ನವಜಾತ ಶಿಶುವಿನ ಆರೈಕೆ ಮಾಡುವಾಗ ಪೋಷಕರು ಈ ತಪ್ಪುಗಳನ್ನು ಮಾಡಬೇಡಿ

CHITRADURGA NEWS | 15 April 2025

ಮಗುವಿನ ಜನನವು ಪೋಷಕರಿಗೆ ಮತ್ತು ಅವರ ಕುಟುಂಬದವರಿಗೆ ಸಂತೋಷದ ಕ್ಷಣವಾಗಿದೆ. ಆದರೆ ಈ ಕ್ಷಣದಿಂದ ಮಗುವನ್ನು ಆರೋಗ್ಯವಾಗಿ ಬೆಳೆಸುವ ಜವಾಬ್ದಾರಿ ಕೂಡ ಅವರ ಹೆಗಲೇರುತ್ತದೆ. ಮಗುವನ್ನು ಸಾಕುವುದು ಸುಲಭವಾದ ಕೆಲಸವಲ್ಲ.

ಶಿಶುಗಳು ತುಂಬಾ ಸೂಕ್ಷ್ಮವಾಗಿರುತ್ತವೆ ಮತ್ತು ಅವರನ್ನು ಹೆಚ್ಚಿನ ಕಾಳಜಿವಹಿಸಿ ನೋಡಿಕೊಳ್ಳಬೇಕಾಗುತ್ತದೆ. ಇಲ್ಲವಾದರೆ ಅವರ ಆರೋಗ್ಯದಲ್ಲಿ ಏರುಪೇರಾಗಬಹುದು. ಆದರೆ ಕೆಲವು ಪೋಷಕರು ಶಿಶುವಿನ ಆರೈಕೆಯಲ್ಲಿ, ಅವರ ಆರೋಗ್ಯದ ಮೇಲೆ ಕೆಟ್ಟ ಪರಿಣಾಮ ಬೀರುವ ಕೆಲವು ತಪ್ಪುಗಳನ್ನು ಮಾಡುತ್ತಾರೆ. ಅದು ಅವರಿಗೆ ಅಪಾಯಕಾರಿಯಾಗಬಹುದು. ಹಾಗಾಗಿ ಆ ತಪ್ಪುಗಳು ಯಾವುದೆಂಬುದನ್ನು ತಜ್ಞರಿಂದ ತಿಳಿದುಕೊಳ್ಳಿ.

ನೇರ ಲೈಟ್ಗಳನ್ನು ಹಾಕಬೇಡಿ

ನವಜಾತ ಶಿಶುವಿನ ಕಣ್ಣುಗಳು ತುಂಬಾ ಸೂಕ್ಷ್ಮವಾಗಿರುತ್ತವೆ ಮತ್ತು ಪ್ರಕಾಶಮಾನವಾದ ಬೆಳಕಿನಿಂದಾಗಿ ಅವರಿಗೆ ತೊಂದರೆಯಾಗಬಹುದು. ಹಾಗಾಗಿ ಮಕ್ಕಳ ಕಣ್ಣುಗಳ ಮುಂದೆ ಅಥವಾ ಹತ್ತಿರ ನೇರ ಸೂರ್ಯನ ಬೆಳಕು, ಬಲ್ಬ್ಗಳು ಅಥವಾ ಫೋನ್ ಫ್ಲ್ಯಾಶ್ ಲೈಟ್ ಗಳನ್ನು ಇಡುವುದನ್ನು ತಪ್ಪಿಸಿ. ಇಲ್ಲವಾದರೆ ಇದರಿಂದ ಅವರ ಕಣ್ಣುಗಳಿಗೆ ಹಾನಿಯಾಗಬಹುದು. ಆದ್ದರಿಂದ, ಮಗು ಮಲಗುವ ಕೋಣೆಯಲ್ಲಿ ಪ್ರಕಾಶಮಾನವಾದ ಲೈಟ್ಗಳನ್ನು ತಪ್ಪಿಸಿ.

ಮಗುವಿನ ಬಳಿ ದೊಡ್ಡ ಶಬ್ದಗಳು ಅಥವಾ ಸಂಗೀತವನ್ನು ನುಡಿಸಬೇಡಿ

ನವಜಾತ ಶಿಶುವಿಗೆ ಹೆಚ್ಚು ಶಬ್ದ ಅಥವಾ ಸಂಗೀತದ ಸ್ವರ ಕೇಳಿಸುವುದನ್ನು ತಪ್ಪಿಸಬೇಕು. ದೊಡ್ಡ ಶಬ್ದಗಳು ಮಗುವಿಗೆ ಆತಂಕ ಮತ್ತು ಸಮಸ್ಯೆಯಯನ್ನು ಉಂಟುಮಾಡಬಹುದು. ವಾಸ್ತವವಾಗಿ, ಶಿಶುಗಳ ಕಿವಿಗಳು ತುಂಬಾ ಸೂಕ್ಷ್ಮವಾಗಿರುತ್ತವೆ, ಈ ಕಾರಣದಿಂದಾಗಿ ದೊಡ್ಡ ಶಬ್ದಗಳು ಅಥವಾ ಸಂಗೀತವು ಅವರ ಕಿವಿಗಳನ್ನು ಹಾನಿಗೊಳಿಸಬಹುದು. ಹಾಗಾಗಿ ಮಗುವಿನ ಬಳಿ ಸಂಗೀತವನ್ನು ನುಡಿಸಲು ಬಯಸಿದರೆ, ನೀವು ಲಘು ಮತ್ತು ಕಡಿಮೆ ಶಬ್ದದಲ್ಲಿ ನುಡಿಸಬಹುದು.

