ಮುಲ್ತಾನಿ ಮಿಟ್ಟಿಗೆ ತಿನ್ನುವುದು ಆರೋಗ್ಯಕ್ಕೆ ಒಳ್ಳೆಯದೇ?

CHITRADURGA NEWS | 10 may 2025

ಮುಲ್ತಾನಿ ಮಿಟ್ಟಿಯನ್ನು ಭಾರತದಲ್ಲಿ ಶತಮಾನಗಳಿಂದ ಚರ್ಮ ಮತ್ತು ಕೂದಲಿಗೆ ಬಳಸಲಾಗುತ್ತದೆ. ಈ ಜೇಡಿಮಣ್ಣು ವಿಶೇಷವಾಗಿ ಮುಖದ ಆಳವಾದ ಶುದ್ಧೀಕರಣ, ಮೊಡವೆಗಳನ್ನು ನಿವಾರಿಸುವುದು, ಚರ್ಮದ ಟೋನ್ ಸುಧಾರಿಸುವುದು ಮತ್ತು ಕೂದಲಿನ ಬೇರುಗಳನ್ನು ಬಲಪಡಿಸಲು ಹೆಸರುವಾಸಿಯಾಗಿದೆ.

ಬೇಸಿಗೆಯಲ್ಲಿ, ದೇಹದ ಶಾಖವನ್ನು ತಂಪಾಗಿಸಲು ಜನರು ಇದನ್ನು ಹಚ್ಚುತ್ತಾರೆ. ಈ ಜೇಡಿಮಣ್ಣನ್ನು ಚರ್ಮಕ್ಕೆ ತಂಪು ಮತ್ತು ಶುದ್ಧವೆಂದು ಪರಿಗಣಿಸಲಾಗುತ್ತದೆ. ಹಾಗಾಗಿ ಇಂದಿಗೂ ಅನೇಕ ಜನರು ಇದನ್ನು ತಮ್ಮ ಚರ್ಮದ ಆರೈಕೆಯ ದಿನಚರಿಯಲ್ಲಿ ಸೇರಿಸುತ್ತಾರೆ. ಆದರೆ ಕೆಲವರು, ಮುಲ್ತಾನಿ ಮಿಟ್ಟಿಯನ್ನು ತಿನ್ನುತ್ತಾರೆ. ಆದರೆ ಮುಲ್ತಾನಿ ಮಿಟ್ಟಿ ತಿನ್ನುವುದು ಸುರಕ್ಷಿತವೇ?

ಇದು ದೇಹಕ್ಕೆ ಯಾವುದೇ ಪ್ರಯೋಜನವನ್ನು ನೀಡುತ್ತದೆಯೇ ಅಥವಾ ಗಂಭೀರ ಅಡ್ಡಪರಿಣಾಮಗಳನ್ನು ಉಂಟುಮಾಡಬಹುದೇ? ಎಂಬುದನ್ನು ಮೊದಲು ತಿಳಿದುಕೊಳ್ಳಿ.

ಆಯುರ್ವೇದದಲ್ಲಿ ಮುಲ್ತಾನಿ ಮಿಟ್ಟಿಯನ್ನು ದೇಹದ ಶಾಖವನ್ನು ತೆಗೆದುಹಾಕಲು, ಚರ್ಮದ ಕಾಯಿಲೆಗಳನ್ನು ಕಡಿಮೆ ಮಾಡಲು ಬಾಹ್ಯ ಬಳಕೆಗಾಗಿ ಮಾತ್ರ ಬಳಸಲು ಹೇಳಲಾಗುತ್ತದೆ. ಆದರೆ ಅದನ್ನು ತಿನ್ನುವ ಬಗ್ಗೆ ಯಾವುದೇ ಉಲ್ಲೇಖವಿಲ್ಲ. ಇದು ದೇಹದ ಮೇಲೆ ಅಡ್ಡಪರಿಣಾಮಗಳನ್ನು ಉಂಟುಮಾಡಬಹುದು ಎನ್ನಲಾಗಿದೆ.

