌ಗೆ ಕಾರಣವಾಗುವುದಿಲ್ಲ. 

ಆದರೆ ಫೋನ್ ಅನ್ನು ದಿಂಬಿನ ಬಳಿ ಇಡುವುದರಿಂದ ನಿದ್ರೆ ಮತ್ತು ಮೆದುಳಿನ ಕಾರ್ಯನಿರ್ವಹಣೆಯ ಮೇಲೆ ಪರಿಣಾಮ ಬೀರುತ್ತದೆ. ಅದರಲ್ಲೂ RF ವಿಕಿರಣವು ದುರ್ಬಲ ರೋಗನಿರೋಧಕ ಶಕ್ತಿ ಹೊಂದಿರುವವರ ಮೇಲೆ ಹೆಚ್ಚಿನ ಪರಿಣಾಮ ಬೀರಬಹುದು. ಆದರೆ ಕ್ಯಾನ್ಸರ್‌ನಂತಹ ಗಂಭೀರ ಕಾಯಿಲೆಗೆ ಸಂಬಂಧಿಸಿದೆ ಎಂದು ಹೇಳಲು ಸಾಕಷ್ಟು ಪುರಾವೆಗಳಿಲ್ಲ.

ತಲೆಯ ಕೆಳಗೆ ಮೊಬೈಲ್ ಫೋನ್ ಇಟ್ಟುಕೊಂಡು ಮಲಗಿದರೆ ಏನಾಗುತ್ತದೆ?

ನರಕೋಶಗಳ ಮೇಲೆ ಪರಿಣಾಮ

ಫೋನ್‌ನಿಂದ ಹೊರಸೂಸುವ RF ವಿಕಿರಣವು ತಲೆಗೆ ಹತ್ತಿರದಲ್ಲಿ ಇರುವುದರಿಂದ ನರಕೋಶಗಳ ಮೇಲೆ ಪರಿಣಾಮ ಬೀರುತ್ತದೆ. ಇದು ತಲೆನೋವು, ನಿದ್ರೆಯ ಕೊರತೆ, ಸ್ಮರಣಶಕ್ತಿಯ ನಷ್ಟ ಮತ್ತು ಮೆದುಳಿನ ಅತಿಯಾದ ಪ್ರಚೋದನೆಯಂತಹ ಸಮಸ್ಯೆಗಳನ್ನು ಉಂಟುಮಾಡಬಹುದು.

ನಿದ್ರೆಯ ತೊಂದರೆಗಳು 

ಮೊಬೈಲ್ ನ ನೀಲಿ ಬೆಳಕು ಮೆಲಟೋನಿನ್ ಹಾರ್ಮೋನ್ ಅನ್ನು ಅಡ್ಡಿಪಡಿಸುತ್ತದೆ. ಇದು ನಿದ್ರೆಯ ಗುಣಮಟ್ಟದ ಮೇಲೆ ಪರಿಣಾಮ ಬೀರುತ್ತದೆ. ಮೊಬೈಲ್ ಅನ್ನು ದಿಂಬಿನ ಬಳಿ ಇಟ್ಟುಕೊಳ್ಳುವ ಜನರು ರಿಂಗ್‌ಟೋನ್‌ಗಳಿಂದ ಪದೇ ಪದೇ ಎಚ್ಚರಗೊಳ್ಳಬಹುದು. ಈ ರೀತಿಯ ಸಮಸ್ಯೆ ದೀರ್ಘಕಾಲದವರೆಗೆ ಮುಂದುವರಿದರೆ, ಅದು ಮಾನಸಿಕ ಆಯಾಸ ಮತ್ತು ಒತ್ತಡಕ್ಕೆ ಕಾರಣವಾಗಬಹುದು.

ಬೆಂಕಿಯ ಅಪಾಯ

ಫೋನ್ ಅನ್ನು ದಿಂಬಿನ ಕೆಳಗೆ ಇಡುವುದರಿಂದ ಗಾಳಿಯಾಡುವುದಿಲ್ಲ. ಇದು ಬ್ಯಾಟರಿ ಬಿಸಿಯಾಗಲು ಮತ್ತು ಬೆಂಕಿಯ ಅಪಾಯಕ್ಕೆ ಕಾರಣವಾಗಬಹುದು. ಗಂಭೀರ ಸಂದರ್ಭಗಳಲ್ಲಿ, ದಿಂಬಿನ ಕೆಳಗೆ ಮೊಬೈಲ್ ಇಟ್ಟುಕೊಂಡು ಮಲಗುವುದರಿಂದ ಬ್ಯಾಟರಿ ಸ್ಫೋಟಗೊಂಡು ವ್ಯಕ್ತಿ ಸಾಯಬಹುದು.