ಚಿತ್ರದುರ್ಗ ಕೋಟೆ ರಸ್ತೆಯಲ್ಲಿ ಸರಣಿ‌‌ ಅಪಘಾತ | ಶಾಲಾ ಮಕ್ಕಳಿದ್ದ ಬಸ್ ಬ್ರೇಕ್ ಫೇಲ್ | ಹೊಸ ವರ್ಷದ ದಿನ ತಪ್ಪಿದ ಭಾರೀ‌ ಅನಾಹುತ

ಚಿತ್ರದುರ್ಗ ನ್ಯೂಸ್‌.ಕಾಂ

ಹೊಸ ವರ್ಷದ ಮೊದಲ ದಿನವೇ ಚಿತ್ರದುರ್ಗದಲ್ಲಿ ಶಾಲಾ ಮಕ್ಕಳಿದ್ದ ಬಸ್‌ನ ಬ್ರೇಕ್‌ ಫೇಲ್‌ ಆಗಿ ಸರಣಿ ಅಪಘಾತ ಸಂಭವಿಸಿದೆ. ಸಂಭ್ರಮದಲ್ಲಿ ವಾತವಾರಣದಲ್ಲಿ ಆತಂಕದ ಛಾಯೆ ಆವರಿಸಿದೆ.

ನಗರದ ಐತಿಹಾಸಿಕ ಏಳುಕೋಟೆ ರಸ್ತೆಯಲ್ಲಿ ಬಸ್ಸು, ಟ್ರ್ಯಾಕ್ಟರ್‌, ಕಾರು, ಹಾಗೂ ಬೈಕ್‌ ನಡುವೆ ಸೋಮವಾರ ಮಧ್ಯಾಹ್ನ ಸರಣಿ ಅಪಘಾತ ಸಂಭವಿಸಿದೆ. ಅದೃಷ್ಟವಶಾತ್‌ ಯಾವುದೇ ಪ್ರಾಣಾಪಾಯ ಸಂಭಿವಿಸಿಲ್ಲ. ಕೆಲವರಿಗೆ ಸಣ್ಣ ಪುಟ್ಟ ಗಾಯಗಳಾಗಿವೆ.

ಇದನ್ನೂ ಓದಿ: ವಿರೋಧ ಮಾಡಿದವರು ಕಾಂಗ್ರೆಸ್ ಕಾರ್ಯಕರ್ತರಲ್ಲ; ಬಿ.ಎನ್.ಚಂದ್ರಪ್ಪ

ಹೊಸ ವರ್ಷದ ಹಿನ್ನೆಲೆಯಲ್ಲಿ ಕೋಟೆ ರಸ್ತೆಯಲ್ಲಿ ಸಾವಿರಾರು ಪ್ರವಾಸಿಗರು ಓಡಾಡುತ್ತಿರುವಾಗಲೇ ಈ ಅಪಘಾತ ನಡೆದಿದೆ. ಕೋಟೆ‌ ಕಡೆಯಿಂದ ಉಚ್ಚಂಗಿ ಎಲ್ಲಮ್ಮ ದೇವಸ್ಥಾನದ ಕಡೆಗೆ ಬರುವ ಮಾರ್ಗದಲ್ಲಿ ಏಕನಾಥೇಶ್ವರಿ ಪಾದಗುಡಿ ಸಮೀಪದ ನಗರಸಭೆ ಸದಸ್ಯ ಚಂದ್ರಶೇಖರ್‌ ಮನೆ ಬಳಿ ಅವಘಡ ಸಂಭವಿಸಿದೆ.

ಇದನ್ನೂ ಓದಿ: ಚಿತ್ರದುರ್ಗ ಲೋಕಸಭಾ ಕ್ಷೇತ್ರಕ್ಕೆ ಅಭ್ಯರ್ಥಿ ಮುಖ್ಯವಲ್ಲ; ಮಾಜಿ ಸಂಸದ ಬಿ.ಎನ್‌.ಚಂದ್ರಪ್ಪ

ಕೋಟೆ ಕಡೆಯಿಂದ ಇಳಿಜಾರು ರಸ್ತೆಯಲ್ಲಿ ಬರುತ್ತಿದ್ದ ಖಾಸಗಿ ಬಸ್ಸಿನ ಬ್ರೇಕ್ ವಿಫಲವಾಗಿ ಮುಂದಿದ್ದ ಟ್ರ್ಯಾಕ್ಟರ್ ಗೆ ಡಿಕ್ಕಿಯಾಗಿದೆ. ಇದರಿಂದ ಟ್ರ್ಯಾಕ್ಟರ್‌ ಕೆಳಗೆ ಬೈಕ್ ಬಿದ್ದಿದೆ. ಅನಂತರ ಟ್ರ್ಯಾಕ್ಟರ್‌ ಮುಂದಿನ ಎರಡು ಕಾರುಗಳಿಗೆ ಡಿಕ್ಕಿಯಾಗಿದೆ ಎಂದು ಸ್ಥಳದಲ್ಲಿದ್ದ ಸಾರ್ವಜನಿಕರು ಮಾಹಿತಿ ನೀಡಿದ್ದಾರೆ.

ಇದನ್ನೂ ಓದಿ: ಬದಲಾಯ್ತು ಶೌಚಾಲಯದ ಚಿತ್ರಣ; ಗೋಡೆಗಳ ಮೇಲೆ ವರ್ಣಚಿತ್ರದ ಆಕರ್ಷಣೆ

ಬಸ್ಸಿನ ಚಾಲಕ ಬ್ರೇಕ್‌ ಫೇಲ್ ಆಗಿದೆ ಎಂದು ಕೂಗಿಕೊಂಡು ಬರುತ್ತಿದ್ದ ಎನ್ನಲಾಗಿದೆ. ಬಸ್ಸು ಶಾಲಾ‌ ಮಕ್ಕಳನ್ನು ಪ್ರವಾಸಕ್ಕೆ ಕರೆತಂದಿತ್ತು ಎನ್ನಲಾಗಿದ್ದು, ಕೆಲ ಮಕ್ಕಳಿಗೆ ಸಣ್ಣ ಪುಟ್ಟ ಗಾಯಗಳಾಗಿವೆ ಎನ್ನುವ ಮಾಹಿತಿಯಿದೆ.

ಸ್ಥಳಕ್ಕೆ ಸಂಚಾರ ಠಾಣೆ ಪೊಲೀಸರು ಆಗಮಿಸಿದ್ದು ಪರಿಶೀಲನೆ ನಡೆಸಿದ್ದಾರೆ.