ಮಕ್ಕಳಲ್ಲಿ ಆತಂಕ ಇದ್ದರೆ ಈ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆಯಂತೆ 

CHITRADURGA NEWS | 15 MARCH 2026

ಇತ್ತೀಚಿನ ದಿನಗಳಲ್ಲಿ ಒತ್ತಡದ ಜೀವನಶೈಲಿಯಿಂದಾಗಿ ಪೋಷಕರಿಗೆ ಮಕ್ಕಳ ಜವಾಬ್ದಾರಿ ತೆಗೆದುಕೊಳ್ಳುವುದು ತುಂಬಾ ಕಷ್ಟಕರ ಮತ್ತು ಸವಾಲಿನ ಕೆಲಸವಾಗಿದೆ. ಕೆಲಸದ ಒತ್ತಡದಿಂದ ಮಕ್ಕಳ ಬಗ್ಗೆ ಗಮನಹರಿಸಲು ಅವರಿಗೆ ಸಾಧ್ಯವಾಗುವುದಿಲ್ಲ. ಅಲ್ಲದೇ ಕೆಲವೊಮ್ಮೆ, ಪೋಷಕರು ತಮ್ಮ ಮಕ್ಕಳ ಯೋಗಕ್ಷೇಮಕ್ಕಾಗಿ ಮಾಡುವಂತಹ ಕೆಲವು ಪ್ರಯತ್ನಗಳು ಮಕ್ಕಳಲ್ಲಿ ಮಾನಸಿಕ ಒತ್ತಡವನ್ನು ಹೆಚ್ಚಿಸಬಹುದು. 

ಅದು ಅವರಿಗೆ ಮಾನಸಿಕ ತೊಂದರೆಯನ್ನು ಉಂಟುಮಾಡಬಹುದು. ಇದರಿಂದ ಮಕ್ಕಳಲ್ಲಿ ಆತಂಕ ಮನೆಮಾಡುತ್ತದೆ. ಇದನ್ನು ಪೋಷಕರು ಪತ್ತೆ ಮಾಡಿ ಅವರಿಗೆ ಸರಿಯಾದ ಚಿಕಿತ್ಸೆ ನೀಡಬೇಕು. ಇಲ್ಲವಾದರೆ ಇದು ಅವರ ಜೀವನದ ಮೇಲೆ ಕೆಟ್ಟ ಪರಿಣಾಮ ಬೀರಬಹುದು. ಹಾಗಾಗಿ ಮಕ್ಕಳಲ್ಲಿ ಆತಂಕವಿದ್ದರೆ ಯಾವೆಲ್ಲ ಲಕ್ಷಣಗಳನ್ನು ಕಾಣಿಸಿಕೊಳ್ಳುತ್ತವೆ ಎಂಬುದನ್ನು ತಿಳಿದುಕೊಳ್ಳಿ.

ಆಗಾಗ್ಗೆ ಹೊಟ್ಟೆ ನೋವು ಅಥವಾ ತಲೆನೋವು

ಕೆಲವೊಮ್ಮೆ ಮಗುವಿಗೆ ಯಾವುದೇ ಆರೋಗ್ಯ ಸಮಸ್ಯೆ ಇಲ್ಲದೆ ಹೊಟ್ಟೆ ನೋವು ಅಥವಾ ತಲೆನೋವು ಉಂಟಾಗಬಹುದು. ಇದರಿಂದ ಅವರು ವಿಶೇಷವಾಗಿ ಶಾಲೆಗೆ ಹೋಗುವ ಮೊದಲು ಅಥವಾ ಫಂಕ್ಷನ್‍ಗಳಿಗೆ ಹೋಗುವ ಮೊದಲು ವಾಕರಿಕೆ ಅಥವಾ ನಿರಂತರ ಆಯಾಸವನ್ನು ಅನುಭವಿಸುತ್ತಾರೆ. ಇವು ಮಾನಸಿಕ ಒತ್ತಡದ ದೇಹದ ಮೇಲೆ ಬೀರುವ ಪರಿಣಾಮಗಳನ್ನು ಪ್ರತಿಬಿಂಬಿಸುವ ಮಾನಸಿಕ ಲಕ್ಷಣಗಳಾಗಿರಬಹುದು ಎಂದು ವೈದ್ಯರು ಹೇಳುತ್ತಾರೆ. 

