ಜುಲೈ 27 ರಿಂದ ವಿವಿ ಸಾಗರಕ್ಕೆ ಭದ್ರಾ ನೀರು | ವೇದಾವತಿ ಮೂಲಕ ಹರಿಯುವಳು ಭದ್ರೆ

CHITRADURGA NEWS | 23 JULY 2025

ಚಿತ್ರದುರ್ಗ: ರಾಜ್ಯದ ಜಲಾಶಯಗಳೆಲ್ಲಾ ಭರ್ತಿಯಾಗಿರುವಾಗ ಈವರೆಗೆ ಒಂದು ಹನಿ ಕೂಡಾ ನೀರು ಹರಿಯದ ಜಲಾಶಯಗಳ ಪೈಕಿ ಮಧ್ಯ ಕರ್ನಾಟಕದ ವಾಣಿವಿಲಾಸ ಸಾಗರ ಸೇರಿದೆ.

ಈಗ ಭದ್ರಾ ಜಲಾಶಯದಿಂದ ವಾಣಿವಿಲಾಸ ಸಾಗರಕ್ಕೆ ನೀರು ಹರಿಸಲು ದಿನಾಂಕ ನಿಗಧಿ ಮಾಡಿದ್ದು, ಬಯಲು ಸೀಮೆ ಜನರಿಗೆ ಜೀವ ಬಂದಂತಾಗಿದೆ.

ಇದನ್ನೂ ಓದಿ: ಭದ್ರಾ ಜಲಾಶಯದಿಂದ ವಿವಿ ಸಾಗರಕ್ಕೆ ನೀರು ಹರಿಸಲು ಅನುಮತಿ | 4.21 TMC ನೀರೆತ್ತಲು ಅವಕಾಶ

ಜುಲೈ 27 ರಿಂದ ವಾಣಿವಿಲಾಸ ಸಾಗರ(ವಿವಿ ಸಾಗರ)ಕ್ಕೆ ನೀರು ಹರಿಸಲು ದಿನಾಂಕ ನಿಗಧಿ ಮಾಡಲಾಗಿದೆ. ಜುಲೈ 27 ರಿಂದ ನಾಲ್ಕು ತಿಂಗಳ ಕಾಲ ನೀರು ಹರಿದು ಬರಲಿದೆ.

ಭದ್ರಾ ಮೇಲ್ದಂಡೆ ಮುಖ್ಯ ಕಾಲುವೆ ಮೂಲಕ ವೇದಾವತಿ ನದಿ ಸೇರುವ ಹಳ್ಳಗಳ ಮೂಲಕ ನೀರು ಹರಿದು ತರೀಕೆರೆ, ಕಡೂರು, ಹೊಸದುರ್ಗ ತಾಲೂಕುಗಳ ಮೂಲಕ ಭದ್ರೆ ವಿವಿ ಸಾಗರದ ಒಡಲು ಸೇರಲಿದ್ದಾಳೆ.

ಇದನ್ನೂ ಓದಿ: ಗಿಲಿಕೇನಹಳ್ಳಿ ಅಜ್ಜಯ್ಯ ಆತ್ಮಹತ್ಯೆ ಪ್ರಕರಣ | ಎಸ್‌ಪಿ ರಂಜಿತ್‌ಕುಮಾರ್‌ ಬಂಡಾರು ಹೇಳಿಕೆ

ಭದ್ರಾ ಜಲಾಶಯದಿಂದ ಹರಿದು ಬರುವ ತಾಯಿ ಭದ್ರೆ, ಅಪ್ಪರ್‌ ಭದ್ರಾ ಮುಖ್ಯ ಕಾಲುವೆಯಿಂದ ಚಿಕ್ಕಮಗಳೂರು ಜಿಲ್ಲೆ ತರೀಕೆರೆ ತಾಲೂಕು ಲಕ್ಕವಳ್ಳಿ, ಲಿಂಗದಹಳ್ಳಿ, ತರೀಕೆರೆ ಕಸಬಾ, ಅಮೃತಾಪುರ, ಅಜ್ಜಂಪುರ ವ್ಯಾಪ್ತಿಯಲ್ಲಿ ಹಾದು ಬರಲಿದ್ದಾಳೆ.

ಇಲ್ಲಿಂದ ಶಾಂತಿಪುರ ಪಂಪ್‌ಹೌಸ್‌-1, ಜಂಬದಹಳ್ಳ ಮೇಲ್ಗಾಲುವೆ, ಬೆಟ್ಟದ ತಾವರೆಕೆರೆ ಪಂಪ್‌ಹೌಸ್‌-2, ಹೆಬ್ಬೂರು ವೈ ಜಂಕ್ಷನ್‌ ಮೂಲಕ ನೀರು ಸಾಗಿ, ಕಾಟಿನಗೆರೆ, ಬೆಣಕುಣಸೆ, ಮುಗುಳಿ, ಬೇಗೂರು, ಅಸಂದಿ, ಹಡಗಲು, ಕಲ್ಕೆರೆ, ಎಚ್‌.ತಿಮ್ಮಾಪುರ, ಕಲ್ಲಹಳ್ಳಿ, ಚಿಕ್ಕಬಳ್ಳೆಕೆರೆ, ಹನುಮನಹಳ್ಳಿ, ಚೌಳಹಿರಿಯೂರು, ಹಿ.ತಿಮ್ಮಾಪುರ ಮೂಲಕ ಹರಿದು ವೇದಾವತಿಯ ಒಡಲು ಸೇರುವಳು ಭದ್ರೆ.

ನಾಲ್ಕು ತಿಂಗಳಲ್ಲಿ ನಾಲ್ಕುವರೆ ಟಿಎಂಸಿ ನೀರು:

ಭದ್ರಾ ಜಲಾಶಯದಿಂದ ಚಿತ್ರದುರ್ಗ ಜಿಲ್ಲೆಗೆ ಮುಂದಿನ ನಾಲ್ಕು ತಿಂಗಳ ಕಾಲ 4.25 ಟಿಎಂಸಿ ನೀರು ಹರಿದು ಬರಲಿದೆ.ಇದರಲ್ಲಿ ವಾಣಿವಿಲಾಸ ಸಾಗರಕ್ಕೆ 2 ಟಿಎಂಸಿ ನೀರು ಸೇರಲಿದ್ದು, ಉಳಿದಂತೆ ಪ್ಯಾಕೇಜ್‌ 1 ರ ಕೆರೆಗಳಿಗೆ, ತರೀಕೆರೆ, ಕಡೂರು ಭಾಗದ ನೀರಾವರಿ ಯೋಜನೆಗಳಿಗೆ ಸೇರಿ ನಾಲ್ಕುವರೆ ಟಿಎಂಸಿ ನೀರು ಹರಿಯಲಿದೆ.