ಸನ್‌ಸ್ಕ್ರೀನ್ ಹಚ್ಚುವಾಗ ಈ ತಪ್ಪನ್ನು ಮಾಡಬೇಡಿ

CHITRADURGA NEWS | 25 MARCH 2026

ಬೇಸಿಗೆಗಾಲ ಶುರುವಾಗಿದೆ. ಹಾಗಾಗಿ ಹೊರಗಡೆ ಸೂರ್ಯನ ಬಿಸಿಲಿನಲ್ಲಿ ಓಡಾಡುವುದರಿಂದ ಸೂರ್ಯನ ಯುವಿ ಕಿರಣಗಳು ಚರ್ಮದ ಮೇಲೆ ಕೆಟ್ಟ ಪರಿಣಾಮ ಬೀರುತ್ತವೆ. ಿದರಿಂದ ಚರ್ಮ ಕಳೆಗುಂದುತ್ತದೆ. ಹಾಗಾಗಿ ಜನರು ತಮ್ಮ ಚರ್ಮವನ್ನು ಸೂರ್ಯನ ಬೆಳಕಿನಿಂದ ರಕ್ಷಿಸಲು ಹೆಚ್ಚಾಗಿ ಸನ್‌ಸ್ಕ್ರೀನ್ ಬಳಸುತ್ತಾರೆ. 

ಸನ್‌ಸ್ಕ್ರೀನ್ ಚರ್ಮದಲ್ಲಿ ಟ್ಯಾನ್ ಆಗುವುದನ್ನು ತಡೆಯುತ್ತದೆ. ಆದರೆ, ಕೆಲವರು ಪ್ರತಿದಿನ ಸನ್‌ಸ್ಕ್ರೀನ್ ಹಚ್ಚಿದ ನಂತರವೂ ಚರ್ಮದಲ್ಲಿ ಟ್ಯಾನ್ ಸಮಸ್ಯೆಯನ್ನು ಅನುಭವಿಸುತ್ತಾರೆ ಎಂದು ದೂರುತ್ತಾರೆ. ಯಾಕೆಂದರೆ ಅವರು ಸನ್‌ಸ್ಕ್ರೀನ್ ಹಚ್ಚುವಾಗ ಕೆಲವು ತಪ್ಪುಗಳನ್ನು ಮಾಡುತ್ತಾರೆ. ಇದು ಅವರ ಚರ್ಮದ ಮೇಲೆ ಸನ್‌ಸ್ಕ್ರೀನ್‌ನ ಪರಿಣಾಮ ಬೀರದಂತೆ ತಡೆಯುತ್ತದೆ. ಹಾಗಾಗಿ ಸನ್‍ಸ್ಕ್ರೀನ್ ಹಚ್ಚುವ ಸರಿಯಾದ ನಿಯಮ ತಿಳಿದುಕೊಳ್ಳಿ. 

ತುಂಬಾ ಕಡಿಮೆ ಸನ್‌ಸ್ಕ್ರೀನ್ ಹಚ್ಚುವುದು: 

ಹೆಚ್ಚಿನ ಜನರು ತಮ್ಮ ಮುಖ ಮತ್ತು ಕುತ್ತಿಗೆಗೆ ಸನ್‌ಸ್ಕ್ರೀನ್ ಹಚ್ಚುತ್ತಾರೆ. ಆದರೆ, ಅವರು ಸನ್‍ಸ್ಕ್ರೀನ್ ಬೇಗ ಖಾಲಿಯಾಗುತ್ತದೆ ಎಂದು ತುಂಬಾ ಕಡಿಮೆ ಹಚ್ಚುತ್ತಾರೆ. ಇದರಿಂದಾಗಿ ಚರ್ಮದ ರಕ್ಷಣೆಗೆ ಬೇಕಾಗುವಷ್ಟು ಪ್ರಮಾಣ ಸಿಗುವುದಿಲ್ಲ . ಅದಕ್ಕಾಗಿಯೇ ಸನ್‌ಸ್ಕ್ರೀನ್ ಸಂಪೂರ್ಣವಾಗಿ ಪರಿಣಾಮ ಬೀರುವುದಿಲ್ಲ. 

ಸನ್‌ಸ್ಕ್ರೀನ್ ಅನ್ನು ಸರಿಯಾದ ರೀತಿಯಲ್ಲಿ ಹಚ್ಚುವುದು 

ನಿಮ್ಮ ಚರ್ಮದ ಮೇಲೆ ಸನ್‌ಸ್ಕ್ರೀನ್ ಹಚ್ಚಲು ಬೆರಳಿನ ನಿಯಮವನ್ನು ಬಳಸಿ. ಎರಡು ಬೆರಳುಗಳ ಉದ್ದಕ್ಕೆ ಸಮಾನವಾದ ಪ್ರಮಾಣದ ಸನ್‌ಸ್ಕ್ರೀನ್ ಅನ್ನು ತೆಗೆದುಕೊಳ್ಳಿ. ನಂತರ, ಅದನ್ನು ನಿಮ್ಮ ಸಂಪೂರ್ಣ ಮುಖ ಮತ್ತು ಕುತ್ತಿಗೆಗೆ ಹಚ್ಚಿ, ನಿಮ್ಮ ಇಡೀ ಮುಖಕ್ಕೆ ಸನ್‍ಸ್ಕ್ರೀನ್ ಹಚ್ಚಲಾಗಿದೆ ಎಂದು ಖಚಿತಪಡಿಸಿಕೊಳ್ಳಿ. 

ಸನ್‌ಸ್ಕ್ರೀನ್ ಅನ್ನು ಒಮ್ಮೆ ಹಚ್ಚುವುದು: 

ಹೆಚ್ಚಿನ ಜನರು ದಿನಕ್ಕೆ ಒಮ್ಮೆ ಮಾತ್ರ ಸನ್‌ಸ್ಕ್ರೀನ್ ಹಚ್ಚುತ್ತಾರೆ. ಆದರೆ ಬೆವರು, ಧೂಳು, ನೀರು ಮತ್ತು ಚರ್ಮದ ಎಣ್ಣೆಗಳು ಕೆಲವೇ ಗಂಟೆಗಳಲ್ಲಿ ಸನ್‌ಸ್ಕ್ರೀನ್ ಸವೆಯಲು ಕಾರಣವಾಗಬಹುದು. ತಜ್ಞರು ಪ್ರತಿ ನಾಲ್ಕರಿಂದ ಐದು ಗಂಟೆಗಳಿಗೊಮ್ಮೆ ಸನ್‌ಸ್ಕ್ರೀನ್ ಅನ್ನು ಮತ್ತೆ ಹಚ್ಚಲು ಶಿಫಾರಸು ಮಾಡುತ್ತಾರೆ. ಇದರಿಂದ ಚರ್ಮವನ್ನು ಸೂರ್ಯ ಹಾನಿಕಾರಕ ಕಿರಣಗಳಿಂದ ರಕ್ಷಿಸಲು ಸಾಧ್ಯ.