ಜಿಲ್ಲಾ-ತಾಲೂಕು ಪಂಚಾಯಿತಿಗೆ ಸದ್ಯದಲ್ಲೇ ಚುನಾವಣೆ | ಮೀಸಲಾತಿ ನಿಗಧಿ | ಭರದ ಸಿದ್ಧತೆ ನಡೆಸುತ್ತಿರುವ ಚುನಾವಣಾ ಆಯೋಗ

ಚಿತ್ರದುರ್ಗ ನ್ಯೂಸ್.ಕಾಂ: ಕಳೆದ ಎರಡು ವರ್ಷಗಳಿಂದ ಜಿಲ್ಲಾ ಹಾಗೂ ತಾಲೂಕು ಪಂಚಾಯಿತಿಗಳಿಗೆ ಚುನಾವಣೆ ನಡೆಯದೇ ಸ್ಥಳೀಯ ಸರ್ಕಾರ ಎಂದೇ ಗುರುತಿಸಿಕೊಂಡಿರುವ ಜಿಲ್ಲಾ ಹಾಗೂ ತಾಲೂಕು ಪಂಚಾಯಿತಿಗಳು ನಿಶ್ಯಬ್ದವಾಗಿಬಿಟ್ಟಿವೆ.

ಶಾಸಕರನ್ನು ಬಿಟ್ಟರೆ ಆನಂತರದ ಸ್ಥಾನದಲ್ಲಿ ಸಿಗುತ್ತಿದ್ದವರು ಜಿಲ್ಲಾ ಪಂಚಾಯಿತಿ ಹಾಘೂ ತಾಲೂಕು ಪಂಚಾಯಿತಿ ಸದಸ್ಯರು. ಆದರೆ, ಮೀಸಲಾತಿ, ಗಡಿ ನಿಗಧಿ ಸೇರಿದಂತೆ ಹಲವು ಕಾರಣಗಳಿಗೆ ಕಳೆದ ಎರಡು ವರ್ಷಗಳಿಂದ ಚುನಾವಣೆ ಮುಂದೂಡುತ್ತಲೇ ಬರಲಾಗಿದೆ.

ಇದನ್ನೂ ಓದಿ: ಲೋಕಸಭೆ ಚುನಾವಣೆಗೆ ಟಿಕೇಟ್ ಕೇಳಿದ್ದೇನೆ | ಎಂ.ಸಿ.ರಘುಚಂದನ್

ಅಂತಿಮವಾಗಿ ಹೈಕೋರ್ಟ್ ತರಾಟೆಗೆ ತೆಗೆದುಕೊಂಡ ನಂತರ ನಿವೃತ್ತ ಐಎಎಸ್ ಅಧಿಕಾರಿ ಕಾಂಬ್ಳೆ ಆಯೋಗದ ಕ್ಷೇತ್ರ ಪುನರ್ ವಿಂಗಡಣೆ ವರದಿಯನ್ನು ಕೋರ್ಟ್‍ಗೆ ಸಲ್ಲಿಕೆ ಮಾಡಲಾಗಿದೆ.

ಕ್ಷೇತ್ರ ಪುನರ್ ವಿಂಗಡಣೆ ಹಾಗೂ ಮೀಸಲಾತಿ ಪ್ರಕ್ರಿಯೆ ಪೂರ್ಣಗೊಳಿಸಲು ಇತ್ತೀಚೆಗೆ ಹೈಕೋರ್ಟ್ ನಾಲ್ಕು ವಾರಗಳ ಗಡುವು ನೀಡಿತ್ತು. ಈ ಹಿನ್ನೆಲೆಯಲ್ಲಿ ರಾಜ್ಯ ಸರ್ಕಾರದ ಪಂಚಾಯತ್‍ರಾಜ್ ಇಲಾಖೆ ಸಿದ್ಧತೆ ಮಾಡಿಕೊಳ್ಳುತ್ತಿದೆ.

ಇತ್ತ ಚುನಾವಣಾ ಆಯೋಗ ಕೂಡಾ ಜಿಪಂ, ತಾಪಂ ಚುನಾವಣೆಗೆ ಭರದ ಸಿದ್ಧತೆ ಮಾಡಿಕೊಂಡಿದ್ದು, ಲೋಕಸಭೆಗೆ ಮೊದಲೇ ಬಹುತೇಕ ಈ ಚುನಾವಣೆ ನಡೆಯುವುದು ಪಕ್ಕಾ ಆಗಿದೆ.

