ಖೈದಿಗಳಿಂದ ಜೈಲು ಸಿಬ್ಬಂದಿ ಮೇಲೆ ಹಲ್ಲೆ | ದೂರು ದಾಖಲು | ಕಾರಾಗೃಹಕ್ಕೆ ಪೊಲೀಸರ ಭೇಟಿ | ಮೊಬೈಲ್‌, ಗಾಂಜಾ ಜಪ್ತಿ

CHITRADURGA NEWS | 22 JUNE 2025

ಚಿತ್ರದುರ್ಗ: ಜಿಲ್ಲಾ ಕಾರಾಗೃಹದ ಪರಿಶೀಲನೆ ವೇಳೆ ಖೈದಿಗಳು ಪೊಲೀಸರು ಹಾಗೂ ಜೈಲು ಸಿಬ್ಬಂದಿ ಮೇಲೆ ಹಲ್ಲೆ ನಡೆಸಿ ಜೀವ ಬೆದರಿಕೆ ಹಾಕಿರುವ ಘಟನೆ ನಡೆದಿದೆ.

Also Read: ಮಳೆಗಾಲದಲ್ಲಿ ಮಕ್ಕಳ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಿಕೊಳ್ಳಲು ಈ ಮಾರ್ಗಗಳನ್ನು ಅನುಸರಿಸಿ

ಕಾರಾಗೃಹ ಪರಿಶೀಲನೆ ವೇಳೆ ಸಿಬ್ಬಂದಿಗಳಾದ ರಾಮಣ್ಣ ಹರೇಕಲ್‌, ದಾದಾಪೀರ್‌, ಖುತುಬುದ್ದೀನ್‌ ವಾಲಿಕರ್‌, ವೆಂಕಟೇಶ್‌, ಪೊಲೀಸ್‌ ಸಿಬ್ಬಂದಿ ಭರತ್‌ಕುಮಾರ್‌ ಮೇಲೆ ಹಲ್ಲೆ, ಅವಾಚ್ಯ ಶಬ್ದಗಳಿಂದ ನಿಂದನೆ ಹಾಗೂ ಜೀವ ಬೆದರಿಕೆ ಹಾಕಲಾಗಿದೆ.

ಈ ಆರೋಪದಡಿ ವಿಚಾರಣಾಧೀನ ಬಂಧಿಗಳಾದ ಖಲಂದರ್‌, ಷಫೀವುಲ್ಲಾ, ತಿಮ್ಮೇಶ್‌, ಆಬೀದ್‌ ಖಾನ್‌, ಶಾಹಿದ್‌ ಖುರೇಷಿ ವಿರುದ್ಧ ಚಿತ್ರದುರ್ಗದ ಬಡಾವಣೆ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಿಸಲಾಗಿದೆ.

Also Read: ಆಲೂಗಡ್ಡೆ ಬೇಯಿಸುವಾಗ ನೀವು ಈ ಟ್ರಿಕ್‍ ಬಳಸಿ

ಹಲ್ಲೆಗೊಳಗಾದ ಸಿಬ್ಬಂದಿಗಳು ಜಿಲ್ಲಾ ಆಸ್ಪತ್ರೆಯಲ್ಲಿ ದಾಖಲಾಗಿ ಚಿಕಿತ್ಸೆ ಪಡೆದುಕೊಂಡಿದ್ದಾರೆ.

ಎಸ್ಪಿ ರಂಜಿತ್‌ಕುಮಾರ್‌ ನೇತೃತ್ವದಲ್ಲಿ ಪೊಲೀಸರ ಭೇಟಿ:

ಜಿಲ್ಲಾ ಕೇಂದ್ರ ಕಾರಾಗೃಹದಲ್ಲಿ ನಿಯಮಬಾಹೀರ ಚಟುವಟಿಕೆಗಳು ನಡೆಯುತ್ತಿವೆ ಎನ್ನುವ ಖಚಿತ ಮಾಹಿತಿ ಹಿನ್ನೆಲೆಯಲ್ಲಿ ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ರಂಜಿತ್‌ ಕುಮಾರ್‌ ಬಂಡಾರು ನೇತೃತ್ವದ ಪೊಲೀಸ್‌ ಅಧಿಕಾರಿಗಳ ತಂಡ ಭೇಟಿ ನೀಡಿ ಪರಿಶೀಲನೆ ನಡೆಸಿತು.

ಪರಿಶೀಲನೆ ವೇಳೆ 60 ಗ್ರಾಂ ಒಣ ಗಾಂಜಾ, ಗಾಂಜಾ ಸೇವನೆ ಮಾಡುವ ಚಿಮಣಿ, ಮೂರು ಮೊಬೈಲ್‌ ಫೋನ್‌ಗಳು, ಬೀಡಿ ಕಟ್ಟುಗಳು, ಬೆಂಕಿ ಪೊಟ್ಟಣಗಳನ್ನು ವಶಕ್ಕೆ ಪಡೆದುಕೊಳ್ಳಲಾಗಿದೆ.

Also Read: ಗರ್ಭಪಾತದ ನಂತರ ಬೇಗನೆ ಚೇತರಿಸಿಕೊಳ್ಳಲು ಈ ಸಲಹೆ ಅನುಸರಿಸಿ

ಸದರಿ ಪ್ರಕರಣದಲ್ಲಿ ವಿಚಾರಣಾಧೀನ ಬಂಧಿಗಳಾದ ಶಿವಮೊಗ್ಗ ಜಿಲ್ಲೆಯ ಅಬೀದ್‌ ಖಾನ್‌, ಶಾಹೀದ್‌ ಖುರೇಶಿ ವಿರುದ್ಧ ಚಿತ್ರದುರ್ಗದ ಬಡಾವಣೆ ಪೊಲೀಸ್‌ ಠಾಣೆಯಲ್ಲಿ ಎನ್‌ಡಿಪಿಎಸ್‌ ಕಾಯ್ದೆ ಅಡಿಯಲ್ಲಿ ದೂರು ದಾಖಲಿಸಲಾಗಿದೆ.

ದಾಳಿ ವೇಳೆ ಚಿತ್ರದುರ್ಗ ಪ್ರಭಾರ ಪೊಲೀಸ್‌ ಉಪಾಧೀಕ್ಷಕ ಈಶ್ವರ ನಾಯ್ಕ್‌, ಹಿರಿಯೂರು ಡಿವೈಎಸ್‌ಪಿ ಟಿ.ಎಂ.ಶಿವಕುಮಾರ್‌, ಮೂವರು ಸಿಪಿಐ, ಮೂವರು ಪಿಎಸ್‌ಐ, 22 ಸಿಬ್ಬಂದಿಗಳ 5 ತಂಡಗಳನ್ನು ರಚಿಸಲಾಗಿತ್ತು.