ಈ ಹಳ್ಳಿಯಲ್ಲಿನ ಜನರು ಚಿರತೆಗಳಿಗೆ ಹೆದರುವುದಿಲ್ಲವಂತೆ

CHITRADURGA NEWS | 16 may 2025

ಯಾವ ವ್ಯಕ್ತಿ ಎಷ್ಟು ಧೈರ್ಯವಂತನಾಗಿದ್ದರೂ ಕೂಡ ಕಣ್ಣುಬಿಟ್ಟಾಗ ಎದುರಿಗೆ ಚಿರತೆ ಕಾಣಿಸಿದರೆ ಜೀವ ಭಯಕ್ಕೆ ಎದ್ದುಬಿದ್ದು ಓಡಿಹೋಗುತ್ತಾರೆ. ಆದರೆ ರಾಜಸ್ಥಾನದ ಒಂದು ಹಳ್ಳಿಯಲ್ಲಿನ ಜನರು ಚಿರತೆಯನ್ನು ಕಂಡರೆ ಸ್ವಲ್ಪವೂ ಭಯಪಡುವುದಿಲ್ಲವಂತೆ.

ಬದಲಾಗಿ ಅವರು ಚಿರತೆಯನ್ನು ತಮ್ಮ ನೆರೆಹೊರೆಯವನು ಎಂದು ಪರಿಗಣಿಸುತ್ತಾರಂತೆ. ನಿಜ ಇದು ಕಥೆಯಲ್ಲ, ವಾಸ್ತವ. ಇಲ್ಲಿ ಮನುಷ್ಯರು ಮತ್ತು ಚಿರತೆಗಳ ನಡುವೆ ಹೋರಾಟ ನಡೆಯಲ್ಲ ಬದಲಾಗಿ ಪರಸ್ಪರ ತಿಳುವಳಿಕೆ ಮತ್ತು ನಂಬಿಕೆ ಇರುವ ಒಂದು ವಿಶಿಷ್ಟ ಸಂಬಂಧವಿದೆ. ಈ ಪ್ರದೇಶದ ಜನರು ಚಿರತೆಗಳನ್ನು ಶತ್ರುಗಳೆಂದು ಪರಿಗಣಿಸುವುದಿಲ್ಲ, ಅವರು ಅದನ್ನು ಹಳ್ಳಿಯ ರಕ್ಷಕ ಎಂದು ತಿಳಿಯುತ್ತಾರೆ. ಹಾಗಾದ್ರೆ ಆ ಹಳ್ಳಿ ಯಾವುದೆಂಬುದನ್ನು ತಿಳಿದುಕೊಳ್ಳಿ.

ಚಿರತೆಗೆ ಹೆದರದ ಹಳ್ಳಿ

ರಾಜಸ್ಥಾನದ ಪಾಲಿ ಜಿಲ್ಲೆಯಲ್ಲಿರುವ ಬೇರಾ, ಫಲ್ನಾ, ದಂತಿವಾಡಾ ಮತ್ತು ಜವಾಯಿಯಂತಹ ಕೆಲವು ಹಳ್ಳಿಗಳು ತಮ್ಮದೇ ಆದ ವಿಶೇಷ ಕಾರಣಗಳಿಗಾಗಿ ಸುದ್ದಿಯಲ್ಲಿವೆ. ಈ ಪ್ರದೇಶಗಳಲ್ಲಿ ಚಿರತೆಗಳು ಬಯಲಿನಲ್ಲಿ ಸುತ್ತಾಡುತ್ತವೆ, ಪರ್ವತ ಗುಹೆಗಳಲ್ಲಿ ವಾಸಿಸುತ್ತವೆ ಮತ್ತು ಕೆಲವೊಮ್ಮೆ ಮನೆಗಳ ಛಾವಣಿಗಳ ಮೇಲೂ ಕಂಡುಬರುತ್ತವೆ. ಅಚ್ಚರಿಯ ವಿಷಯವೆಂದರೆ ಇಲ್ಲಿನ ಜನರು ಅವರಿಗೆ ಹೆದರುವುದಿಲ್ಲ ಅಥವಾ ದಾಳಿ ಮಾಡುವುದಿಲ್ಲ. ಬದಲಾಗಿ, ಚಿರತೆಗಳು ಇಲ್ಲಿನ ಜನರ ಜೀವನದ ಒಂದು ಭಾಗವಾಗಿ ಮಾರ್ಪಟ್ಟಿವೆ.

