ಭದ್ರಾ ಕಾಲುವೆಗೆ ಹಾನಿ | ದೂರು ದಾಖಲು

CHITRADURGA NEWS | 17 SEPTEMBER 2026

ಚಿತ್ರದುರ್ಗ: ಭದ್ರಾ ಮೇಲ್ದಂಡೆ ಯೋಜನೆಯಡಿ ಜಿಲ್ಲೆಗೆ ಪ್ರಾಯೋಗಿಕವಾಗಿ ನೀರು ಹರಿಯುತ್ತಿದೆ. ಭದ್ರೆ ನೀರು ಗೋನೂರು ಕೆರೆ ಭರ್ತಿಯಾಗಿ ನೀರು ಮುಂದಕ್ಕೆ ಹರಿದಿದೆ.

ಇದನ್ನೂ ಓದಿ: ಜಿಲ್ಲೆಯ ಎಲ್ಲಾ ಆರು ತಾಲ್ಲೂಕುಗಳೂ ಬರಪೀಡಿತ ಪಟ್ಟಿಗೆ | ಸಚಿವ ಟಿ.ರಘುಮೂರ್ತಿ

ಆದರೆ, ಈ ಹಂತದಲ್ಲೇ ರೈತರು ನೀರಿಗಾಗಿ ಪೈಪೋಟಿ ನಡೆಸುತ್ತಿದ್ದು, ತಮ್ಮ ಊರುಗಳ ಕೆರೆ, ಕಟ್ಟೆ, ಹಳ್ಳಿಗಳಿಗೆ ನೀರು ಹರಿಸಿಕೊಳ್ಳಲು ಯೋಜನೆಯ ಅಧಿಕಾರಿಗಳ ಗಮನಕ್ಕೆ ಬಾರದಂತೆ ಕಾಲುವೆ ಹೊಡೆದು ನೀರು ಹರಿಸಿದಂತಹ ಘಟನೆಗಳು ವರದಿಯಾಗುತ್ತಿವೆ.

ಹೊಸದುರ್ಗ-ಹಿರಿಯೂರು ಗಡಿ ಭಾಗ ಲಕ್ಕಿಹಳ್ಳಿ ಫಾರೆಸ್ಟ್‌ ಬಳಿ ಕಾಲುವೆ ಹೊಡೆದು ಗುರುವಾರ ಹಳ್ಳಕ್ಕೆ ನೀರು ಬಿಟ್ಟ ವೀಡಿಯೋ ಹರಿದಾಡಿದ್ದು, ಸುಮಾರು 40-50 ಕ್ಯೂಸೆಕ್‌ ನೀರು ಹೊಡೆದ ಕಾಲುವೆಯಿಂದ ಹಳ್ಳಕ್ಕೆ ಹರಿಯುತ್ತಿತ್ತು.

ಸ್ಥಳಕ್ಕೆ ಧಾವಿಸಿದ ಭದ್ರಾ ಮೇಲ್ದಂಡೆ ಯೋಜನೆ ಅಧಿಕಾರಿಗಳು, ತಕ್ಷಣ ಹೊಡೆದ ನಾಲೆ ದುರಸ್ಥಿ ಮಾಡಿ ಸರಾಗವಾಗಿ ನೀರು ಹರಿಯುವಂತೆ ಮಾಡಿದ್ದಾರೆ.

ಇದನ್ನೂ ಓದಿ: ರೈಲು ಸಂಚಾರದಲ್ಲಿ ಬದಲಾವಣೆ | ನೇರ ರೈಲು ಮಾರ್ಗದ ಕಾಮಗಾರಿ ಹಿನ್ನೆಲೆ

ಇನ್ನೂ ನಾಲೆಯನ್ನೇ ಹೊಡೆದಿರುವ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿ, ಹೊಸದುರ್ಗ ಉಪವಿಭಾಗ ವ್ಯಾಪ್ತಿಯಲ್ಲಿ ಕಿಡಿಗೇಡಿಗಳ ವಿರುದ್ಧ ದೂರು ದಾಖಲಿಸಿರುವುದಾಗಿ ಭದ್ರಾ ಮೇಲ್ದಂಡೆ ಯೋಜನೆ ಅಧಿಕಾರಿಗಳು ತಿಳಿಸಿದ್ದಾರೆ.