ಸಾಣೇಹಳ್ಳಿ ಶ್ರೀ ಅಮೃತ ಮಹೋತ್ಸವ | ಮಠಾಧೀಶರಿಂದ ಪುಷ್ಪವೃಷ್ಠಿ

CHITRADURGA NEWS | 09 OCTOBER 2026

ಚಿತ್ರದುರ್ಗ: ರಂಗ ಜಂಗಮ ಎಂದೇ ಹೆಸರಾಗಿರುವ ಸಾಣೇಹಳ್ಳಿ ಡಾ.ಪಂಡಿತಾರಾಧ್ಯ ಶಿವಾಚಾರ್ಯ ಸ್ವಾಮೀಜಿ ಅವರಿಗೆ 75 ವರ್ಷ ಸಂದಿರುವ ಹಿನ್ನೆಲೆಯಲ್ಲಿ ಜಿಲ್ಲೆಯ ಮಠಾಧೀಶರು ಪತ್ರಿಕಾ ಭವನದಲ್ಲಿ ಶುಕ್ರವಾರ ಅಮೃತ ಮಹೋತ್ಸವ ಹಾಗೂ ಶ್ರೀಗಳು ರಚಿಸಿರುವ ಒಲಿದಂತೆ ಹಾಡುವೆ ಕೃತಿಗಳ ಲೋಕಾರ್ಪಣೆ ಮಾಡಿದರು.

ಇದನ್ನೂ ಓದಿ: ಮಾರುಕಟ್ಟೆ ಧಾರಣೆ | ಅಕ್ಟೋಬರ್ 09 | ರಾಗಿ, ಶೇಂಗಾ ರೇಟ್….

ಈ ವೇಳೆ ಮಾತನಾಡಿದ ಸಾಣೇಹಳ್ಳಿ ಶ್ರೀ ಪಂಡಿತಾರಾಧ್ಯ ಶಿವಾಚಾರ್ಯ ಸ್ವಾಮೀಜಿ, ವ್ಯಕ್ತಿ ಎಷ್ಟು ವರ್ಷ ಬದುಕುತ್ತಾನೆ ಎನ್ನುವುದು ಮುಖ್ಯವಲ್ಲ, ಹೇಗೆ ಬದುಕುತ್ತಾನೆ ಎನ್ನುವುದು ಮುಖ್ಯ ಎಂದರು.

ನೂರು ವರ್ಷ ಬದುಕಬೇಕು ಎನ್ನುವುದು ನಮ್ಮ ಉದ್ದೇಶವಲ್ಲ, ಸತ್ಕಾರ್ಯ ಮಾಡಲು ಸಾಧ್ಯವಾಗುವಷ್ಟು ಮತ್ತು ಆರೋಗ್ಯ ಚೆನ್ನಾಗಿರುವಷ್ಟು ದಿನ ಬದುಕಿದರೆ ಸಾಕು. ಕಾವಿ ಧರಿಸಿದ ತಕ್ಷಣ ಯಾರೂ ಸ್ವಾಮಿಗಳಾಗುವುದಿಲ್ಲ, ಮನಸ್ಸಿಗೆ ಕಾವಿ ಹಾಕಿಕೊಳ್ಳಬೇಕು. ನಮ್ಮ ನಡವಳಿಕೆ ಮತ್ತು ಸಾಗುವ ಮಾರ್ಗ ಅತ್ಯಂತ ಮುಖ್ಯ ಎಂದರು.

ಆರಂಭದಲ್ಲಿ ಪಿಯುಸಿ ಹಾಗೂ ಡಿಗ್ರಿಯಲ್ಲಿ ಫೇಲಾಗಿದ್ದ ನಾನು, ನಂತರ ತತ್ವಶಾಸ್ತ್ರ ಪದವಿ ಮತ್ತು ಸ್ನಾತಕೋತ್ತರ ಪದವಿಯಲ್ಲಿ ಚಿನ್ನದ ಪದಕ ಗಳಿಸಿದೆ. ಹಿರಿಯ ಗುರುಗಳ ಆಶೀರ್ವಾದವೇ ಈ ಮಟ್ಟಕ್ಕೆ ಬೆಳೆಸಿದೆ. ಈವರೆಗಿನ ಆತ್ಮಾವಲೋಕನ ಮಾಡಿಕೊಂಡಾಗ ಸಾಧನೆ ಶೂನ್ಯ ಎನಿಸುತ್ತದೆ, ಇನ್ನೂ ಅನೇಕ ಕೆಲಸಗಳನ್ನು ಮಾಡಲು ಅವಕಾಶವಿದೆ. ಟೀಕೆಗಳಿಗೆ ಅಂಜದೆ, ವೇದಿಕೆಯ ಮೇಲೊಂದು ಹೊರಗಡೆ ಮತ್ತೊಂದಾಗದೆ ನೇರ ಮತ್ತು ನಿಷ್ಠುರ ನಡೆ ನಮ್ಮದಾಗಿದೆ ಎಂದರು.

