ಹೊಸದುರ್ಗ ಬಂದ್‌ | ಇಂದು ಅಂತ್ಯವಲ್ಲ, ಆರಂಭ | ಸದ್ಗುರು ಪ್ರದೀಪ್‌

CHITRADURGA NEWS | 28 JUNE 2029

ಹೊಸದುರ್ಗ: ಬಯಲು ಸೀಮೆ ಎಂಬ ಹೆಸರು ಹೊಂದಿರುವ ಹೊಸದುರ್ಗ ತಾಲೂಕು ಮಲೆನಾಡು ಆಗುವವರೆಗೆ ನಮ್ಮ ಹೋರಾಟ ಇರಬೇಕು ಎಂದು ಉದ್ಯಮಿ, ಸದ್ಗುರು ಆಯುರ್ವೇದ ಸೋಪ್‌ ಸಂಸ್ಥೆಯ ಡಿ.ಎಸ್‌.ಪ್ರದೀಪ್‌ ಹೇಳಿದರು.

ಭದ್ರಾ ಜಲಾಶಯದಿಂದ ಹೊಸದುರ್ಗ ಪಟ್ಟಣಕ್ಕೆ ಕುಡಿಯುವ ನೀರು ಸರಬರಾಜು ಕಾಮಗಾರಿಗೆ ದಾವಣಗೆರೆ ರೈತರ ಅಡ್ಡಿ ಹಿನ್ನೆಲೆಯಲ್ಲಿ ಕರೆ ನೀಡಿದ್ದ ಬಂದ್‌ನಲ್ಲಿ ಭಾಗವಹಿಸಿ ಮಾತನಾಡಿದರು.

ಇದನ್ನೂ ಓದಿ: ಹೊಸದುರ್ಗ ಬಂದ್ | ಶಾಸಕ ಬಿ.ಜಿ.ಗೋವಿಂದಪ್ಪ ನೇತೃತ್ವದಲ್ಲಿ ಹೋರಾಟ

ನೀರು ಪಡೆಯಲು ನಮ್ಮ ಹೋರಾಟ ನಿರಂತರವಾಗಿರುತ್ತದೆ. ಇದು ಅಂತ್ಯವಲ್ಲ, ಆರಂಭ ಎಂದ ಅವರು, ನಮಗೆ ನೀರು ಬರಲೇಬೇಕು. ಮುಂದಿನ ಪೀಳಿಗೆಗೆ ಹೊಸದುರ್ಗ ಮಲೆನಾಡಾಗಬೇಕು ಎಂದರು.

ದಾವಣಗೆರೆ, ಶಿವಮೊಗ್ಗ ಜಿಲ್ಲೆಗಳಲ್ಲೂ ಅಡಿಕೆ ಬೆಳೆಯುತ್ತಾರೆ. ಸಾಕಷ್ಟು ನೀರಿದೆ. ಸುಲಭವಾಗಿ ಬೆಳೆಯುತ್ತಾರೆ. ನಮ್ಮ ರೈತರು ಬೋರ್‌ವೆಲ್‌ಗಳಲ್ಲಿ ಬಹಳ ಕಷ್ಟಪಟ್ಟು ಬೆಳೆ ಬೆಳೆಯುತ್ತಾರೆ. ಆ ಭಾಗದಲ್ಲಿ ಮೂರಂತಸ್ಥಿನ ಕಟ್ಟಡಗಳು ಕಾಣಿಸುತ್ತವೆ. ನಮ್ಮ ಜನ ಇನ್ನೂ ಗುಡಿಸಲಿನಲ್ಲಿದ್ದಾರೆ ಎಂದು ಹೇಳಿದರು.

ಇದನ್ನೂ ಓದಿ: ಹೊಸದುರ್ಗ ಸ್ಥಿತಿ ಸಮುದ್ರದ ನೆಂಟಸ್ಥನ, ಉಪ್ಪಿಗೆ ಬರ | ಕೆ.ಎಸ್.ನವೀನ್

ಹಿರಿಯ ಪತ್ರಕರ್ತ ಚಿಕ್ಕಪ್ಪನಹಳ್ಳಿ ಷಣ್ಮುಖಪ್ಪ ಮಾತನಾಡಿ, ಹೊಸದುರ್ಗ ತಾಲೂಕಿನ ಒಂದು ಟಿಎಂಸಿ ಕುಡಿಯುವ ನೀರಿನ ಯೋಜನೆಗೆ ಸರ್ಕಾರ ಅಡ್ಡಿ ಮಾಡಿಲ್ಲ. ಅಡ್ಡಿಯಾಗಿರುವುದು ದಾವಣಗೆರೆಯ ಕೆಲವರು ಮಾತ್ರ. ಇದು ಕಿಡಿಗೇಡಿತನ ಎಂದರು.

ಕುಡಿಯುವ ಉದ್ದೇಶಕ್ಕೆ ಕಾಲುವೆಯಲ್ಲಿನ ಒಂದು ಬೊಗಸೆ ನೀರು ತೆಗೆದುಕೊಂಡರೆ ಅವರಿಗೆ ಯಾವ ನಷ್ಟವೂ ಆಗುವುದಿಲ್ಲ. ಶಾಸಕರಾದ ಬಿ.ಜಿ.ಗೋವಿಂದಪ್ಪ ವಿಶೇಷ ಆಸಕ್ತಿ ವಹಿಸಿ ಈ ಯೋಜನೆ ಜಾರಿ ಮಾಡಿಸಿದ್ದಾರೆ.

ಇದನ್ನೂ ಓದಿ: ಹೊಸದುರ್ಗ ಬಂದ್ | ನೀರಿಗೆ ಅಡ್ಡಿ ಕಿಡಿಗೇಡಿ ಕೃತ್ಯ | ಎಸ್.ಲಿಂಗಮೂರ್ತಿ

ಹೊಸದುರ್ಗಕ್ಕೆ ಬರುವ 30 ಕ್ಯೂಸೆಕ್‌ ನೀರಿನಿಂದ ದಾವಣಗೆರೆ ಜಿಲ್ಲೆಯ ಕೊನೆ ಭಾಗದ ರೈತರಿಗೆ ನೀರು ತಲುಪುವುದಿಲ್ಲ ಎನ್ನುವ ವಾದದಲ್ಲಿ ಯಾವುದೇ ಹುರುಳಿಲ್ಲ ಎಂದು ಹೇಳಿದರು.

ಮುಖಂಡರಾದ ತುಂಬಿನಕೆರೆ ಬಸವರಾಜ್‌, ಜೆಡಿಎಸ್‌ ತಾಲೂಕು ಅಧ್ಯಕ್ಷ ಗಣೇಶ್‌, ಕಾರೇಹಳ್ಳಿ ಬಸವರಾಜ್‌ ಸೇರಿದಂತೆ ರೈತ ಮುಖಂಡರು, ಕನ್ನಡಪರ ಸಂಘಟನೆಗಳ ಮುಖಂಡರು ಮಾತನಾಡಿದರು.