ಎಸಿ ಅಥವಾ ಫ್ಯಾನ್ ಅನ್ನು ನೇರ ಗಾಳಿಯಲ್ಲಿ ಇಡಬೇಡಿ

ನವಜಾತ ಶಿಶುವಿಗೆ ಬೇಗ ಶೀತವಾಗುತ್ತದೆ. ಹಾಗಾಗಿ ನೀವು ಎಸಿ ಅಥವಾ ಫ್ಯಾನ್ ಬಳಸುತ್ತಿದ್ದರೆ ತಂಪಾದ ಗಾಳಿ ನೇರವಾಗಿ ಮಗುವಿನ ಮೇಲೆ ಬೀಳದಂತೆ ನೋಡಿಕೊಳ್ಳಿ. ಇಲ್ಲವಾದರೆ ಈ ತಂಪಾದ ಗಾಳಿಯು ಮಗುವಿಗೆ ಶೀತ ಅಥವಾ ಕೆಮ್ಮನ್ನು ಉಂಟುಮಾಡಬಹುದು.

ಮಗುವಿನ ಮುಖದ ಮೇಲೆ ಚುಂಬಿಸುವುದನ್ನು ತಪ್ಪಿಸಿ

ನವಜಾತ ಶಿಶುಗಳು ನೋಡಲು ಸಾಕಷ್ಟು ಮುದ್ದಾಗಿ ಕಾಣುತ್ತವೆ. ಹಾಗಾಗಿ ಪೋಷಕರು ಮಾತ್ರವಲ್ಲದೆ ಅವರನ್ನು ನೋಡಲು ಬರುವ ಜನರು ಸಹ ಅವರನ್ನು ಕಂಡು ಕೆಲವೊಮ್ಮೆ ಅವರ ಹಣೆಯ ಮೇಲೆ ಮತ್ತು ಕೆಲವೊಮ್ಮೆ ಅವರ ಕೆನ್ನೆಗಳ ಮೇಲೆ ಚುಂಬಿಸುತ್ತಾರೆ.

ಆದರೆ ಇದು ಮಗುವಿಗೆ ಅಪಾಯಕಾರಿಯಾಗಬಹುದು. ನವಜಾತ ಶಿಶುವಿನ ಚರ್ಮ ಮತ್ತು ಪ್ರತಿರೋಧಕ ವ್ಯವಸ್ಥೆ ತುಂಬಾ ಸೂಕ್ಷ್ಮವಾಗಿರುತ್ತದೆ. ಇದರಿಂದಾಗಿ ಅವರು ಸುಲಭವಾಗಿ ಸೋಂಕಿಗೆ ಒಳಗಾಗಬಹುದು. ಆದ್ದರಿಂದ, ಬೇರೆಯವರು ನಿಮ್ಮ ಮಗುವನ್ನು ಚುಂಬಿಸದಂತೆ ತಡೆಯಬೇಕು.

ಚಿಕ್ಕ ಮಕ್ಕಳೊಂದಿಗೆ ಮಗುವನ್ನು ಒಂಟಿಯಾಗಿ ಬಿಡಬೇಡಿ

ನವಜಾತ ಶಿಶುವನ್ನು ಚಿಕ್ಕ ಮಕ್ಕಳೊಂದಿಗೆ ಒಂಟಿಯಾಗಿ ಬಿಡಬೇಡಿ. ಚಿಕ್ಕ ಮಕ್ಕಳಿಗೆ ಏನು ತಿಳುವಳಿಕೆ ಇರುವುದಿಲ್ಲ. ಹಾಗಾಗಿ ಅವರು ಮಗುವಿನೊಂದಿಗೆ ಆಡುವಾಗ ಅವರನ್ನು ನೋಯಿಸಬಹುದು. ಇದು ನವಜಾತ ಶಿಶುವಿಗೆ ಅಪಾಯಕಾರಿಯಾಗಬಹುದು. ಆದ್ದರಿಂದ, ನಿಮ್ಮ ನವಜಾತ ಶಿಶುವನ್ನು ಸಣ್ಣ ಮಗುವಿನೊಂದಿಗೆ ಒಂಟಿಯಾಗಿ ಬಿಡಬೇಡಿ.

ಈ ಸಲಹೆಗಳನ್ನು ಪಾಲಿಸುವ ಮೂಲಕ ನಿಮ್ಮ ಮಗುವನ್ನು ಚೆನ್ನಾಗಿ ನೋಡಿಕೊಳ್ಳಿ. ಅವರ ಆರೋಗ್ಯದ ಬಗ್ಗೆ ಕಾಳಜಿವಹಿಸಿ.