ಇದು ಜೀರ್ಣಾಂಗ ವ್ಯವಸ್ಥೆಯ ಮೇಲೆ ಪರಿಣಾಮ ಬೀರುತ್ತದೆ

ಮುಲ್ತಾನಿ ಮಿಟ್ಟಿ ಜೇಡಿಮಣ್ಣಾದ ಕಾರಣ ಈ ಮಣ್ಣು ದಪ್ಪವಾಗಿರುತ್ತದೆ ಮತ್ತು ಜೀರ್ಣವಾಗುವುದಿಲ್ಲ. ಇದು ಮಲಬದ್ಧತೆಗೆ ಕಾರಣವಾಗುತ್ತದೆ. ಮತ್ತು ಅಜೀರ್ಣದಂತಹ ಸಮಸ್ಯೆಗಳು ಬರಬಹುದು. ಇದನ್ನು ಸೇವಿಸುವುದರಿಂದ ಕರುಳಿನ ಸಮಸ್ಯೆ ಕಾಡಬಹುದು.

ಮೂಳೆಗಳಲ್ಲಿ ದೌರ್ಬಲ್ಯ

ಇದರಲ್ಲಿರುವ ಅಂಶಗಳು ಮತ್ತು ಇತರ ಭಾರವಾದ ಲೋಹಗಳು ದೇಹದಲ್ಲಿ ಕ್ಯಾಲ್ಸಿಯಂ ಹೀರಿಕೊಳ್ಳುವಿಕೆಯ ಮೇಲೆ ಪರಿಣಾಮ ಬೀರುತ್ತವೆ. ಇದು ಮೂಳೆ ದೌರ್ಬಲ್ಯ, ಕೀಲು ನೋವುಗಳಿಗೆ ಕಾರಣವಾಗುತ್ತವೆ. ಆಸ್ಟಿಯೊಪೊರೋಸಿಸ್ ಅಂತಹ ಸಮಸ್ಯೆ ಬರಬಹುದು.

ವಿಷಕಾರಿ ಅಂಶಗಳಿಗೆ ಒಡ್ಡಿಕೊಳ್ಳುವುದು

ಅನೇಕ ಬಾರಿ ಆರ್ಸೆನಿಕ್, ಸೀಸ ಮತ್ತು ಇತರ ಭಾರವಾದ ಲೋಹಗಳು ಮುಲ್ತಾನಿ ಜೇಡಿಮಣ್ಣಿನಲ್ಲಿ ಇರಬಹುದು. ಇದು ದೇಹಕ್ಕೆ ಸೇರಿ ನಿಧಾನವಾಗಿ ಜೀವಾಣುಗಳಂತೆ ಕಾರ್ಯನಿರ್ವಹಿಸುತ್ತದೆ. ಇದು ಯಕೃತ್ತು, ಮೂತ್ರಪಿಂಡಗಳು ಮತ್ತು ಮೆದುಳಿನ ಮೇಲೆ ಪರಿಣಾಮ ಬೀರಬಹುದು.

ರಕ್ತಹೀನತೆ

ಮುಲ್ತಾನಿ ಮಿಟ್ಟಿಯನ್ನು ದೀರ್ಘಕಾಲ ತಿನ್ನುವುದರಿಂದ ದೇಹದಲ್ಲಿ ಕಬ್ಬಿಣದ ಕೊರತೆ ಉಂಟಾಗುತ್ತದೆ. ಏಕೆಂದರೆ ಮಣ್ಣು ಕರುಳಿನಿಂದ ಪೋಷಕಾಂಶಗಳನ್ನು ಹೀರಿಕೊಳ್ಳಲು ಅಡ್ಡಿಯಾಗುತ್ತದೆ. ಇದು ರಕ್ತಹೀನತೆಗೆ ಕಾರಣವಾಗಬಹುದು. ಹಾಗಾಗಿ ಮುಲ್ತಾನಿ ಮಿಟ್ಟಿಯನ್ನು ತಿನ್ನುವುದನ್ನು ಇಂದೇ ನಿಲ್ಲಿಸಿ.