ಜಿ.ಎಸ್. ಉಜ್ಜನಪ್ಪ ನಿರಂತರ ಚಟುವಟಿಕೆಯ ಚೇತನ | ಪ್ರೊ. ತಾರಿಣಿ ಶುಭದಾಯಿನಿ ಅಭಿಮತ

CHITRADURGA NEWS | 24 JUNE 2026

ಚಿತ್ರದುರ್ಗ: ಹಿರಿಯ ಸಾಹಿತಿ ಹಾಗೂ ಪತ್ರಕರ್ತ ಜಿ.ಎಸ್. ಉಜ್ಜನಪ್ಪ ಅವರು ಕೇವಲ ಜೀವಿಸಿದ್ದಷ್ಟೇ ಅಲ್ಲ, ತಮ್ಮ ಬದುಕಿನ ಪ್ರತಿ ನಿಮಿಷವನ್ನೂ ಸಾರ್ಥಕತೆಯಿಂದ ಆಸ್ವಾದಿಸಿದ ಅಪರೂಪದ ಕ್ರಿಯಾಶೀಲ ವ್ಯಕ್ತಿತ್ವದವರಾಗಿದ್ದರು ಎಂದು ವಿಮರ್ಶಕಿ ಹಾಗೂ ಪ್ರಾಧ್ಯಾಪಕಿ ಪ್ರೊ. ತಾರಿಣಿ ಶುಭದಾಯಿನಿ ಅವರು ಬಣ್ಣಿಸಿದರು.

ಇದನ್ನೂ ಓದಿ: ವಿದ್ಯುತ್‌ ಖಾಸಗೀಕರಣಕ್ಕೆ ಬಿಡಬೇಡಿ | ರೈತರಿಗೆ ಗೋವಿಂದ ಕಾರಜೋಳ ಸಲಹೆ 

ನಗರದ ಪತ್ರಿಕಾ ಭವನದಲ್ಲಿ ಬುಧವಾರ ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘದ ಜಿಲ್ಲಾ ಘಟಕದ ವತಿಯಿಂದ ಆಯೋಜಿಸಿದ್ದ ಜಿ.ಎಸ್. ಉಜ್ಜನಪ್ಪ ಅವರ ನುಡಿನಮನ ಕಾರ್ಯಕ್ರಮದಲ್ಲಿ ಅವರ ಭಾವಚಿತ್ರಕ್ಕೆ ಪುಷ್ಪ ನಮನ ಸಲ್ಲಿಸಿ ಅವರು ಮಾತನಾಡಿದರು.

ನಾನು ಪತ್ರಿಕಾ ಭವನಕ್ಕೆ ಬಂದ ತಕ್ಷಣವೇ ಉಜ್ಜನಪ್ಪನವರು ಇಲ್ಲೇ ಎಲ್ಲೋ ಕಣ್ಣೆದುರು ಕುಳಿತಿದ್ದಾರೆನಿಸಿತು. ದುರ್ಗದಲ್ಲಿ ನಡೆಯುವ ಸಣ್ಣ ಕಾರ್ಯಕ್ರಮ ಇರಲಿ, ದೊಡ್ಡ ಸಭೆ ಇರಲಿ; ಕೈಲೊಂದು ಪುಟ್ಟ ನೋಟ್‌ಬುಕ್, ಪೆನ್ ಹಿಡಿದು ಮುಂಚೂಣಿಯಲ್ಲಿ ಕುಳಿತುಕೊಳ್ಳುತ್ತಿದ್ದರು. 

ಎಲ್ಲರಿಗೂ ಆಪ್ತತೆಯಿಂದ ವಿಶ್ ಮಾಡಿ, ವರದಿಗಳನ್ನು ಸಿದ್ಧಪಡಿಸುತ್ತಿದ್ದ ಅವರ ಗಾಂಭೀರ್ಯತೆ ಮತ್ತು ಪ್ರೀತಿಯ ನಗು ನಮ್ಮ ಕಣ್ಣೆದುರೇ ಇದೆ. ಅತ್ಯಂತ ಕೋಪಿಷ್ಟರಾಗಿದ್ದರೂ ಮರುಕ್ಷಣವೇ ಎಲ್ಲವನ್ನೂ ಮರೆತು ಸಹಜವಾಗಿ ಮಾತನಾಡುವ ಉದಾರ ಗುಣ ಅವರದ್ದಾಗಿತ್ತು ಎಂದರು.

