ಹಿರಿಯೂರಿನಲ್ಲಿ ಕಾರಿನಿಂದ 3 ಲಕ್ಷ ಕಳ್ಳತನ | ಬೈಕ್‍ನಲ್ಲಿ ಬಂದ ಕಳ್ಳರ ಕೈಚಳಕ ಸಿಸಿಟಿವಿಯಲ್ಲಿ ಸೆರೆ

ಚಿತ್ರದುರ್ಗ ನ್ಯೂಸ್.ಕಾಂ: ಕಾರಿನಲ್ಲಿದ್ದ ಮೂರು ಲಕ್ಷ ರೂ. ಹಣ ಕದ್ದು ಇಬ್ಬರು ಕಳ್ಳರು ಪರಾರಿಯಾಗಿರುವ ಘಟನೆ ಹಿರಿಯೂರು ನಗರದಲ್ಲಿ ಶುಕ್ರವಾರ ನಡೆದಿದೆ.

ಹಿರಿಯೂರಿನ ಲಕ್ಷ್ಮಮ್ಮ ಬಡಾವಣೆಯಲ್ಲಿ ಈ ಘಟನೆ ನಡೆದಿದ್ದು, 3 ಲಕ್ಷ ರೂ. ಹಣದ ಬ್ಯಾಗ್ ಕಳ್ಳತನವಾಗಿದೆ. ಕಳ್ಳರು ಬೈಕಿನಲ್ಲಿ ಬಂದು ಕಾರಿನಿಂದ ಹಣ ಕದ್ದು ಪರಾರಿಯಾಗಿರುವ ದೃಶ್ಯ ಸಿ.ಸಿ.ಟಿವಿ ಕ್ಯಾಮರಾದಲ್ಲಿ ಸೆರೆಯಾಗಿದೆ.

ಇದನ್ನೂ ಓದಿ: ಜಾನುಕೊಂಡ ಬಳಿ ಡಾಬಾದಲ್ಲಿ ಪೊಲೀಸ್ ಪಿಸ್ತೂಲ್ ನಾಪತ್ತೆ

ಇಲ್ಲಿನ ಕೃಷ್ಣಕುಮಾರ್ ಎಂಬುವವರು ಬ್ಯಾಂಕ್ ಆಫ್ ಬರೋಡಾದಿಂದ ಹಣ ಬಿಡಿಸಿಕೊಂಡು ಬಂದು ಕಾರಿನಲ್ಲಿಟ್ಟು, ಮನೆಯ ಬೀಗ ತೆಗೆಯುತ್ತಿರುವಾಗ ಕಳ್ಳತನ ನಡೆದಿದೆ.

ಬೈಕಿನಲ್ಲಿ ಬಂದ ಇಬ್ಬರು ಮುಸುಕುದಾರಿ ಕಳ್ಳರು ಈ ಕೃತ್ಯ ಎಸಗಿದ್ದಾರೆ. ಸ್ಥಳಕ್ಕೆ ಹಿರಿಯೂರು ನಗರ ಠಾಣೆ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.

ಕಳೆದ ವಾರವಷ್ಟೇ ಹೊಸದುರ್ಗದಲ್ಲಿ 10 ಲಕ್ಷ ಕಳುವಾಗಿತ್ತು:

ಇದೇ ಮಾದರಿಯ ಘಟನೆ ನ.22 ರಂದು ಹೊಸದುರ್ಗ ಪಟ್ಟಣದ ಮುಖ್ಯ ರಸ್ತೆಯಲ್ಲಿ ನಡೆದಿತ್ತು.

ತಾಲೂಕಿನ ಲಕ್ಕಿಹಳ್ಳಿಯ ಮುದ್ದಪ್ಪ ಎಂಬುವವರ ಕಾರಿನಿಂದ ಇಬ್ಬರು ಕಳ್ಳರು ಕಾರಿನ ಗಾಜು ಹೊಡೆದು 10 ಲಕ್ಷ ರೂ. ಕಳ್ಳತನ ಮಾಡಿದ್ದರು.

ಈ ಘಟನೆ ಪತ್ತೆಯಾಗುವ ಮೊದಲೇ ಮತ್ತೆ ಹಿರಿಯೂರಿನಲ್ಲಿ ಕಾರಿನಿಂದ 3 ಲಕ್ಷ ರೂ. ಕಳ್ಳತನ ನಡೆದಿದೆ. ಬ್ಯಾಂಕುಗಳಿಂದ ಹಣ ಬಿಡಿಸಿ ಕಾರುಗಳಲ್ಲಿಟ್ಟುಕೊಂಡು ಓಡಾಡುವವರನ್ನೇ ಈ ಕಳ್ಳರ ಗ್ಯಾಂಗ್ ಟಾರ್ಗೆಟ್ ಮಾಡಿದಂತೆ ಈ ಘಟನೆಗಳಿಂದ ಅನುಮಾನ ಮೂಡುತ್ತಿದೆ.