ಸಾಹಿತ್ಯ ಸಮ್ಮೇಳನಕ್ಕೆ ಮಹಿಳಾ ಸಾಹಿತಿಗಳು ಅಧ್ಯಕ್ಷರಾಗಲಿ | ನೇಮಿಚಂದ್ರ, ಸಂಧ್ಯಾರೆಡ್ಡಿ ಪರಿಗಣನೆಗೆ ಒತ್ತಾಯ

CHITRADURGA NEWS | 27 January 2026

ಚಿತ್ರದುರ್ಗ: ಚಿತ್ರದುರ್ಗದಲ್ಲಿ ನಡೆಯಲಿರುವ 19ನೇ ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನಕ್ಕೆ ಮಹಿಳೆಯರನ್ನು ಸಮ್ಮೇಳನಾಧ್ಯಕ್ಷರನ್ನಾಗಿ ಆಯ್ಕೆ ಮಾಡಬೇಕು ಎಂದು ಅನ್ನದ ಭಾಷೆ ಕನ್ನಡ ವೇದಿಕೆ ಒತ್ತಾಯಿಸಿದೆ.

ಇದನ್ನೂ ಓದಿ: ನಾಯಕನಹಟ್ಟಿ ಜಾತ್ರೆಗೆ ಡೇಟ್ ಫಿಕ್ಸ್ | ಸಚಿವ ಸುಧಾಕರ್ ನೇತೃತ್ವದಲ್ಲಿ ಪೂರ್ವಭಾವಿ ಸಭೆ

ಪತ್ರಿಕಾ ಭವನದಲ್ಲಿ ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ವೇದಿಕೆಯ ಡಾ.ಸಂಗೇನಹಳ್ಳಿ ಅಶೋಕ್ ಕುಮಾರ್ ಮಾತನಾಡುತ್ತಾ, ಕನ್ನಡ ಸಾಹಿತ್ಯ ಸಮ್ಮೇಳನಕ್ಕೆ ಮಹಿಳೆಯರನ್ನು ಅಧ್ಯಕ್ಷರನ್ನಾಗಿ ಮಾಡುವಲ್ಲಿ ಪರಿಷತ್ ಕುರುಡು ಪ್ರದರ್ಶಿಸುತ್ತಿದೆ ಎಂದರು.

ಚಿತ್ರದುರ್ಗದಲ್ಲಿ ಮಹಿಳಾ ಸಾಹಿತಿಗಳಿಗೆ ಸಿಗಬೇಕಾದ ಗೌರವ ಸಿಕ್ಕಿಲ್ಲ. ಜಾನಪದ ಖನಿ ಸಿರಿಯಜ್ಜಿ ಅವರಿಂದಲೂ ಸದಾ ನಿರಾಕರಣೆ ಬಂದಿದೆ. ಈ ದೃಷ್ಟಿದೋಷದಿಂದ ಪರಿಷತ್ ಹೊರಬರಬೇಕಾಗಿದೆ ಎಂದು ಒತ್ತಾಯಿಸಿದರು.

ಚಿತ್ರದುರ್ಗ ಜಿಲ್ಲೆಯ ಜನಿಸಿದ ಖ್ಯಾತ ಲೇಖಕಿ ನೇಮಿಚಂದ್ರ ಅವರು ಯಾದ್ ವಶೇಮ್ ಸೇರಿದಂತೆ ಹಲವು ಕೃತಿಗಳನ್ನು ರಚಿಸಿದ್ದಾರೆ. ವಿಜ್ಞಾನ,‌ ಸಂಶೋಧನೆ ಸೇರಿದಂತೆ‌ ಸಾಹಿತ್ಯ, ಸಂಶೋಧನಾ ಕ್ಷೇತ್ರಕ್ಕೆ ಅವರು ಕೊಟ್ಟಿರುವ ಕೊಡುಗೆ ಅಪಾರ. ಈ ಹಿನ್ನೆಲೆಯಲ್ಲಿ ನೇಮಿಚಂದ್ರ ಅವರನ್ನು ಸಮ್ಮೇಳನಾಧ್ಯಕ್ಷರಾಗಿ ಆಯ್ಕೆ ಮಾಡಬೇಕು ಎಂದರು.

ಇದನ್ನೂ ಓದಿ: ನಿಮ್ಮ ಕಾಲುಗಳಲ್ಲಿ ಸ್ನಾಯು ಸೆಳೆತವಿದ್ದರೆ ಈ ಯೋಗಾಸನಗಳನ್ನು ಮಾಡಿ

ಇದೇ ವೇಳೆ, ಡಾ.ಸಂಧ್ಯಾರೆಡ್ಡಿ ಅವರು ಜಿಲ್ಲೆಯ ಮಹತ್ವದ ಲೇಖಕಿಯಾಗಿದ್ದು, ಬರ್ಕ್ ವೈಟ್ ಕಂಡ ಭಾರತ ಅನುವಾದ ಕೃತಿ ಜನಪ್ರಿಯವಾಗಿದೆ. ಮುಲ್ಕಾ ಗೋವಿಂದರೆಡ್ಡಿ ಅವರ ಕುರಿತ ಪ್ರಿಯಬಂಧು ಕೃತಿ, ಮೊದಲ ಮುಖ್ಯಮಂತ್ರಿ ಕೆ.ಸಿ.ರೆಡ್ಡಿ ಕುರಿತ ಪ್ರತಿಭಾವಂತ ಸಂಸದೀಯ ಪುಟಗಳು ಕೃತಿಯನ್ನು ವಿಧಾನಸಭೆ ಸಚಿವಾಲಯ ಪ್ರಕಟಿಸಿದೆ.