ಬಂದೇ ಬಿಟ್ಟಿತು ಜಿಲ್ಲಾವಾರು ಮೀಸಲಾತಿ ಪಟ್ಟಿ:

ಇದೆಲ್ಲದರ ನಡುವೆ ಪ್ರತಿ ಜಿಲ್ಲೆಯಲ್ಲಿರುವ ಒಟ್ಟು ಜಿಲ್ಲಾ ಪಂಚಾಯಿತಿ ಕ್ಷೇತ್ರಗಳ ಸಂಖ್ಯೆ, ಇದರಲ್ಲಿ ಶೇ.50 ರಷ್ಟು ಮಹಿಳೆಯರಿಗೆ ಮೀಸಲಿಟ್ಟು, ಆನಂತರ ಜಿಲ್ಲೆಯಲ್ಲಿ ಇಂತಿಂಥ ಸಮುದಾಯಕ್ಕೆ ಇಷ್ಟು ಸ್ಥಾನಗಳು ಎನ್ನುವ ಮೀಸಲಾತಿ ನಿಗಧಿ ಮಾಡಿ ರಾಜ್ಯ ಸರ್ಕಾರ ರಾಜ್ಯಪತ್ರ ಹೊರಡಿಸಿದೆ.

ಇದನ್ನೂ ಓದಿ: ಲೋಕಸಭೆಗೆ ಕಾಂಗ್ರೆಸ್ ಅಭ್ಯರ್ಥಿಯಾಗಲು 2 ಡಜನ್ ಆಕಾಂಕ್ಷಿಗಳು

2023 ಡಿಸೆಂಬರ್ 19ರ ರಾಜ್ಯಪತ್ರದಲ್ಲಿ ಜಿಲ್ಲಾ ಹಾಗೂ ತಾಲೂಕು ಪಂಚಾಯಿತಿಗಳ ಒಟ್ಟು ಸ್ಥಾನ, ಅದರಲ್ಲಿ ಯಾವ ವರ್ಗಕ್ಕೆ ಎಷ್ಟು ಸ್ಥಾನಗಳು ಮೀಸಲು ಎನ್ನುವ ಅಧಿಕೃತ ಪಟ್ಟಿ ಹೊರಬಿದ್ದಿದೆ.

ಚಿತ್ರದುರ್ಗ ಜಿಲ್ಲೆಯಲ್ಲಿ ಯಾವ ವರ್ಗಕ್ಕೆ ಎಷ್ಟು ಸ್ಥಾನ:

ಚಿತ್ರದುರ್ಗ ಜಿಲ್ಲಾ ಪಂಚಾಯಿತಿಗೆ ಒಟ್ಟು ಸದಸ್ಯ ಸ್ಥಾನ 37 ಇದ್ದು, ಇದರಲ್ಲಿ ಶೇ.50 ರಷ್ಟು ಮಹಿಳೆಯರಿಗೆ ಮೀಸಲು ಅಂದರೆ, 19 ಸ್ಥಾನಗಳಿಗೆ ಮಹಿಳಾ ಮೀಸಲಾತಿ ಇದೆ.

ಒಟ್ಟು 37 ಸ್ಥಾನಗಳ ಪೈಕಿ ಅನುಸೂಚಿತ ಜಾತಿಗೆ 9 ಸದಸ್ಯ ಸ್ಥಾನಗಳನ್ನು ನಿಗಧಿ ಮಾಡಿದೆ. ಈ 9 ಸ್ಥಾನಗಳಲ್ಲಿ ಮಹಿಳೆಗೆ 5 ಸ್ಥಾನ ಮೀಸಲಾಗಿವೆ. ಅನುಸೂಚಿತ ಪಂಗಡಕ್ಕೆ 7 ಸದಸ್ಯ ಸ್ಥಾನಗಳನ್ನು ಮೀಸಲಿಟ್ಟಿದ್ದು ಇದರಲ್ಲಿ ಮಹಿಳೆಗೆ 4 ಸ್ಥಾನಗಳು ನಿಗಧಿಯಾಗಿವೆ. ಹಿಂದುಳಿದ ವರ್ಗ ‘ಅ’ 2 ಸದಸ್ಯ ಸ್ಥಾನಗಳಿದ್ದು, ಇದರಲ್ಲಿ 1 ಸ್ಥಾನ ಮಹಿಳಾ ಮೀಸಲು. ಉಳಿದ 19 ಸ್ಥಾನಗಳು ಸಾಮಾನ್ಯ ವರ್ಗಕ್ಕೆ ಮೀಸಲಾಗಿವೆ. ಇದರಲ್ಲಿ 9 ಸದಸ್ಯ ಸ್ಥಾನಗಳು ಮಹಿಳಾ ಮೀಸಲಾತಿಗೆ ಒಳಪಟ್ಟಿವೆ.