ಇದನ್ನೂ ಓದಿ: ಜಿ.ಪಂ.ಸಭಾಂಗಣದಲ್ಲಿ ತಾಲ್ಲೂಕು ಮಟ್ಟದ ಯುವಸಂಸತ್ತು ಸಭೆ

ಮುರುಘಾ ಮಠದ ಆಡಳಿತ ಮಂಡಳಿ ಸದಸ್ಯರಾದ ಡಾ.ಬಸವಕುಮಾರ ಸ್ವಾಮೀಜಿ ಮಾತನಾಡಿ, ಆಡುಮುಟ್ಟದ ಸೊಪ್ಪಿಲ್ಲ ಎನ್ನುವಂತೆ ಸಾಣೇಹಳ್ಳಿ ಶ್ರೀಗಳು ಎಲ್ಲಾ ಕ್ಷೇತ್ರಗಳಲ್ಲಿ ಸೇವೆ ಮಾಡಿದ್ದಾರೆ. ಬಂಡಾಯದ ಮೂಲಕವೇ ಬೆಳೆದು ಬಂದವರು. ಅತೀ ಸರಳ ಮತ್ತು ಸುಲಭವಾಗಿ ಸಿಗುವ ಗುರುಗಳು. ವಚನ ಝೇಂಕಾರ ಸೇರಿದಂತೆ ಅವರು ನಡೆಸಿದ ಕಾರ್ಯಕ್ರಮಗಳು ನಾಡಿನಲ್ಲಿ ಸದ್ದು ಮಾಡಿವೆ ಎಂದು ಸ್ಮರಿಸಿದರು.

ಕಾರ್ಯಕ್ರಮದಲ್ಲಿ ಹೊಳಲ್ಕೆರೆ ಶಾಸಕ ಡಾ.ಎಂ.ಚಂದ್ರಪ್ಪ, ಶ್ರೀ ಇಮ್ಮಡಿ ಸಿದ್ದರಾಮೇಶ್ವರ ಸ್ವಾಮೀಜಿ, ಸಿದ್ದಯ್ಯನಕೋಟೆ ಶ್ರೀ ಬಸವಲಿಂಗ ಸ್ವಾಮೀಜಿ, ಶ್ರೀ ಯಾದವಾನಂದ ಸ್ವಾಮೀಜಿ, ಶ್ರೀ ವಾಲ್ಮೀಕಿ ಪ್ರಸನ್ನಾನಂದಪುರಿ ಸ್ವಾಮೀಜಿ, ಶ್ರೀ ಶಿವಾನಂದ ಸ್ವಾಮೀಜಿ, ಶ್ರೀ ಮಹಾಲಿಂಗ ಸ್ವಾಮೀಜಿ, ಶ್ರೀ ಮಲ್ಲಿಕಾರ್ಜುನ ಸ್ವಾಮೀಜಿ, ಶ್ರೀ ತಿಪ್ಪೇರುದ್ರ ಸ್ವಾಮೀಜಿ, ಶ್ರೀ ಅಪ್ಪಣ್ಣ ಸ್ವಾಮೀಜಿ, ಶ್ರೀ ವನಕಲ್ಲು ರಮಾನಂದ ಸ್ವಾಮೀಜಿ, ಶ್ರೀ ಬಸವ ಭೂಷಣ ಸ್ವಾಮೀಜಿ ಮತ್ತಿತರರು ಉಪಸ್ಥಿತರಿದ್ದರು.

ಇದೇ ವೇಳೆ ನವೆಂಬರ್ 1 ರಿಂದ 6 ರವರೆಗೆ ಸಾಣೇಹಳ್ಳಿಯಲ್ಲಿ ರಾಷ್ಟ್ರೀಯ ನಾಟಕೋತ್ಸವ ವಿಶೇಷವಾಗಿ ನಡೆಯಲಿದೆ. ನಾಟಕೋತ್ಸವದ ಸಮಾರೋಪ ಸಮಾರಂಭದಲ್ಲಿ ಸಿರಿಗೆರೆ ಡಾ.ಶ್ರೀ ಶಿವಮೂರ್ತಿ ಶಿವಾಚಾರ್ಯ ಸ್ವಾಮೀಜಿ ಭಾಗವಹಿಸಲಿದ್ದಾರೆ ಎಂದು ಸಾಣೇಹಳ್ಳಿ ಶ್ರೀ ತಿಳಿಸಿದರು.

