ಅಪ್ರಾಪ್ತ ಬಾಲಕ ಸ್ಕೂಟಿ ಚಲಾಯಿಸಿ ಅಪಘಾತ | ಸ್ಕೂಟಿ ಮಾಲಿಕನಿಗೆ ಶಿಕ್ಷೆ ವಿಧಿಸಿದ ನ್ಯಾಯಾಲಯ

CHITRADURGA NEWS | 30 July 2026

ಚಿತ್ರದುರ್ಗ: ಅಪ್ರಾಪ್ತ ವಯಸ್ಸಿನ ಬಾಲಕ ಸ್ಕೂಟಿ‌ ಚಲಾಯಿಸಿ ಮಾಡಿದ್ದ ಅಪಘಾತಕ್ಕೆ ವಾಹನದ ಮಾಲಿಕನಿಗೆ ನ್ಯಾಯಾಲಯ ಒಂದು ದಿನ ಕಲಾಪ ಮುಗಿಯುವವರೆಗೆ ಕಾಯುವ ಶಿಕ್ಷೆ ಹಾಗೂ ದಂಡ ವಿಧಿಸಿದೆ.

ಇದನ್ನೂ ಓದಿ: ಚಿತ್ರದುರ್ಗ ಜಿಲ್ಲೆಯನ್ನು ಮೊದಲ ಆದ್ಯತೆಯಲ್ಲಿ ಬರ ಘೋಷಿಸಿ | ಆರ್‌.ಅಶೋಕ್‌

ಚಾಲನಾ ಪರವಾನಿಗೆ ಇಲ್ಲದ ಅಪ್ರಾಪ್ತ ಬಾಲಕನಿಗೆ ವಿಮೆ ಇಲ್ಲದ ಸ್ಕೂಟಿ‌ ನೀಡಿದ್ದು ತನಿಖೆಯಲ್ಲಿ ದೃಢಪಟ್ಟಿದೆ. 2024 ನವೆಮಬರ್ 24 ರಂದು ಚಿತ್ರದುರ್ಗ ನಗರದ ವಾಸಿ ಆರೋಪಿ ವಿಜಯ ಭಾಸ್ಕರ್ ಎಂಬುವವರು ಅಪ್ರಾಪ್ತ ಬಾಲಕನಿಗ ಮೋಟಾರ್‌ ದ್ವಿಚಕ್ರ ವಾಹನ ಚಲಾಯಿಸಲು ಕೊಟ್ಟಿದ್ದರು.

ತನ್ನ ಜೊತೆಗೆ ಇಬ್ಬರನ್ನು‌ ಬಾಲಕರನ್ನು ಕೂರಿಸಿಕೊಂಡಿದ್ದ ಅಪ್ರಾಪ್ತ ಬಾಲಕ, ಉಪಾಧ್ಯ ಹೋಟೆಲ್ ಬಳಿ ಆಟೋಗಾಗಿ ಕಾಯುತ್ತಿದ್ದ ಗುರುಮೂರ್ತಿ ಎಂಬುವವರಿಗೆ ಡಿಕ್ಕಿ ಹೊಡೆದಿದ್ದರು. ಅಪಘಾತದ ರಭಸಕ್ಕೆ ಗುರುಮೂರ್ತಿಗೆ ತೀವ್ರ ಸ್ವರೂಪದ ಗಾಯಗಳಾಗಿದ್ದು, ಸಂಚಾರಿ ಠಾಣೆಯಲ್ಲಿ‌ ದೂರು ದಾಖಲಾಗಿತ್ತು.

ಸಂಚಾರಿ ಪೊಲೀಸ್ ಠಾಣೆ ಎಚ್‌ಸಿ ಎಸ್.ಬಿ.ಸ್ವಾಮಿ ತನಿಖೆ ನಡೆಸಿ ನ್ಯಾಯಾಲಯಕ್ಕೆ ದೋಷಾರೋಪಣಾ ಪಟ್ಟಿ ಸಲ್ಲಿಸಿದ್ದರು.

ಇದನ್ನೂ ಓದಿ: ಹಿರಿಯೂರು ಉಪಚುನಾವಣೆ | ಕಾಂಗ್ರೆಸ್‌ ಆಕಾಂಕ್ಷಿಗಳಿಂದ ಅರ್ಜಿ ಆಹ್ವಾನಿಸಿದ ಕೆಪಿಸಿಸಿ

ವಿಚಾರಣೆ ನಡೆಸಿದ ನ್ಯಾಯಾಧೀಶರಾದ ಡಿ.ಮಮತಾ ಅವರು, ಅಪರಾಧಿ ವಿಜಯಭಾಸ್ಕರ್‌ಗೆ ಒಂದು ದಿನ ಕಲಾಪ ಮುಗಿಯುವವರೆಗೆ ನ್ಯಾಯಾಲಯದಲ್ಲಿ ಕುಳಿತುಕೊಳ್ಳುವ ಹಾಗೂ 30 ಸಾವಿರ‌ ದಂಡ ವಿಧಿಸಿದ್ದು, ದಂಡ ಪಾವತಿಸಲು ತಪ್ಪಿದಲ್ಲಿ 60 ದಿನಗಳ ಸಾಧಾರಣ ಕಾರಾಗೃಹ ಶಿಕ್ಷೆ ವಿಧಿಸಿ ತೀರ್ಪು ನೀಡಿದ್ದರು.

ಸರ್ಕಾರದ ಪರವಾಗಿ ಹಿರಿಯ ಸಹಾಯಕ ಸರ್ಕಾರಿ ಅಭಿಯೋಜಕ ಸಿ.ಮಂಜುನಾಥ್ ವಾದ ಮಂಡಿಸಿದ್ದರು.