ಇದ್ದಕ್ಕಿದ್ದಂತೆ ಮೌನವಾಗುವುದು

ನಿಮ್ಮ ಮಗುವು ಈ ಹಿಂದೆ ಬೇರೆಯವರ ಜೊತೆ ಬೆರೆಯುವವನಾಗಿದ್ದು, ಇದ್ದಕ್ಕಿದ್ದಂತೆ ತನ್ನ ಸ್ನೇಹಿತರಿಂದ ದೂರವಾಗಲು ಶುರುಮಾಡಿದರೆ, ಒಂಟಿಯಾಗಿರಲು ಬಯಸಿದರೆ ಮತ್ತು ಕುಟುಂಬದವರೊಂದಿಗೆ ಸಹ ಕಡಿಮೆ ಮಾತನಾಡಲು ಶುರುಮಾಡಿದರೆ, ಇದನ್ನು ಆತಂಕದ ಸಂಕೇತವೆಂದು ಪರಿಗಣಿಸಲಾಗುತ್ತದೆ. ಏಕೆಂದರೆ ಅಂತಹ ಮಕ್ಕಳು ತಮ್ಮ ಆಲೋಚನೆಗಳಲ್ಲಿ ಮಗ್ನರಾಗಿರುತ್ತಾರೆ ಮತ್ತು ಯಾರೂ ತಮ್ಮನ್ನು ಅರ್ಥಮಾಡಿಕೊಳ್ಳಲು ಸಾಧ್ಯವಾಗುವುದಿಲ್ಲ ಎಂದು ಅವರು ಭಾವಿಸುತ್ತಾರೆ.

ನಿದ್ರೆಯ ಸಮಸ್ಯೆಗಳು

ಮಕ್ಕಳಲ್ಲಿ ನಿದ್ರಾ ಸಂಬಂಧಿತ ಸಮಸ್ಯೆಗಳು, ಉದಾಹರಣೆಗೆ ನಿದ್ರಿಸುವುದು ಕಷ್ಟವಾಗುವುದು, ಆಗಾಗ್ಗೆ ದುಃಸ್ವಪ್ನಗಳು, ರಾತ್ರಿಯಲ್ಲಿ ಆಗಾಗ್ಗೆ ಎಚ್ಚರಗೊಳ್ಳುವುದು ಅಥವಾ ಉತ್ತಮ ನಿದ್ರೆಯ ನಂತರ ದಣಿದ ಭಾವನೆ, ಇವು ಆತಂಕದ ಲಕ್ಷಣಗಳಾಗಿರಬಹುದು. ಆತಂಕವು ಮಕ್ಕಳ ನಿದ್ರೆಯ ಮೇಲೆ ನೇರವಾಗಿ ಪರಿಣಾಮ ಬೀರುತ್ತದೆ. ನಿದ್ರೆಯ ಕೊರತೆಯು ಕಿರಿಕಿರಿ, ದೌರ್ಬಲ್ಯ ಮತ್ತು ಕಳಪೆ ಶೈಕ್ಷಣಿಕ ಗಮನಕ್ಕೆ ಕಾರಣವಾಗಬಹುದು.