ಇದನ್ನೂ ಓದಿ: ಮಾದಕ ವಸ್ತುಗಳಿಂದ ದೂರವಿದ್ದು ಆರೋಗ್ಯ ಕಾಪಾಡಿಕೊಳ್ಳಿ

ಶ್ರೀಗಳು ಅತ್ಯಂತ ಶಿಸ್ತಿನ ಮಠಾಧೀಶರಾಗಿದ್ದು, ಲಿಂಗಪೂಜೆಯಂತೆ ಪ್ರತಿ ದಿನ ಬರುವ ಕಾಣಿಕೆಯನ್ನೂ ಲೆಕ್ಕ ಹಾಕಿ ಬರೆಯುತ್ತಾರೆ. ವಿಚಾರ ಮತ್ತು ವ್ಯವಹಾರ ಎರಡರಲ್ಲೂ ಕಠಿಣ ತತ್ವ ಪಾಲಕರು.

| ಶ್ರೀ ಶಾಂತವೀರ ಸ್ವಾಮೀಜಿ.

ಪಂಡಿತಾರಾಧ್ಯ ಶ್ರೀಗಳು ಒಂದು ಮಹಾನ್ ಶಕ್ತಿ. ಸಾಣೇಹಳ್ಳಿ ಮಠ ಹಾಗೂ ಗ್ರಾಮವನ್ನು ಜಗತ್ತಿನ ಮಟ್ಟಕ್ಕೆ ಬೆಳೆಸಿದ್ದಾರೆ. ಕಷ್ಟ ಕಾಲದಲ್ಲೂ ಅವರು ತತ್ವಗಳನ್ನು ಬಿಟ್ಟುಕೊಟ್ಟವರಲ್ಲ.

| ಶ್ರೀ ಮಾದಾರ ಚನ್ನಯ್ಯ ಶ್ರೀಗಳು ಹೇಳಿದರು.

ನಾಟಕಗಳ ಮೂಲಕ ಕರ್ನಾಟಕ ಮಾತ್ರವಲ್ಲದೆ ರಾಷ್ಟ್ರಮಟ್ಟದಲ್ಲಿ ಬಸವತತ್ವ ಮತ್ತು ಸಾಮಾಜಿಕ ಸಂದೇಶ ಪಸರಿಸಿದ ನೇರ, ನಿಷ್ಠುರ ವ್ಯಕ್ತಿತ್ವ ಶ್ರೀಗಳದ್ದು.

| ಜಿ.ಎಚ್‌.ತಿಪ್ಪಾರೆಡ್ಡಿ, ಮಾಜಿ ಶಾಸಕರು.

ಬಸವಾದಿ ಶರಣರ ಹಾದಿಯಲ್ಲಿ ಸಾಗುತ್ತಿರುವ ಶ್ರೀಗಳು ರಚಿಸುತ್ತಿರುವ ‘ಒಲಿದಂತೆ ಹಾಡುವ’ ಕೃತಿಗಳು ಸಮಾಜಕ್ಕೆ ಮುತ್ತಿನಂತಿವೆ. ಸಮಾಜದಲ್ಲಿ ಪರಿವರ್ತನೆ ತರುವ ನಿಟ್ಟಿನಲ್ಲಿ ಶ್ರೀಗಳದ್ದು ದೃಢವಾದ ಹೆಜ್ಜೆ. ನಡೆ ಮತ್ತು ನುಡಿಗಳಲ್ಲಿ ಎಂದೂ ರಾಜಿ ಮಾಡಿಕೊಂಡವರಲ್ಲ.

| ಶ್ರೀ ಪುರುಷೋತ್ತಮಾನಂದಪುರಿ ಸ್ವಾಮೀಜಿ.

ಮಠಾಧೀಶರು ಮಂಡೆ ಬೋಳಿಸಿಕೊಳ್ಳುತ್ತಾರೆ. ಆದರೆ, ಪಂಡಿತಾರಾಧ್ಯ ಶ್ರೀಗಳಿ ಮಂಡೆಯ ಜೊತೆಗೆ ಮನಸ್ಸನ್ನೂ ಬೋಳು ಮಾಡಿಕೊಂಡ ನಿಜವಾದ ಸನ್ಯಾಸಿ. ರಂಗಭೂಮಿ ಮತ್ತು ನಾಟಕ ಮಾಧ್ಯಮವನ್ನು ತಪಸ್ಸಿನಂತೆ ಬಳಸಿ ಸಮಾಜ ಸುಧಾರಣೆ ಮಾಡಿದ್ದಾರೆ.

| ಎಸ್.ಕೆ.ಬಸವರಾಜನ್, ಮಾಜಿ ಶಾಸಕರು.