ಇದನ್ನೂ ಓದಿ: ಮಾರುಕಟ್ಟೆ ಧಾರಣೆ | ಜೂನ್ 24 | ಮೆಕ್ಕೆಜೋಳ, ರಾಗಿ ರೇಟ್

ಕೇವಲ ಸಾಹಿತ್ಯಕ್ಕಷ್ಟೇ ಸೀಮಿತವಾಗದ ಉಜ್ಜನಪ್ಪನವರು ಸಮಾಜದ ನೂರಾರು ಯುವಕರಿಗೆ ಉದ್ಯೋಗ ಕೊಡಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಮಿಲ್‌ನಲ್ಲಿ ಕೆಲಸ ಮಾಡುತ್ತಿದ್ದಾಗ ದೊರೆತ ಸಂಪರ್ಕಗಳನ್ನು ಬಳಸಿಕೊಂಡು, ಬಡ ಯುವಕರಿಗೆ ಕೆಲಸ ಸಿಗುವಂತೆ ಮಾಡಿದರು. 

ಸ್ವತಃ ತಮ್ಮ ಮಕ್ಕಳಿಗೆ ಸೌಲಭ್ಯ ಕೊಡಿಸಿಕೊಳ್ಳಲು ಸಂಕೋಚಪಡುತ್ತಿದ್ದ ಅವರು, ಇತರರಿಗೆ ಸಹಾಯ ಮಾಡುವಲ್ಲಿ ಎಂದಿಗೂ ಹಿಂದೆ ಬಿದ್ದವರಲ್ಲ. ರಾಜಸಭಾ ಸದಸ್ಯರು ಸೇರಿದಂತೆ ಪ್ರಭಾವಿ ವ್ಯಕ್ತಿಗಳ ಬಳಿ ಪತ್ರ ಬರೆಸಿಕೊಟ್ಟು ನೆರವಾಗುತ್ತಿದ್ದ ಸಮಾಜ ಸೇವಕ ಅವರಲ್ಲಿದ್ದರು.

ಅವರ ವೃತ್ತಿಜೀವನ ಮತ್ತು ಆರ್ಥಿಕ ಸ್ಥಿತಿ ನಿರಂತರ ಏರಿಳಿತಗಳಿಂದ ಕೂಡಿತ್ತು. ಆದರೂ ದುಡ್ಡು ಬಂದಾಗ ಬೀಗದೆ, ಬಡತನ ಬಂದಾಗ ಕುಗ್ಗದೆ ಎಲ್ಲವನ್ನೂ ಸಮಚಿತ್ತದಿಂದ ಸ್ವೀಕರಿಸಿದರು. ಎಂತಹ ಕಷ್ಟದ ಸಂದರ್ಭದಲ್ಲೂ ಪ್ರೀತಿಯ ಮೌಲ್ಯಗಳಿಗೆ ಜಾಗವಿದೆ ಎಂಬುದನ್ನು ಅವರು ಸದಾ ಸಾಬೀತುಪಡಿಸುತ್ತಿದ್ದರು. 