ಜಿಲ್ಲೆಯ ಒಟ್ಟು ಸದಸ್ಯ ಸ್ಥಾನಗಳಲ್ಲಿ ಪರಿಶಿಷ್ಟ ಜಾತಿ, ಪಂಗಡ, ಸಾಮಾನ್ಯ ಹಾಗೂ ಪ್ರವರ್ಗಕ್ಕೆ ಸ್ಥಾನಗಳನ್ನು ನಿಗಧಿ ಮಾಡಲಾಗಿದೆ. ಇದರಲ್ಲಿ ಯಾವ ಕ್ಷೇತ್ರಕ್ಕೆ ಯಾವ ಮೀಸಲಾತಿ ಎನ್ನುವುದು ಇನ್ನೂ ನಿಗಧಿಯಾಗಿಲ್ಲ.

ತಾಲೂಕು ಪಂಚಾಯಿತಿ ಮೀಸಲಾತಿಗಳ ವಿವರ:

ಇನ್ನೂ ಜಿಲ್ಲಾ ಪಂಚಾಯಿತಿ ಜೊತೆ ಜೊತೆಗೆ ನಡೆಯುವ ತಾಲೂಕು ಪಂಚಾಯಿತಿ ಚುನಾವಣೆಗೂ ಮೀಸಲಾತಿ ನಿಗಧಿಯಾಗಿದೆ.

ಚಿತ್ರದುರ್ಗ ಜಿಲ್ಲೆಯ 6 ತಾಲೂಕು ಪಂಚಾಯಿತಿಗಳಿಗೆ ಒಟ್ಟು 125 ಸದಸ್ಯ ಸ್ಥಾನಗಳು ನಿಗಧಿಯಾಗಿದ್ದು, ಇದರಲ್ಲಿ 65 ಸದಸ್ಯ ಸ್ಥಾನಗಳು ಮಹಿಳೆಗೆ ಮೀಸಲಾಗಿವೆ.

ಇದನ್ನೂ ಓದಿ: ಅಖಾಡಕ್ಕಿಳಿದ ಆರ್.ಬಿ.ತಿಮ್ಮಾಪುರ ಅಂಡ್ ಸನ್

ಯಾವ ತಾಲೂಕಿಗೆ ಎಷ್ಟು ಸ್ಥಾನ, ಯಾರಿಗೆ ಎಷ್ಟು ಮೀಸಲು:

ಮೊಳಕಾಲ್ಮೂರು ತಾಲೂಕಿಗೆ ಒಟ್ಟು 13 ತಾಲೂಕು ಪಂಚಾಯಿತಿ ಸದಸ್ಯ ಸ್ಥಾನಗಳಿದ್ದು, ಇದರಲ್ಲಿ 7 ಮಹಿಳೆಗೆ ಮೀಸಲಾಗಿವೆ. ಅನುಸೂಚಿತ ಜಾತಿಗೆ 2 ಸ್ಥಾನಗಳಿದ್ದು, 1 ಮಹಿಳೆಗೆ, ಅನುಸೂಚಿತ ಪಂಗಡಕ್ಕೆ 4 ಸ್ಥಾನಗಳಿದ್ದು, 2 ಮಹಿಳಾ ಮೀಸಲು. ಸಾಮಾನ್ಯ ವರ್ಗಕ್ಕೆ 7 ಸ್ಥಾನಗಳ ಪೈಕಿ 4 ಮಹಿಳಾ ಮೀಸಲಾತಿ ಪಡೆದುಕೊಂಡಿವೆ.

