ಬಾಲಕಿ ಬೆನ್ನ ಮೇಲೆ ಟಾಯ್ಲೆಟ್ ಕ್ಲೀನಿಂಗ್‌ ಆಸಿಡ್ | ಶಾಲೆ ತೆರೆದ ಮೊದಲ ದಿನವೇ ಅವಘಡ | ಮುಖ್ಯ ಶಿಕ್ಷಕರ ಮೇಲೆ ಗ್ರಾಮಸ್ಥರ ಆಕ್ರೋಶ

ಚಿತ್ರದುರ್ಗ ನ್ಯೂಸ್.ಕಾಂ: ದಸರಾ ರಜೆ ಮುಗಿಸಿ‌ ಶಾಲೆಯ ಬಾಗಿಲು ತೆರೆದ ಮೊದಲ‌ ದಿನವೇ ಅವಘಡವೊಂದು ನಡೆದಿದೆ.

ಚಿತ್ರದುರ್ಗ ತಾಲೂಕಿನ‌ ಜೋಡಿಚಿಕ್ಕೇನಹಳ್ಳಿ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯ 2ನೇ ತರಗತಿ ಬಾಲಕಿ ಬೆನ್ನ ಮೇಲೆ ಶೌಚಾಲಯ(Toilet) ಸ್ವಚ್ಛಗೊಳಿಸುವ‌ ಆಸಿಡ್ ಬಿದ್ದು ಗಾಯಗೊಂಡಿದ್ದಾಳೆ.

ಜೋಡಿಚಿಕ್ಕೇನಹಳ್ಳಿ ಗ್ರಾಮದ 8 ವರ್ಷದ ಸಿಂಚನಾ ಗಾಯಗೊಂಡ ಬಾಲಕಿಯಾಗಿದ್ದು, ಚಿತ್ರದುರ್ಗ ಜಿಲ್ಲಾ‌‌ ಆಸ್ಪತ್ರೆಯಲ್ಲಿ‌ ಚಿಕಿತ್ಸೆ ಪಡೆಯುತ್ತಿದ್ದಾಳೆ.

ಈ ಪ್ರಕರಣದ ಬಗ್ಗೆ ಶಿಕ್ಷಣ ಇಲಾಖೆ ಹಾಗೂ‌ ಗ್ರಾಮಸ್ಥರು ಪರಸ್ಪರ ಭಿನ್ನ ಹೇಳಿಕೆ ನೀಡುತ್ತಿದ್ದಾರೆ.

ರಜೆಯ ನಂತರ ಶಾಲೆ ತೆರೆದಿದ್ದು, ಈ ವೇಳೆ‌ ಸ್ವಚ್ಛತಾ ಕಾರ್ಯ‌ ನಡೆದಿದೆ. ಬಾಲಕಿ ಶೌಚಾಲಯ ಸ್ವಚ್ಛಗೊಳಿಸಲಿಲ್ಲ ಎನ್ನುವ ಕಾರಣಕ್ಕೆ ಮುಖ್ಯ ಶಿಕ್ಷಕರಾದ ಜಿ.ರಂಗಸ್ವಾಮಿ ಅವರು ಬಾಲಕಿ‌ ಆಸಿಡ್ ಎರಚಿದ್ದಾರೆ ಎನ್ನುವ ಆರೋಪ ಕೇಳಿ‌ ಬಂದಿದೆ.

ಆದರೆ, ಮುಖ್ಯ ಶಿಕ್ಷಕ ಆರೋಪವನ್ನು‌ ಅಲ್ಲಗಳೆದಿದ್ದು, ಸಿಬ್ಬಂದಿಗಳು ಸ್ವಚ್ಚತೆ ಮಾಡುತ್ತಿದ್ದರು. ಶೌಚಾಲಯಗಳ ಬಳಿ ಹಾಕುವ ಪೌಡರ್ ಪಾಕೇಟ್ ನಾನೇ ಓಪನ್ ಮಾಡಿ ಹಾಕುತ್ತಿದ್ದೆ. ಪಕ್ಕದಲ್ಲಿ ಆಟವಾಡುತ್ತಿದ್ದ ಬಾಲಕಿ ಅದನ್ನು ನೋಡಲು ಬಂದಳು. ನಾನು ಪಕ್ಕಕ್ಕೆ ಹೋಗು ಎಂದು ಹೇಳಿದೆ.‌ ಹೀಗೆ ಹಾಕುವಾಗ ಆಕಸ್ಮಿಕವಾಗಿ ಪೌಡರ್ ತಗುಲಿ ಅಲರ್ಜಿ ಆಗಿದೆ‌. ಬಾಲಕಿಗೆ ಚಿಕಿತ್ಸೆ ಕೊಡಿಸುತ್ತಿದ್ದೇವೆ.‌ ಉದ್ದೇಶಪೂರ್ವಕವಾಗಿ ಈ ಘಟನೆ ನಡೆದಿಲ್ಲ ಎಂದು ಹೇಳಿದ್ದಾರೆ.

ಸದ್ಯ ಬಾಲಕಿ‌ ಚಿಕಿತ್ಸೆ ಪಡೆಯುತ್ತಿದ್ದು, ಸತ್ಯಾಸತ್ಯತೆ ಹೊರಗೆ ಬರಬೇಕಿದೆ.