ಇದನ್ನೂ ಓದಿ: ತೋಟಗಾರಿಕೆ ಬೆಳೆ | ಫಸಲ್ ಬಿಮಾ ಯೋಜನೆ ನೋಂದಣಿ ಆರಂಭ

ನನ್ನ ಪತಿಯನ್ನು ಕಳೆದುಕೊಂಡು ನಾನು ಕಂಗಾಲಾಗಿದ್ದಾಗ, ನನ್ನ ವಾಟ್ಸಾಪ್ ಸ್ಟೇಟಸ್‌ಗಳನ್ನು ನೋಡಿ ‘ಆಯಿತು, ಮುಂದೆ ಹೋಗಬೇಕು ನೀನು. ಮುಂದಿನ ಬದುಕನ್ನು ನೋಡಬೇಕು’ ಎಂದು ಧೈರ್ಯ ತುಂಬಿದ ಪ್ರೀತಿಯ ತಂದೆಯ ರೂಪ ಅವರದ್ದಾಗಿತ್ತು. ಕೊನೆಯುಸಿರೆಳೆಯುವ ಎರಡು ದಿನಗಳ ಮುನ್ನವೂ ಹೂವಿನ ಚಿತ್ರಗಳನ್ನು ವಾಟ್ಸಾಪ್‌ನಲ್ಲಿ ಕಳುಹಿಸಿ ಚೈತನ್ಯ ತುಂಬಿದ್ದರು.

ಉಜ್ಜನಪ್ಪನವರ ಸೃಜನಶೀಲತೆ ಅಡಗಿರುವುದೇ ಅವರ ಹಾಡಿನ ವ್ಯಕ್ತಿತ್ವದಲ್ಲಿ. ಕುವೆಂಪು ಅವರ ‘ಕಳೆದುದಾರಾತ್ರಿ ಓ ಲಕ್ಷ್ಮಣ…’ ಸಾಲನ್ನು ಅವರು ಭಾವಪೂರ್ಣವಾಗಿ ಹಾಡಿದರೆ ಇಡೀ ಪರಿಸರ ಮೌನವಾಗುತ್ತಿತ್ತು. ಬಿ. ಎಂ. ಶ್ರೀ ಅವರ ‘ಏರಿಸಿ ಹಾರಿಸಿ ಕನ್ನಡದ ಬಾವುಟ’ ಹಾಡನ್ನು ಅವರು ವಿಭಿನ್ನವಾಗಿ ಸಂಯೋಜಿಸಿ ಹಾಡುತ್ತಿದ್ದರು. 

ಹಾಗೆಯೇ ಜಿ.ಎಸ್. ಶಿವರುದ್ರಪ್ಪ ಅವರ ‘ಸದಾ ಹೊಯ್ಯುವ ಮಳೆ ನನ್ನ ನಿನ್ನ ನಡುವೆ’ ಕವಿತೆಯನ್ನು ಅವರು ಹಾಡುತ್ತಿದ್ದ ರೀತಿ ಅನನ್ಯವಾಗಿತ್ತು. ಅದನ್ನು ಕೇಳಿ ಸ್ವತಃ ಜಿ.ಎಸ್.ಎಸ್ ಅವರು ಬೆರಗಾಗಿ, ಚಿತ್ರದುರ್ಗದಲ್ಲಿ ಇಂತಹ ಅದ್ಭುತ ಹಾಡುಗಾರನಿದ್ದಾನೆಯೇ ಎಂದು ಉಜ್ಜಪ್ಪನವರನ್ನು ಸನ್ಮಾನಿಸಿದ್ದರು.

ಇದನ್ನೂ ಓದಿ: ಚಿತ್ರದುರ್ಗ ನಗರದಲ್ಲಿ ನೂತನ ಆಧಾರ್ ಸೇವಾ ಕೇಂದ್ರ | AC ಡಾ.ಕೆ.ಜೆ.ಕಾಂತರಾಜ್ ಉದ್ಘಾಟನೆ 

ಅವರ ಬದುಕು ನಮಗೆಲ್ಲರಿಗೂ ಚೈತನ್ಯದ ಚಿಲುಮೆ. ನಮ್ಮ ನಡುವೆ ಭೌತಿಕವಾಗಿ ಇಲ್ಲದಿದ್ದರೂ, ಅವರು ಬಿಟ್ಟುಹೋಗಿರುವ ಸಾಹಿತ್ಯಿಕ, ಸಾಂಸ್ಕೃತಿಕ ಮೌಲ್ಯಗಳು ಸದಾ ಹಸಿರಾಗಿರುತ್ತವೆ ಎಂದು ತಾರಿಣಿ ಶುಭದಾಯಿನಿ ನುಡಿದರು.