ಚಿರತೆಗೆ ಹೆದರದ ಸಮುದಾಯ

ಈ ಹಳ್ಳಿಗಳಲ್ಲಿ ವಾಸಿಸುವ ರಬಾರಿ ಸಮುದಾಯವು ಚಿರತೆಗಳನ್ನು ಕಂಡು ಹೆದರುವುದಿಲ್ಲವಂತೆ, ಬದಲಾಗಿ ಒಡನಾಡಿಯಾಗಿ ಪರಿಗಣಿಸುತ್ತದೆ. ಅವರ ದೃಷ್ಟಿಯಲ್ಲಿ, ಈ ಚಿರತೆಗಳು ಗ್ರಾಮವನ್ನು ರಕ್ಷಿಸುವ ಜೀವಿಗಳು. ಇಷ್ಟೇ ಅಲ್ಲ, ಚಿರತೆಗಳು ಗ್ರಾಮವನ್ನು ದುಷ್ಟ ಶಕ್ತಿಗಳಿಂದ ರಕ್ಷಿಸುತ್ತವೆ ಎಂದು ಅವರು ನಂಬುತ್ತಾರೆ. ಈ ನಂಬಿಕೆಯ ಪ್ರಭಾವ ಎಷ್ಟು ಆಳವಾಗಿ ಇರುತ್ತವೆ ಎಂದರೆ, ಚಿರತೆ ಯಾರೊಬ್ಬರ ಮೇಕೆಯನ್ನು ತೆಗೆದುಕೊಂಡು ಹೋದರೂ, ಜನರು ಅದನ್ನು ಪ್ರಕೃತಿಯ ನಿಯಮ ಎಂದು ಪರಿಗಣಿಸುತ್ತಾರೆ ಮತ್ತು ಕೋಪಗೊಳ್ಳುವುದಿಲ್ಲವಂತೆ.

ಹಾಗಾಗಿ ಪಾಲಿ ಜಿಲ್ಲೆಯ ಜವಾಯಿ ಪ್ರದೇಶವನ್ನು ವಿಶೇಷವಾಗಿ ಚಿರತೆಗಳ ಭದ್ರಕೋಟೆ ಎಂದು ಪರಿಗಣಿಸಲಾಗಿದೆ. ಇಲ್ಲಿನ ಪರ್ವತ ಗೌಹೆಗಳು ಈ ಚಿರತೆಗಳಿಗೆ ಸೂಕ್ತವಾದ ವಾಸಸ್ಥಾನವಾಗಿದೆ. ಜವಾಯಿ ಪ್ರದೇಶವೊಂದರಲ್ಲೇ 60 ಕ್ಕೂ ಹೆಚ್ಚು ಚಿರತೆಗಳು ವಾಸಿಸುತ್ತವೆ ಎಂದು ನಂಬಲಾಗಿದೆ. ಅವುಗಳ ಇರುವುದರಿಂದ ಹಳ್ಳಿಯ ಜಾನುವಾರುಗಳಿಗೆ ಅಪಾಯವನ್ನು ಉಂಟುಮಾಡುವಂತಹ ತೋಳಗಳು ಮತ್ತು ಕತ್ತೆಕಿರುಬಗಳಂತಹ ಪರಭಕ್ಷಕಗಳನ್ನು ಅಲ್ಲಿಗೆ ಬರುವುದಿಲ್ಲವಂತೆ.