ಚಳ್ಳಕೆರೆ ಪೊಲೀಸರ ಕಾರ್ಯಾಚರಣೆ | 97 ಲಕ್ಷ ಎಗರಿಸಿದ್ದ ಕಾರು ಚಾಲಕನ ಬಂಧನ 

CHITRADURGA NEWS | 27 AUGUST 2025

ಚಳ್ಳಕೆರೆ: ನಿವೃತ್ತ ಪೊಲೀಸ್‌ ಅಧಿಕಾರಿಯ ಹಣವನ್ನು ಎಗರಿಸಿದ್ದ ಕಾರು ಚಾಲಕನನ್ನು ಕಾರು ಸಹಿತ ಪತ್ತೆ ಹಚ್ಚುವಲ್ಲಿ ಚಳ್ಳಕೆರೆ ಪೊಲೀಸರು ಯಶಸ್ವಿಯಾಗಿದ್ದು, ಪ್ರಕರಣ ವರದಿಯಾದ ಕೆಲವೇ ಗಂಟೆಗಳಲ್ಲಿ ಆರೋಪಿಯ ಹೆಡೆಮುರಿ ಕಟ್ಟುವಲ್ಲಿ ಪೊಲೀಸ್‌ ಇಲಾಖೆ ಯಶಸ್ವಿಯಾಗಿದೆ. 

ಇದನ್ನೂ ಓದಿ: ಹಿಂದೂ ಮಹಾಗಣಪತಿ ವಿರಾಜಮಾನ | ಸಿಂಧೂರ ವೇದಿಕೆಯಲ್ಲಿ ಪ್ರತಿಷ್ಠಾಪನೆ

ಬೆಂಗಳೂರಿನಲ್ಲಿ ವಾಸವಿರುವ ನಿವೃತ್ತ ಪೊಲೀಸ್‌ ಎಸ್‌ಪಿ ಕೆ.ವೈ.ಗುರುಪ್ರಸಾದ್ (65) ತಮ್ಮ ಹೆಂಡತಿ ಲಲಿತರೊಂದಿಗೆ ಬೆಂಗಳೂರಿನಿಂದ ಆ.25ರ ಬೆಳಗಿನ ಜಾವ ಬಾಡಿಗೆ ಕಾರಿನಲ್ಲಿ ಬಳ್ಳಾರಿಗೆ ತೆರಳಿದ್ದು, ಅಲ್ಲಿ ತಮ್ಮ ಬಾಬು ಜಮೀನು ಮಾರಿ 97 ಲಕ್ಷ ಹಣವನ್ನು ಕಾರಿನಲ್ಲಿಟ್ಟುಕೊಂಡು ವಾಪಸ್ ಬೆಂಗಳೂರಿಗೆ ತೆರಳುವ ಸಂದರ್ಭದಲ್ಲಿ ಚಳ್ಳಕೆರೆ ನಗರದ ಉಡುಪಿ ಗಾರ್ಡ್ ಹೋಟೆಲ್‌ನಲ್ಲಿ ಊಟ ಮಾಡಲು ತೆರಳಿದ್ದರು. 

ಹಣ ಕಾರಿನಲ್ಲಿದ್ದು ಚಾಲಕ ರಮೇಶ್‌ಗೆ ಊಟ ಮಾಡಲು ಹೇಳಿದರು. ಊಟ ಮಾಡಿ ಹೊರಗೆ ಬಂದ ನಿವೃತ್ತ ಪೊಲೀಸ್ ಅಧಿಕಾರಿ ವೈ.ಗುರುಪ್ರಸಾದ್‌ ಸ್ಥಳದಲ್ಲಿ ಕಾರು ಇರದೇ ಇದ್ದಾಗ ಗಲಿಬಿಲಿಗೊಂಡು ಕೂಡಲೇ ಚಾಲಕ ರಮೇಶ್‌ಗೆ ಪೋನ್‌ ಮಾಡಿದ್ದಾರೆ, ಚಾಲಕನ ಪೋನ್ ಸ್ವೀಚ್‌ ಆಫ್‌ ಆಗಿತ್ತು. ಕೂಡಲೇ ಹೆಂಡತಿ ಲಲಿತರೊಂದಿಗೆ ಠಾಣೆಗೆ ಆಗಮಿಸಿ ದೂರು ನೀಡಿರುತ್ತಾರೆ. 

ಇದನ್ನೂ ಓದಿ: ಜಿಲ್ಲಾ ಹಾಪ್‍ಕಾಮ್ಸ್ | ಆ.30ರಂದು ವಾರ್ಷಿಕ ಮಹಾಸಭೆ

ದೂರು ದಾಖಲಿಸಿಕೊಂಡ ಪೊಲೀಸರು ಜಿಲ್ಲಾ ರಕ್ಷಣಾಧಿಕಾರಿ ರಂಜಿತ್‌ಕುಮಾರ್ ಬಂಡಾರು, ಉಪ ವಿಭಾಗದ ಡಿವೈಎಸ್‌ಪಿ ಮಾರ್ಗದರ್ಶನದಲ್ಲಿ ಹಣವನ್ನು ಕದ್ದು ಪರಾರಿಯಾಗಿದ್ದ ಬೆಂಗಳೂರಿನ ನಾಗಚಂದ್ರ ನಿವಾಸಿ ರಮೇಶನನ್ನು ಕಾರುಸಹಿತ ಪತ್ತೆಹಚ್ಚಿದ್ದಾರೆ. 

ಠಾಣಾ ವೃತ್ತ ನಿರೀಕ್ಷಕ ಕೆ.ಕುಮಾರ್‌ ಮಾರ್ಗದರ್ಶನದಲ್ಲಿ ಪೊಲೀಸರು ಚಾಲಕನ್ನು ಕಾರು ಸಹಿತ ವಶಕ್ಕೆ ಪಡೆದು, ಆರೋಪಿತನ ವಿರುಧ್ಧ ಸೂಕ್ತ ಕಾನೂನು ಕ್ರಮ ಕೈಗೊಳ್ಳಲಾಗಿರುತ್ತದೆ.

ಸದರಿ ಪ್ರಕರಣದಲ್ಲಿ ಆರೋಪಿಯನ್ನು ಮತ್ತು ಹಣವನ್ನು ಪತ್ತೆ ಮಾಡಲು ಶ್ರಮಿಸಿದ ಚಳ್ಳಕೆರೆ ಪೊಲೀಸ್ ಠಾಣೆಯ ಪೊಲೀಸರಿಗೆ ಎಸ್ಪಿ ರಂಜಿತ್‌ಕುಮಾರ್ ಬಂಡಾರು ಪ್ರಶಂಸೆ ವ್ಯಕ್ತಪಡಿಸಿರುತ್ತಾರೆ.