ಜಿಲ್ಲೆಯ ಮಠಾಧೀಶರಿಗೆ ಪ್ರೇರಣೆಯಾಗಿರುವ ಶ್ರೀಗಳು, 75 ವರ್ಷಗಳಲ್ಲಿ ರಂಗಭೂಮಿ ಮೂಲಕ ಶರಣರ ಸಂದೇಶ ತಲುಪಿಸಿ ಮಾದರಿಯಾಗಿದ್ದಾರೆ.

| ಶ್ರೀ ಈಶ್ವರಾನಂದಪುರಿ ಸ್ವಾಮೀಜಿ.

ಆಧುನಿಕ ಮಾಧ್ಯಮಗಳಿಂದ ಗ್ರಾಮೀಣ ಸೊಗಡು ನಶಿಸುತ್ತಿರುವ ಕಾಲದಲ್ಲಿ ನಾಟಕೋತ್ಸವದ ಮೂಲಕ ಜನರನ್ನು ಸೆಳೆಯುತ್ತಿದ್ದಾರೆ.

| ಎ.ವಿ.ಉಮಾಪತಿ, ಮಾಜಿ ಶಾಸಕರು.

ಬಸವತತ್ವ ಪಾಲನೆಯಲ್ಲಿ ಮುಂಚೂಣಿಯಲ್ಲಿರುವ ಶ್ರೀಗಳು, ಮುರುಘಾ ಮಠದೊಂದಿಗೆ ಅವಿನಾಭಾವ ಬಾಂಧವ್ಯ ಹೊಂದಿದ್ದರು. ಮಲ್ಲಿಕಾರ್ಜುನ ಗುರುಗಳು ಪಂಡಿತಾರಾಧ್ಯ ಶ್ರೀಗಳ ಪಟ್ಟಾಭಿಷೇಕ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.

| ಶ್ರೀ ವಚನಾನಂದ ಸ್ವಾಮೀಜಿ.

ವಿಚಾರಗಳಲ್ಲಿ ವಜ್ರದಂತೆ ಕಠಿಣ, ಮನುಷ್ಯ ಸಂಬಂಧಗಳಲ್ಲಿ ಕುಸುಮದಂತೆ ಕೋಮಲ ಸ್ವಭಾವ ಶ್ರೀಗಳದ್ದು.

| ಶ್ರೀ ಮರುಳಸಿದ್ದ ಸ್ವಾಮೀಜಿ.

ದುರ್ಗದ ಏಳ್ಗೆಗೆ ಎಲ್ಲ ಮಠಗಳು ಚಿಂತನೆ ನಡೆಸಬೇಕು. ಮಠಾಧೀಶರು ಈ ವಿಚಾರದಲ್ಲಿ ಮುಂದೆ ಬಂದರೆ ಜನ ನಿಮ್ಮ ಜೊತೆ ಬರುತ್ತಾರೆ.

| ಜಿ.ಎಸ್.ಮಂಜುನಾಥ್, ಆದಿಜಾಂಬವ ನಿಗಮದ ಅಧ್ಯಕ್ಷರು.

ಗೋಲ್ಡ್ ಮೆಡಲ್ ಪಡೆದು ಶಿಕ್ಷಣ ಪೂರೈಸಿದ ಶ್ರೀಗಳು ಜಾತಿ, ಮತ ನೋಡದೆ ಎಲ್ಲರಿಗೂ ಮಾರ್ಗದರ್ಶನ ಮಾಡುತ್ತಿದ್ದಾರೆ.

| ಪಿ.ರಘು, ಸಫಾಯಿ ಕರ್ಮಚಾರಿ ಆಯೋಗದ ಅಧ್ಯಕ್ಷರು.

ಸಮಾಜಕ್ಕೆ ಮುಟ್ಟಿಸಬೇಕಾದ ವಿಚಾರಗಳನ್ನು ನಿರ್ಧಾಕ್ಷಿಣ್ಯವಾಗಿ ಮುಟ್ಟಿಸುವ ಕೆಲಸವನ್ನು ಸಾಣೇಹಳ್ಳಿ ಶ್ರೀಗಳು ಮಾಡಿದ್ದಾರೆ.

| ಶ್ರೀ ಶಿವಬಸವ ಸ್ವಾಮೀಜಿ.