ನಿವೃತ್ತ ಪ್ರಾಧ್ಯಾಪಕ ಎಂ.ಜಿ.ರಂಗಸ್ವಾಮಿ ಮಾತನಾಡಿ, ಉಜ್ಜನಪ್ಪ ಅವರ ಬರವಣಿಗೆಯಲ್ಲಿ ಬಯಲು ಸೀಮೆಯ ಶೈಲಿಯಿತ್ತು. ತಾವು ಹುಟ್ಟಿ ಬೆಳೆದ ಗೌನಹಳ್ಳಿ ಕುರಿತು ಅವರ ನೆನಪಿನಾಳದಿಂದ ಅನೇಕ ಮಾಹಿತಿಗಳನ್ನು ದಾಖಲಿಸಿ ಕಾದಂಬರಿ ರಚಿಸಿದ್ದರು. ಇದನ್ನು ಓದುಗ ಹಾಗೂ ವಿಮರ್ಶಕ ವಲಯ ಗ್ರಾಮ ಭಾರತದ ಚಿತ್ರಣ ಎಂದು ಪ್ರಶಂಸಿದ್ದರು ಎಂದು ಹೇಳಿದರು.

ಕಾರ್ಯಕ್ರಮದಲ್ಲಿ ಕಾರ್ಯನಿರತ ಪತ್ರಕರ್ತರ ಸಂಘದ ಜಿಲ್ಲಾಧ್ಯಕ್ಷ ವಿನಾಯಕ ತೊಡರನಾಳು, ಶರಣ ಸಾಹಿತ್ಯ ಪರಿಷತ್ ರಾಜ್ಯ ಉಪಾಧ್ಯಕ್ಷ ಡಾ.ಕೆ.ಎಂ.ವೀರೇಶ್, ಮಾಧ್ಯಮ ಅಕಾಡೆಮಿ ಸದಸ್ಯ ಅಹೋಬಲಪತಿ, ಹಿರಿಯ ಪತ್ರಕರ್ತ ಹೆಂಜಾರಪ್ಪ, ರೈತ ಸಂಘದ ಜಿಲ್ಲಾಧ್ಯಕ್ಷ ಧನಂಜಯ ಹಂಪಯ್ಯನಮಾಳಿಗೆ, ಬಾ.ಮ.ಬಸವರಾಜಯ್ಯ, ಜಿ.ಎಸ್.ಉಜ್ಜಿನಪ್ಪನವರ ಪುತ್ರಿ ಹೇಮಾ ಉಪಸ್ಥಿತರಿದ್ದರು.

ಹರೀಶ್ ಪ್ರಾರ್ಥಿಸಿದರು. ಪತ್ರಕರ್ತರಾದ ರವಿ ಉಗ್ರಾಣ ಸ್ವಾಗತಿಸಿದರು. ತಿಪ್ಪೇಸ್ವಾಮಿ ನಾಕೀಕೆರೆ ನಿರೂಪಿಸಿದರು.

ಜಿ.ಎಸ್‌.ಉಜ್ಜನಪ್ಪ ಹೆಸರಿನಲ್ಲಿ ದತ್ತಿ ಪ್ರಶಸ್ತಿ:

ಹೊಸದುರ್ಗದ ಕುಂಚಿಟಿಗ ಮಠದ ಶ್ರೀ ಶಾಂತವೀರ ಸ್ವಾಮೀಜಿ ಮಾತನಾಡುತ್ತಾ, ಜಿ.ಎಸ್‌.ಉಜ್ಜನಪ್ಪ ಅವರ ಹೆಸರಿನಲ್ಲಿ ದತ್ತಿ ಪ್ರಶಸ್ತಿ ನೀಡಲು ಮಠದಿಂದ ಸಹಕಾರ ನೀಡಲಾಗುವುದು ಎಂದು ತಿಳಿಸಿದರು.