ಹೊಳಲ್ಕೆರೆ ತಾಲೂಕು ಪಂಚಾಯಿತಿಯ 19 ಸದಸ್ಯ ಸ್ಥಾನಗಳಲ್ಲಿ 10 ಮಹಿಳೆಗೆ. ಅನುಸೂಚಿತ ಜಾತಿಗೆ 5 ನಿಗಧಿಯಾಗಿದ್ದು, 3 ಮಹಿಳಾ ಮೀಸಲು. ಅನುಸೂಚಿತ ಪಂಗಡಕ್ಕೆ 2 ಸ್ಥಾನ, ಇದರಲ್ಲಿ 1 ಮಹಿಳೆಗೆ, ಹಿಂದುಳಿದ ವರ್ಗ ‘ಅ’ 2 ಸ್ಥಾನ ಇದರಲ್ಲಿ 1 ಮಹಿಳಾ ಮೀಸಲು. 10 ಸ್ಥಾನಗಳು ಸಾಮಾನ್ಯವಾಗಿದ್ದು, 5 ಮಹಿಳಾ ಮೀಸಲು.

ಹೊಸದುರ್ಗ ತಾಲೂಕು ಪಂಚಾಯಿತಿಗೆ 21 ಸದಸ್ಯ ಸ್ಥಾನಗಳಿದ್ದು, ಇದರಲ್ಲಿ ಅನುಸೂಚಿತ ಜಾತಿಗೆ 5, ಇದರಲ್ಲಿ 3 ಮಹಿಳಾ ಮೀಸಲು. ಅನುಸೂಚಿತ ಪಂಗಡಕ್ಕೆ 1 ಸ್ಥಾನವಿದ್ದು, ಅದು ಮಹಿಳೆಗೆ ಮೀಸಲಾಗಿದೆ. ಹಿಂದುಳಿದ ವರ್ಗ ‘ಅ’ಗೆ 2 ಸ್ಥಾನ, 1 ಮಹಿಳಾ ಮೀಸಲು, ಹಿಂದುಳಿದ ವರ್ಗ ‘ಬ’ 1 ಸ್ಥಾನವಿದ್ದು, ಅದು ಮಹಿಳಾ ಮೀಸಲು ಉಳಿದ 11 ಸ್ಥಾನಗಳು ಸಾಮಾನ್ಯ ವರ್ಗಕ್ಕೆ, ಇದರಲ್ಲಿ 5 ಮಹಿಳೆಯರಿಗೆ.

ಚಿತ್ರದುರ್ಗ ತಾಲೂಕು ಪಂಚಾಯಿತಿಗೆ 24 ಸದಸ್ಯ ಸ್ಥಾನ, ಅನುಸೂಚಿತ ಜಾತಿಗೆ 7, ಇದರಲ್ಲಿ 4 ಮಹಿಳೆಗೆ, ಅನುಸೂಚಿತ ಪಂಗಡಕ್ಕೆ 5 ಸ್ಥಾನ, 3 ಮಹಿಳೆಗೆ. ಸಾಮಾನ್ಯ ವರ್ಗಕ್ಕೆ 12 ಸ್ಥಾನಗಳಿದ್ದು, 5 ಮಹಿಳಾ ಮೀಸಲಾತಿ ಇವೆ.

ಚಳ್ಳಕೆರೆ ತಾಲೂಕು ಪಂಚಾಯಿತಿಯ 25 ಸ್ಥಾನಗಳಲ್ಲಿ ಅನುಸೂಚಿತ ಜಾತಿಗೆ 5, 3 ಮಹಿಳೆಗೆ, ಅನುಸೂಚಿತ ಪಂಗಡಕ್ಕೆ 7, ಇದರಲ್ಲಿ 4 ಮಹಿಳೆಗೆ. ಸಾಮಾನ್ಯ ವರ್ಗಕ್ಕೆ 13 ಸ್ಥಾನಗಳಿದ್ದು, 6 ಮಹಿಳಾ ಮೀಸಲು.

ಹಿರಿಯೂರು ತಾಲೂಕುಗೆ 23 ಸದಸ್ಯ ಸ್ಥಾನಗಳಿದ್ದು, ಅನುಸೂಚಿತ ಜಾತಿಗೆ 6 ಸ್ಥಾನ, ಅನುಸೂಚಿತ ಪಂಗಡಕ್ಕೆ 2 ಸ್ಥಾನ, ಇದರಲ್ಲಿ 1 ಮಹಿಳಾ ಮೀಸಲು, ಹಿಂದುಳಿದ ವರ್ಗ ‘ಅ’ 2 ಸ್ಥಾನಗಳಿದ್ದು, 1 ಮಹಿಳಾ ಮೀಸಲು. ಹಿಂದುಳಿದ ವರ್ಗ ‘ಬ’ 1 ಸ್ಥಾನವಿದ್ದು, ಅದೂ ಮಹಿಳಾ ಮೀಸಲಾಗಿದೆ.