ಕಾರಿನಲ್ಲಿದ್ದ ಹತ್ತು ಲಕ್ಷ ಕಳ್ಳತನ | ಕಾರಿನಿಂದ ಹಣ ಕದ್ದು ಬೈಕಿನಲ್ಲಿ ಪರಾರಿ | ಸಿ.ಸಿ. ಕ್ಯಾಮರಾದಲ್ಲಿ ದೃಶ್ಯ ಸೆರೆ

ಚಿತ್ರದುರ್ಗ ನ್ಯೂಸ್.ಕಾಂ: ಕಾರಿನಲ್ಲಿದ್ದ ಹತ್ತು ಲಕ್ಷ ರೂ.ಗಳನ್ನು ಬ್ಯಾಂಕಿನ ಮುಂದೆಯೇ, ಹಾಡಹಗಲೇ ಕಳ್ಳತನ ಮಾಡಿರುವ ಘಟನೆ ಹೊಸದುರ್ಗದಲ್ಲಿ ನಡೆದಿದೆ.

ಹೊಸದುರ್ಗ ಪಟ್ಟಣದ ಕರ್ನಾಟಕ ಬ್ಯಾಂಕ್ ಮುಂದೆ ನಿಲ್ಲಿಸಿದ್ದ ಕಾರಿನ ಗ್ಲಾಸ್ ಹೊಡೆದು ಕಳ್ಳತನ ನಡೆಸಿರುವ ಸಿ.ಸಿ.ಟಿವಿ. ವೀಡಿಯೋ ಪೊಲೀಸರಿಗೆ ಲಭ್ಯವಾಗಿದೆ.

ಹೊಸದುರ್ಗ ತಾಲೂಕು ಲಕ್ಕಿಹಳ್ಳಿ ಗ್ರಾಮದ ರೈತ ಮುದ್ದಪ್ಪ ಎಂಬುವವರು ಈ ಹಣವನ್ನು ಬ್ಯಾಂಕಿನಿಂದ ಬಿಡಿಸಿಕೊಂಡು ಬಂದು ಕಾರಿನಲ್ಲಿಟ್ಟು, ಅಂಗಡಿಗೆ ಹೋಗಿದ್ದಾರೆ.

ಇದನ್ನೂ ಓದಿ: ಚಿತ್ರದುರ್ಗ ಜಿಲ್ಲೆಗೆ ಎಲ್ಲೋ ಅಲರ್ಟ್ | ಮೂರು ದಿನ ಮಳೆ ಸಾಧ್ಯತೆ

ಈ ಸಮಯಕ್ಕೆ ಹೊಂಚು ಹಾಕಿದ್ದ ಕಳ್ಳರು ಡ್ರೈವರ್ ಬದಿಯ ಸೀಟಿನ ಕಡೆಯಿಂದ ಕಾರಿನೊಳಗೆ ಬಗ್ಗಿ ಪಕ್ಕದ ಸೀಟಿನಲ್ಲಿದ್ದ ಹಣದ ಬ್ಯಾಗನ್ನು ಕದ್ದು ಮತ್ತೊಂದು ಬೈಕಿನಲ್ಲಿ ಪರಾರಿಯಾಗಿದ್ದಾರೆ.

ಹಣ ಕಳುವು ಮಾಡುವ ಕಳ್ಳ ಒಂದು ಬದಿಯಿಂದ ಬಂದು ಕಾರಿನ ಬಳಿ ನಿಂತರೆ ಮತ್ತೊಂದು ಬದಿಯಿಂದ ಒಂದು ಬೈಕಿನಲ್ಲಿ ಮತ್ತೊಬ್ಬ ಬಂದು ನಿಲ್ಲುತ್ತಾನೆ. ಕೆಲ ಕ್ಷಣದಲ್ಲೇ ಕಾರಿನೊಳಗೆ ಬಗ್ಗೆ ಬ್ಯಾಗ್ ಎಗರಿಸಿಕೊಂಡು ಬೈಕಿನಲ್ಲಿ ವೇಗವಾಗಿ ಪರಾರಿಯಾಗುವ ದೃಶ್ಯ ಸಿಸಿ ಕ್ಯಾಮರಾದಲ್ಲಿ ಸೆರೆಯಾಗಿದೆ.

ಹೊಸದುರ್ಗ ಪೊಲೀಸ್ ಠಾಣೆಯಲ್ಲಿ ಈ ಘಟನೆ ನಡೆದಿದೆ. ಬ್ಯಾಂಕಿಗೆ ಹಣ ಬಿಡಿಸಲು ಹೋಗುವ ಗ್ರಾಹಕರು, ಹಣವನ್ನು ಬೈಕಿನ ಬ್ಯಾಕು, ಕಾರುಗಳಲ್ಲಿಡುವ ಮುನ್ನಾ ಹತ್ತು ಬಾರಿ ಯೋಚನೆ ಮಾಡಬೇಕಾದ ಅವಶ್ಯಕತೆ ಈ ಘಟನೆಯಿಂದ ಕಲಿಯಬೇಕಿದೆ.