ಯಾರಲ್ಲಿಯೂ ಏನನ್ನು ಬೇಡದೆ ವಿಭಿನ್ನವಾಗಿ ಬದುಕಿದ ಜಿ.ಎಸ್.ಉಜ್ಜನಪ್ಪನವರು ಅನೇಕರಿಗೆ ಮಾರ್ಗದರ್ಶಕರಾಗಿದ್ದರು. ಪತ್ರಕರ್ತರು, ಸ್ವಾಮೀಜಿಗಳಿಗೆ ಜಾತಿ ಇರಬಾರದು. ಅನರ್ಹರಿಗೆ ಕೆಲವೊಮ್ಮೆ ಪ್ರಶಸ್ತಿಗಳು ಸಿಗುತ್ತದೆ. ನಿಜವಾದ ಅರ್ಹರನ್ನು ಯಾರು ಗುರುತಿಸುವುದಿಲ್ಲ. ಇದಕ್ಕೆಲ್ಲಾ ಜಾತಿಯ ಪ್ರಭಾವ ಕಾರಣ ಎಂದು ಬೇಸರ ವ್ಯಕ್ತಪಡಿಸಿದರು.

ಸ್ವಾಮೀಜಿಗಳಿಂದ ಹಿಡಿದು ಎಲ್ಲರಿಗೂ ಮಾರ್ಗದರ್ಶಕರು ಬೇಕು. ಪ್ರಗತಿಪರ, ಸಮಾಜದ ಪರ, ಜೀವಪರವಾಗಿ ಬದುಕಿದ ಸಾಂಸ್ಕøತಿಕ ನಾಯಕರನ್ನು ಸ್ಮರಣೆ ಮಾಡುವುದು ಎಲ್ಲರ ಜವಾಬ್ದಾರಿಯಾಗಬೇಕು. ಮೃತಪಟ್ಟಾಗ ಅವರ ಆಸ್ತಿ ವರ್ಗಾವಣೆ ಆಗುತ್ತದೆ. ಆದರೆ, ಆದರ್ಶಗಳು ಆಗುತ್ತಿಲ್ಲ ಎಂದರು.

ಬಸವಮೂರ್ತಿ ಶ್ರೀ ಮಾದಾರ ಚನ್ನಯ್ಯ ಸ್ವಾಮೀಜಿ ಮಾತನಾಡಿ, ಜಿ.ಎಸ್‌.ಉಜ್ಜನಪ್ಪ ಜೊತೆ ನಮ್ಮದು ಪೂರ್ವಾಶ್ರಮದಿಂದಲೂ ಸಂಪರ್ಕವಿದೆ. ಚಿಕ್ಕವರ ಜೊತೆ ಚಿಕ್ಕವರಾಗಿ, ದೊಡ್ಡವರ ಜೊತೆ ದೊಡ್ಡವರಾಗಿ ಬದುಕಿದ ಜಿ.ಎಸ್.ಉಜ್ಜಿನಪ್ಪ ಅವರಲ್ಲಿ ಅಹಂ ಇರಲಿಲ್ಲ. ನನಗೆ ಮಾರ್ಗದರ್ಶಕರಾಗಿದ್ದರು. ಬದುಕಿರುವತನಕ ಒಂದು ದಿನವೂ ಯಾರಿಗೂ ತೊಂದರೆ ಕೊಟ್ಟವರಲ್ಲ ಎಂದು ಸ್ಮರಿಸಿದರು.

ಜಿ.ಎಸ್.ಉಜ್ಜನಪ್ಪ ಅವರ ಅಗಲಿಕೆಯಿಂದ ಮುರುಘಾಮಠ ಒಬ್ಬ ಸದ್ಬಕ್ತನನ್ನು ಕಳೆದುಕೊಂಡಿದೆ. ಜಿ.ಎಸ್‌.ಉಜ್ಜನಪ್ಪ ಅವರ ಕುರಿತಾಗಿ ಮಾಹಿತಿ ಸಂಗ್ರಹಿಸಿ ಕಿರುಹೊತ್ತಿಗೆ ರೂಪದಲ್ಲಿ ಸ್ಮರಣ ಸಂಚಿಕೆ ತಂದರೆ ಅದನ್ನು ಮುರುಘಾ ಮಠದಿಂದ ಪ್ರಕಟಿಸುತ್ತೇವೆ.

| ಡಾ.ಬಸವಕುಮಾರ ಸ್ವಾಮೀಜಿ, ಮುರುಘಾ ಮಠದ ಆಡಳಿತ ಮಂಡಳಿ ಸದಸ್ಯರು.