ಹೊಲದಲ್ಲಿ ಬಂಗಾರ ಸಿಕ್ಕಿದೆ ಎಂದು ವಂಚನೆ | 35 ಲಕ್ಷ ರೂ.ಗೆ 2 ಕೆಜಿ ನಕಲಿ ಚಿನ್ನ ಮಾರಿದ್ದ ಆರೋಪಿಗಳು ಅಂದರ್‌

CHITRADURGA NEWS | 10 JULY 2025

ಚಿತ್ರದುರ್ಗ: ಹೊಲ ಉಳುಮೆ ಮಾಡುವಾಗ ಬಂಗಾರ ಸಿಕ್ಕಿದೆ. ನಿಮಗೆ ಕಡಿಮೆ ಬೆಲೆಗೆ ಕೊಡುತ್ತೇವೆ ಎಂದು ಬರೋಬ್ಬರಿ 35 ಲಕ್ಷ ರೂ. ವಂಚಿಸಿರುವ ಪ್ರಕರಣ ಕೋಟೆನಾಡಿನಲ್ಲಿ ನಡೆದಿದ್ದು, ಪೊಲೀಸರು ಈ ಜಾಲ ಬೇಧಿಸಿ ಇಬ್ಬರನ್ನು ಬಂದಿಸಿದ್ದಾರೆ.

ಗ್ರಾಮಾಂತರ ಠಾಣೆ ಪೊಲೀಸರು ನಡೆಸಿದ ಕಾರ್ಯಾಚರಣೆಯಲ್ಲಿ ನಕಲಿ ಬಂಗಾರವೆಂದು ಸಾರ್ವಜನಿಕರಿಗೆ ವಂಚನೆ ಮಾಡುತ್ತಿದ್ದ ಜಾಲವನ್ನು ಬೇಧಿಸಿ ಬರೋಬ್ಬರಿ 35 ಲಕ್ಷ ರೂ. ವಂಚನೆ ಪ್ರಕರಣ ಪತ್ತೆ ಮಾಡಿದ್ದಾರೆ.

ಇದನ್ನೂ ಓದಿ: ಸಿಬ್ಬಂದಿ ನೇಮಕಾತಿ ಆಯೋಗ: ವಿವಿಧ ಹುದ್ದೆಗಳಿಗೆ ಅರ್ಜಿ ಆಹ್ವಾನ

ಪೊಲೀಸರ ಕಾರ್ಯಾಚರಣೆಯಲ್ಲಿ ಜಗಳೂರು ತಾಲೂಕು ಕಸ ವನಹಳ್ಳಿ ಕೊರಚಹಟ್ಟಿಯ ರಮೇಶ ಅಲಿಯಾಸ್ ಪರಶುರಾಮ(29) ಹಾಗೂ ಆಂಧ್ರಪ್ರದೇಶದ ಅನಂತಪುರ ಜಿಲ್ಲೆ,ಕಲ್ಯಾಣದುರ್ಗ ತಾಲೂಕು ಶಿವಾಯಿ ಮೂಲದ ಕೂಡ್ಲಿಗಿ ತಾಲೂಕು ಹುರುಳಿಯಾಳ್ ಕೊರಚಹಟ್ಟಿಯ ರಾಮಕೃಷ್ಣ(24)ರನ್ನು ಬಂಧಿಸಲಾಗಿದೆ.

ಜಮೀನು ಉಳುಮೆ ಮಾಡುವಾಗ ಬಂಗಾರದ ನಾಣ್ಯಗಳು ಸಿಕ್ಕಿದ್ದು, ಕಡಿಮೆ ಬೆಲೆಗೆ ಮಾರಾಟ ಮಾಡುತ್ತಿದ್ದೇವೆ ಎಂದು ಸಾರ್ವಜನಿಕರನ್ನು ನಂಬಿಸಿ ವಂಚಿಸುತ್ತಿದ್ದ ಈ ಜಾಲ ಬೇಧಿಸಲು ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ರಂಜಿತ್‌ ಕುಮಾರ್‌ ಬಂಡಾರು ತಂಡ ರಚಿಸಿದ್ದರು.

ಇದನ್ನೂ ಓದಿ: ಎಸ್.ನಿಜಲಿಂಗಪ್ಪ ನಿವಾಸ ನವೀಕರಣಕ್ಕೆ ಸಚಿವ ಶಿವರಾಜ ತಂಗಡಗಿ ಸೂಚನೆ

ಈ ತಂಡದ ಕಾರ್ಯಾಚರಣೆ ವೇಳೆ ಜು.6 ರಂದು ಗುಡ್ಡದರಂಗವ್ವನಹಳ್ಳಿ ಸ್ನಾತಕೋತ್ತರ ಅಧ್ಯಯನ ಕೇಂದ್ರದ ಬಳಿ ಅನುಮಾನಾಸ್ಪದವಾಗಿ ತಿರುಗಾಡುತ್ತಿದ್ದ ವ್ಯಕ್ತಿಯನ್ನು ಹಿಡಿದು ವಿಚಾರಣೆ ನಡೆಸಿದಾಗ ಈ ವಿಚಾರ ಬೆಳಕಿಗೆ ಬಂದಿದೆ.