ಅಧ್ಯಯನದಲ್ಲಿ ಹಠಾತ್ ಇಳಿಕೆ

ಅನೇಕ ಪೋಷಕರು ತಮ್ಮ ಮಕ್ಕಳು ಈ ಹಿಂದೆ ಅಧ್ಯಯನದಲ್ಲಿ ಉತ್ತಮ ಸಾಧನೆ ಮಾಡುತ್ತಿದ್ದರು, ಆದರೆ ಇದ್ದಕ್ಕಿದ್ದಂತೆ ಅವರ ಅಧ್ಯಯನದ ಆಸಕ್ತಿ ಸಂಪೂರ್ಣವಾಗಿ ಕಳೆದುಕೊಂಡಿದ್ದಾರೆ ಎಂದು ಹೇಳುತ್ತಾರೆ. ಅಧ್ಯಯನದಲ್ಲಿ ಆಸಕ್ತಿಯ ಕೊರತೆ ಮತ್ತು ಗಮನಹರಿಸಲು ಅಸಮರ್ಥತೆ ಯಾವಾಗಲೂ ಸೋಮಾರಿತನದಿಂದ ಉಂಟಾಗುವುದಿಲ್ಲ, ಬದಲಿಗೆ, ಅವರಲ್ಲಿರುವ ಆತಂಕವು ಅವರು ನಿರಂತರವಾಗಿ ಕೆಟ್ಟ ಆಲೋಚನೆಗಳಲ್ಲಿ ತೊಡಗಿಸಿಕೊಳ್ಳಲು ಕಾರಣವಾಗಬಹುದು. ಇದು ಅವರ ಗಮನದ ಮೇಲೆ ಪರಿಣಾಮ ಬೀರುತ್ತದೆ.

ಪರಿಪೂರ್ಣವಾಗಿ ಕಾಣಲು ಪ್ರಯತ್ನಿಸುವುದು

ಕೆಲವು ಮಕ್ಕಳು ಎಲ್ಲವನ್ನೂ ಪರಿಪೂರ್ಣವಾಗಿ ಮಾಡಬೇಕೆಂಬ ಒತ್ತಡಕ್ಕೆ ಒಳಗಾಗುತ್ತಾರೆ. ಇದರಿಂದ ಅವರು ಸಣ್ಣ ತಪ್ಪುಗಳಿಗೂ ಅಳಲು, ಪದೇ ಪದೇ ತಮ್ಮ ಮನೆಕೆಲಸವನ್ನು ಪರಿಶೀಲಿಸಲು ಮತ್ತು ವಿಫಲರಾದಾಗ ಭಯಪಡಲು ಶುರುಮಾಡುತ್ತಾರೆ. ಅಂತಹ ಮಕ್ಕಳು ಹೆಚ್ಚಾಗಿ ಒತ್ತಡಕ್ಕೊಳಗಾಗುತ್ತಾರೆ. ಆದರೆ ಹೊರಗೆ ಪರಿಪೂರ್ಣರಾಗಿ ಕಾಣಿಸಿಕೊಳ್ಳಲು ಶ್ರಮಿಸುತ್ತಾರೆ.

ಅತಿಯಾದ ಕಿರಿಕಿರಿ ಅಥವಾ ಕೋಪ

ಆತಂಕವು ಪ್ರತಿ ಮಗುವಿನಲ್ಲಿ ದುಃಖ ಅಥವಾ ಮೌನದಿಂದ ಮಾತ್ರ ವ್ಯಕ್ತವಾಗುವುದಿಲ್ಲ, ಕೆಲವು ಮಕ್ಕಳಲ್ಲಿ, ಅದು ಕೋಪವಾಗಿಯೂ ವ್ಯಕ್ತವಾಗಬಹುದು. ಅಂತಹ ಸಂದರ್ಭಗಳಲ್ಲಿ, ಮಕ್ಕಳು ಕೋಪದಲ್ಲಿ ವಾದ ಮಾಡುವುದು, ಕೋಪದಲ್ಲಿ ವಸ್ತುಗಳನ್ನು ಎಸೆಯುವುದು ಮತ್ತು ಆಗಾಗ್ಗೆ ಅಸಮಾಧಾನಗೊಳ್ಳುತ್ತಾರೆ. ಇದು ಆತಂಕದ ಲಕ್ಷಣಗಳಾಗಿರಬಹುದು.