ಕರ್ನಾಟಕ ಲೇಖಕಿಯರ ಸಂಘದ ಅಧ್ಯಕ್ಷರಾಗಿ ಕೆಲಸ ಮಾಡಿದ್ದಾರೆ. ಈ ಇಬ್ಬರಲ್ಲಿ ಒಬ್ಬರನ್ನು ಸಮ್ಮೇಳನಾಧ್ಯಕ್ಷರಾಗಿ ಆಯ್ಕೆ ಮಾಡಬೇಕು ಎಂದು ಒತ್ತಾಯಿಸಿದರು.

ಸುದ್ದಿಗೋಷ್ಠಿಯಲ್ಲಿ ಪತ್ರಕರ್ತರ ಸಂಘದ ಜಿಲ್ಲಾಧ್ಯಕ್ಷ ವಿನಾಯಕ ತೊಡರನಾಳು ಇದ್ದರು.

ಮಹಿಳೆ ಎನ್ನುವ ಕಾರಣಕ್ಕೆ ಮಾತ್ರವಲ್ಲ, ಅವರ ಸಾಧನೆ, ಪ್ರತಿಭೆ ಗುರುತಿಸಿ ಮಹಿಳೆಗೆ ಸಮ್ಮೇಳಾನಾಧ್ಯಕ್ಷರನ್ನಾಗಿ ಮಾಡಬೇಕು.

–ಸುಜಾತಾ, ಅಖಿಲ ಭಾರತ ಮಹಿಳಾ ಸಂಸ್ಕೃತಿಕ ಸಂಘಟನೆ, ಜಿಲ್ಲಾ ಸಂಚಾಲಕಿ.

ಕಳೆದ ಹದಿನೆಂಟು ವರ್ಷಗಳಿಂದ ಕನ್ನಡ ಸಾಹಿತ್ಯ ಪರಿಷತ್ ಜಿಲ್ಲೆಯಲ್ಲಿ ಮಹಿಳೆಯನ್ನು ಗುರುತಿಸುವ ಕೆಲಸ ಮಾಡಿಲ್ಲ. ಶೇ.50 ರಷ್ಟು ಮಹಿಳೆಯರಿದ್ದರೂ ಈವರೆಗೆ ಸಮ್ಮೇಳನಾಧ್ಯಕ್ಷರಾಗಿ ಮಾಡಬೇಕು.

-ಜೆ.ಯಾದವರೆಡ್ಡಿ, ನಿವೃತ್ತ ಪ್ರಾಚಾರ್ಯ.

ಸಮ್ಮೆಳನಾಧ್ಯಕ್ಷ ಸ್ಥಾನಕ್ಕೆ ಲಾಬಿಗಳು ನಡೆಯುತ್ತಿವೆ. ನಾಡೋಜ ಗೌರವ ಸ್ವೀಕರಿಸಿದ ಸಿರಿಯಜ್ಜಿಯನ್ನೂ ಸಮ್ಮೇಳನಾಧ್ಯಕ್ಷರನ್ನು ಮಾಡಲಿಲ್ಲ. ಈಗಾದರೂ ಓಬವ್ವನ ನಾಡಿನಲ್ಲಿ ಮಹಿಳೆಗೆ ಮನ್ನಣೆ ಸಿಗಲಿ.

–ಚಿಕ್ಕಪ್ಪನಹಳ್ಳಿ ಷಣ್ಮುಖಪ್ಪ. ಹಿರಿಯ ಪತ್ರಕರ್ತರು.

ನೇಮಿಚಂದ್ರ, ಸಂಧ್ಯಾರೆಡ್ಡಿ ರಾಜ್ಯಮಟ್ಟದ ಸಮ್ಮೇಳನಾಧ್ಯಕ್ಷರಾಗುವ ಅರ್ಹತೆ ಹೊಂದಿರುವವರು.‌ ಆದರೆ ಪರಿಷತ್ ನಲ್ಲಿ ಜಿಲ್ಲಾ ಮಟ್ಟದಲ್ಲಿ ಆಗಿಲ್ಲ ಎನ್ನುವ ಚರ್ಚೆಗಳು ಬರುತ್ತವೆ.‌ ಹೀಗಾಗಿ ಜಿಲ್ಲೆಯಿಂದ ಗುರುತಿಸುವುದು ಬಹಳ ಮುಖ್ಯ.

–ಶ.ಮಂಜುನಾಥ್, ಸುದ್ದಿಗಿಡುಗ ಸಂಪಾದಕರು.