 ಶುದ್ಧ ಬಂಗಾರದ ನಾಣ್ಯಗಳೆಂದು ತಮಿಳುನಾಡಿನ ಕೆ.ಪಾಂಡಿ ಎಂಬುವರನ್ನು ಅವರಿಗೆ ಅಂದಾಜು 2 ಕೆಜಿ ನಕಲಿ ಬಂಗಾರದ ನಾಣ್ಯಗಳನ್ನು ಕೊಟ್ಟು 35 ಲಕ್ಷ ರೂ.ಪಡೆದು ವಂಚಿಸಿದ್ದರು. ಸದ್ಯ ಬಂದಿತ ಆರೋಪಿಗಳಿಂದ 22 ಲಕ್ಷ ರೂ.ನಗದು ವಶಪಡಿಸಿಕೊಂಡು ಅವರನ್ನು ನ್ಯಾಯಾಲಯಕ್ಕೆ ಹಾಜರು ಪಡಿಸಲಾಗಿದೆ. 

ಪ್ರಕರಣದಲ್ಲಿರುವ ಇನ್ನಿತರ ಆರೋಪಿಗಳನ್ನು ಹಾಗೂ ಉಳಿದ ಹಣವನ್ನು ಶೀಘ್ರ ವಶಕ್ಕೆ ಪಡೆಯಲಾಗುವುದು ಎಂದು ಎಸ್‌ಪಿ ರಂಜಿತ್‌ಕುಮಾರ್ ಬಂಡಾರು ತಿಳಿಸಿದ್ದಾರೆ.

ಇದನ್ನೂ ಓದಿ: ಕರ್ತವ್ಯ ಲೋಪ ಇಬ್ಬರು ಪಿಡಿಓಗಳು ಅಮಾನತು | ಜಿಪಂ ಸಿಇಓ ಆದೇಶ

ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ರಂಜಿತ್‌ ಕುಮಾರ್‌ ಬಂಡಾರು, ಪ್ರಭಾರ ಹೆಚ್ಚುವರಿ ಪೊಲೀಸ್‌ ಅಧೀಕ್ಷಕ ಉಮೇಶ್‌ ಈಶ್ವರ ನಾಯ್ಕ್‌, ಡಿವೈಎಸ್‌ಪಿ ಕೆ.ಪಿ.ದಿನಕರ್‌ ಮಾರ್ಗದರ್ಶನದಲ್ಲಿ ನಡೆದ ಈ ಕಾರ್ಯಚರಣೆಯ ನೇತೃತ್ವವನ್ನು ಗ್ರಾಮಾಂತರ ಠಾಣೆ ಸಿಪಿಐ ವೈ.ಮುದ್ದುರಾಜ್ ವಹಿಸಿದ್ದರು.

ಕಾರ್ಯಾಚರಣೆ ತಂಡದಲ್ಲಿ ಪಿಎಸ್‌ಐ ಸುರೇಶ್, ಸಿಬ್ಬಂದಿಗಳಾದ ರಂಗನಾಥ್‌ ಕುಮಾರ್‌, ಉಮೇಶ್‌, ತಿಮ್ಮಪ್ಪ, ರಾಜು ಮೂಡಬಾಗಿಲು, ರಮೇಶ್‌, ಎಸ್‌.ವೀರಭದ್ರಪ್ಪ, ಪವನ್‌ ವಿ, ವೆಂಕಟೇಶ್‌ ತಂಡ ಗುಪ್ತವಾಗಿ ಮಾಹಿತಿ ಸಂಗ್ರಹಿಸಿ ಈ ಜಾಲ ಪತ್ತೆ ಮಾಡಿದೆ.

ಇದನ್ನೂ ಓದಿ: ಎಸ್.ನಿಜಲಿಂಗಪ್ಪ ನಿವಾಸ ನವೀಕರಣಕ್ಕೆ ಸಚಿವ ಶಿವರಾಜ ತಂಗಡಗಿ ಸೂಚನೆ

ಸದರಿ ತಂಡದ ಕಾರ್ಯವನ್ನು ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ರಂಜಿತ್‌ ಕುಮಾರ್‌ ಬಂಡಾರು ಶ್ಲಾಘಿಸಿದ್ದಾರೆ.